ᔫ ᐊᔭᒍᑕᐃᓐᓇᖅ

QTSA35IN

ᔫ ᐊᔭᒍᑕᐃᓐᓇᖅ ᐃᓅᓚᐅᖅᓯᒪᔪᖅ 1936-ᒥ. ᐅᓂᒃᑲᐅᓯᖃᖃᓯᐅᔾᔨᓚᐅᖅᑐᖅ ᖃᓄᖅ ᕿᒻᒦᑦ ᕿᒧᒃᓯᐅᑏᑦ ᐊᑐᖅᑕᐅᕙᓚᐅᕐᓂᖏᓐᓂᒃ. ᐅᖃᓚᐅᖅᖢᓂᓗ ᕿᒻᒦᑦ ᐃᖏᕐᕋᔾᔪᑎᒋᔭᐅᕙᓚᐅᖅᓯᒪᓂᖏᓐᓂᒃ ᐊᖑᓇᓲᑕᐅᓪᓗᑎᒡᓗ. ᔫ ᐃᖅᑲᐅᒪᔪᖅ ᐸᓖᓯᒃᑯᑦ ᑎᑭᑎᓪᓗᒋᑦ ᓴᓂᑭᓗᐊᕐᒧᑦ ᕿᒻᒥᓂᒃ ᑐᖁᕋᐃᔭᖅᑐᖅᖢᑎᒃ. ᐊᑖᑕᖓᑕ ᕿᒻᒥᖓ ᖁᑭᖅᑕᐅᓚᐅᖅᓯᒪᔪᖅ. ᔫ ᐃᖅᑲᐅᒪᖕᒥᔪᖅ ᕿᒻᒦᑦ ᑲᐳᖅᑕᐅᔭᕆᐊᖃᓚᐅᖅᓯᒪᓂᖏᓐᓂᒃ. ᐊᑖᑕᖓᑕ ᕿᒻᒥᖏᑦ ᑎᓴᒪᐅᔪᖅᑐᑦ ᑐᖁᓚᐅᖅᓯᒪᔪᑦ ᑲᐱᔭᐅᓚᐅᖅᑎᓪᓗᒋᑦ. ᔫ ᐃᖅᑲᐅᒪᔪᖅ ᓄᒃᑎᖅᑎᑕᐅᓕᕋᒥᒃ ᐱᖁᑎᓕᒫᖏᑦ ᕿᒪᒃᑕᐅᔭᕆᐊᖃᓚᐅᕐᓂᖏᓐᓂᒃ, ᑭᓯᐊᓂᓕ ᑕᐃᑯᓐᖓᕋᒥᒃ ᐃᒡᓗᑖᖅᑎᑕᐅᓚᐅᖅᓯᒪᔪᑦ ᑕᖅᑭᑕᒫᖅ $2.00-ᐃᖃᑦᑕᖅᖢᑎᒃ. ᔫ ᐃᖅᑲᐅᒪᔪᖅ ᓄᒃᑎᖅᑎᑕᐅᓂᕐᒥᒃ ᐊᑲᖅᓴᓚᐅᖅᓯᒪᓐᖏᓐᓂᕐᒥᓂ. ᐅᓂᒃᑳᓚᐅᖅᑐᖅ ᑕᐃᑲᓂ ᓄᒃᑎᕐᕕᒋᓂᐊᖅᑕᖓᓂ ᐆᒪᔪᖃᓐᖏᓐᓂᖓᓂᒃ. ᔫ ᐊᒻᒪᓗ ᐊᑖᑕᖓ ᐊᐅᓪᓚᖅᑎᑕᐅᓚᐅᖅᓯᒪᔫᒃ ᕼᐋᒧᓪᑕᓐᒧᑦ ᐊᒻᒪᓗ ᒨᔅ ᕚᒃᑐᕆᒧᑦ ᐳᕙᒡᓗᒋᐊᖅᑐᖅᖢᑎᒃ. ᐅᓂᒃᑳᓚᐅᕐᒥᔪᖅ ᐱᑦᑎᐊᖅᑕᐅᖃᑦᑕᓚᐅᓐᖏᓐᓂᕐᒥᓂ ᐃᖅᑲᓇᐃᔭᖅᑎᒧᑦ ᐋᓐᓂᐊᕕᖕᒦᑎᓪᓗᒍ. ᒪᓐᓇ ᔫ ᑲᑎᒪᔨᐅᖃᑕᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐃᒃᓯᕙᐅᑕᐅᓪᓗᓂ ᓴᓂᑭᓗᐊᑉ ᐃᒡᓗᓕᕆᔨᖏᑦᑕ ᑲᑎᒪᔨᖏᓐᓄᑦ.