ᔪᐊᓇᓯ ᑰᓂᓕᐅᓯ

QTQK23IN

ᔪᐊᓇᓯ ᑰᓂᓕᐅᓯ ᐃᓅᓚᐅᖅᓯᒪᔪᖅ ᐃᐸᒃᓱᖕᒥ 1935-ᖑᑎᓪᓗᒍ. ᐊᔾᔨᒌᓐᖏᑦᑐᓂ ᓄᓇᓕᕋᓛᕐᓂ ᐱᕈᖅᓴᕐᓂᑯ. ᔪᐊᓇᓯ ᐅᓂᒃᑳᓚᐅᖅᑐᖅ ᕿᒻᒦᔭᖅᑕᐅᓚᐅᖅᓯᒪᓐᖏᓐᓂᕐᒥᓂ, ᓇᓗᓇᐃᖅᓯᒐᓗᐊᕆᓪᓗᓂ ᐸᓖᓯᒃᑯᑦ ᐸᖕᓂᖅᑑᕐᒥ ᖁᑭᖅᓯᖃᑦᑕᓚᐅᖅᓯᒪᓂᖏᓐᓂᒃ ᕿᒻᒥᓂᒃ ᐃᐲᓐᖔᖅᑐᓂᒃ. ᔪᐊᓇᓯ ᐅᖃᓚᐅᖅᑐᖅ ᐋᓐᓂᕐᓇᕐᓂᖅᐹᖑᓚᐅᖅᓯᒪᓂᖓᓂ ᐃᓚᒌᑦ ᐊᐅᓪᓚᖅᑎᑕᐅᒪᑕ ᐱᔪᒪᓐᖏᑎᓪᓗᒋᑦ. ᐅᓂᒃᑳᓚᐅᖅᑐᖅ ᐊᖑᑎᐅᖃᑎᒌᑦ ᐊᖑᓇᓱᒋᐊᖅᓯᒪᑎᓪᓗᒋᑦ, ᓄᓇᓕᕋᓛᕐᒥᓄᑦ ᐅᑎᓚᐅᖅᓯᒪᔪᑦ ᐃᓄᖃᔮᓐᖏᑦᑐᒧᑦ, ᐊᕐᓇᐃᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓐᓂᕐᒪᑕ ᐸᓖᓯᒃᑯᓐᓄᑦ. ᖃᐅᑎᓪᓗᒍ ᐊᖑᑏᑦ ᐸᖕᓂᖅᑑᓕᐊᓕᓚᐅᖅᓯᒪᔪᑦ. ᔪᐊᓇᓯ ᐅᖃᓚᐅᕐᒥᔪᖅ ᓅᑕᐅᔾᔪᑎᒃᓴᖅᑕᖃᓐᖏᓐᓂᕋᐃᓪᓗᓂ ᑭᓐᖒᒪᔭᖃᔮᓚᐅᓐᖏᒻᒪᑕ ᓄᓇᓕᕋᓛᕐᒥᓂ. ᔪᐊᓇᓯ ᐊᒻᒪᓗ ᓄᓕᐊᕇᒃ ᓄᒃᑎᓕᓚᐅᖅᓯᒪᔪᑦ ᕿᑭᖅᑕᕐᔪᐊᕐᒧᑦ ᐃᓚᒥᓂᒃ ᖃᓂᒡᓕᒋᐊᒃᑲᓐᓂᕋᓱᒃᖢᑎᒃ. 1957-ᒥ, ᔪᐊᓇᓯ ᕼᐋᒧᓪᑕᓐᒧᑦ ᐊᐅᓪᓚᖅᑎᑕᐅᓚᐅᖅᓯᒪᔪᖅ ᐳᕙᒡᓗᖕᓂᖓᓄᑦ. ᐅᓂᒃᑳᓚᐅᕐᒥᔪᖅ ᓲᕐᓗᓕ ᑎᒍᔭᐅᓯᒪᔪᑎᑐᑦ ᐱᔭᐅᓚᐅᖅᓯᒪᓂᕐᒥᓂ ᓰᑏ ᕼᐊᐅᒥ, ᐊᒻᒪᓗ ᐅᒥᐊᕐᔪᐊᕐᒥ ᐃᖅᑲᓇᐃᔭᕆᐊᖃᓚᐅᖅᓯᒪᓂᕐᒥᓂ ᐊᑭᓕᖅᓱᖅᑕᐅᓐᖏᖢᓂ ᐱᔨᑦᑎᕐᓂᖓᓄᑦ.