ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓃᙶᕐᓯᒪᔪᓂᑦ ᐱᓕᕆᐊᖃᕐᓂᖅ

2007ᒥ 2010ᒧᑦ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (ᑭᓪᓕᓯᓂᐊᖅᑏᑦ) ᓄᐊᑦᑎᓚᐅᕐᓯᒪᒻᒪᑕ ᐅᓂᒃᑲᓂᑦ ᐊᑐᖅᑕᐅᓂᑯᒥᓂᕐᓂᑦ 1950ᒥ 1975ᒧᑦ ᐃᓄᓐᓄᑦ ᐱᔭᕆᐊᑐᔪᒃᑰᖅᑐᒥᓂᕐᓄᑦ ᑕᐃᔅᓱᒪᓂ. ᐊᐱᕐᓱᓚᐅᕐᓯᒪᔪᑦ ᖃᓪᓗᓈᕐᓂᑦ ᐃᖅᑲᓇᐃᔭᖅᑐᒥᓂᕐᓂᑦ ᑕᒫᓂ ᑕᐃᔅᓱᒪᓂ ᓲᕐᓗ ᒪᑯᓂᖓ ᓄᖅᑲᖓᓕᖅᑐᓂᑦ ᐸᓖᓯᐅᖃᑦᑕᕐᓯᒪᔪᓂᑦ, ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᖃᑦᑕᕐᓯᒪᔪᓂᑦ ᐊᒻᒪᓗ ᐃᓕᓴᐃᔨᐅᖃᑦᑕᕐᓯᒪᔪᓂᑦ. ᐱᔭᕇᕐᓯᔪᒻᒥᔪᑦ ᑲᒪᒋᔭᖏᓐᓂᒃ ᐃᑦᑕᕐᓂᓴᕐᓂᑦ ᖃᐅᔨᓴᕈᑎᒋᔪᔭᖏᓐᓂᒃ.

ᑭᓪᓕᓯᓂᐊᖅᑏᑦ ᐊᐱᕐᓱᓚᐅᕐᓯᒪᒧᑦ 345ᓂᑦ ᖃᐅᔨᓯᒪᔪᓂᑦ 16ᕌᖅᑎᖅᑐᑎᒃ ᐃᓄᓕᒫᓂᑦ ᓈᓚᒋᐊᖅᑐᖃᑦᑕᕐᓯᒪᑎᓪᓗᒋᑦ, ᕿᒥᕐᕈᔪᔪᑦ 131ᓂᑦ ᐊᐱᖅᓱᖅᑕᐅᔾᔪᑎᒥᓂᖏᓐᓂᒃ ᓂᐱᓕᐅᖅᑕᐅᓯᒪᔪᓂᑦ ᑲᑐᔾᔨᖃᑎᒌᒃᑯᓐᓂᑦ 2004ᒥ 2006ᒧᑦ, ᓄᐊᑦᑎᔪᔪᑦ ᓄᐊᑕᐅᓯᒪᔪᓂᑦ ᑕᐃᔅᓱᒪᓂᓴᕐᓂᑦ ᑎᑎᕋᑕᐅᓂᑯᒥᓂᕐᓂᑦ ᐱᓕᕆᖃᑎᒌᓐᓂᕆᕙᑦᑕᒥᓂᖏᑕ ᒥᔅᓵᓄᑦ ᐃᓄᐃᑦ ᒐᕙᒪᒃᑯᓪᓗ 1950ᒥ 1975ᒧᑦ. ᑖᒃᑯᐊ ᑲᒪᒋᔭᐅᑎᓪᓗᒋᑦ, ᑭᓪᓕᓯᓂᐊᖅᑏᑦ ᑎᑎᕋᓚᐅᕐᓯᒪᔪᑦ ᑎᑎᕋᑦᑎᐊᖅᑐᒋᑦ ᐊᒥᓱᑦ ᑐᑭᑕᕈᑕᐅᕙᑦᑐᒥᓃᑦ, ᐱᓂᐊᕈᑕᐅᕙᑦᑐᒥᓃᑦ ᐊᒻᒪᓗ ᖃᓄᐃᓕᐅᕈᑕᕙᑦᑐᒥᓃᑦ ᒥᔅᓵᓄᑦ ᑕᐃᔅᓱᒪᓂ ᐅᓚᕕᑕᐅᑎᓪᓗᒋᑦ ᐃᓄᐃᑦ, ᐊᒻᒪᓗ ᐱᕙᓪᓕᐊᒍᑕᐅᓯᔪᒥᓂᐅᑎᓪᓗᒍ ᓱᑲᑦᑐᐊᓗᒻᒥᒃ ᐃᓅᓯᕐᒥ ᒪᑭᒪᓇᓱᐊᕈᑎᓂᓪᓗ ᐊᓯᔾᔨᐸᓪᓕᐊᒍᑕᐅᓂᐊᓕᖅᑐᓄᑦ ᕿᑭᖅᑕᓂ ᓄᓇᓕᓐᓂᑦ.

ᓈᒪᔪᑦ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᕆᓯᒪᔭᖏᑦ ᐱᔾᔪᑎᖃᕐᖓᑕ ᑕᐃᔅᓱᒪᓂᓴᕐᓂᑦ ᕿᑭᖅᑕᓂ ᓄᓇᓕᓐᓂᑦ ᒪᓕᑦᑐᒋᑦ ᐃᓄᐃᑦ ᐊᑐᕐᓯᒪᔭᖏᑦ ᑕᐃᒫᒃ ᐅᖃᐅᓯᐅᓯᒪᒻᒪᑕ ᑭᓪᓕᓯᓂᐊᖅᑏᑦ ᑭᓪᓕᓯᓂᐊᕐᓂᖏᓐᓂ, ᐊᒻᒪᓗ ᐃᑦᑕᕐᓂᓴᕐᓂᑦ ᓯᕕᑐᔪᒥᒃ ᖃᐅᔨᓴᕈᑎᖃᖅᑎᓪᓗᒋᑦ. ᑖᒃᑯᐊ ᐅᓂᒃᑳᑦ ᕿᒥᕐᕈᒍᑕᐅᓯᒪᒻᒪᑕ ᖃᓄᖅ ᐃᓅᓯᖏᑦ ᕿᑭᖅᑕᓂ ᓄᓇᓖᑦ ᐃᓄᐃᑦ ᐊᓯᔾᔨᓚᐅᕐᓯᒪᒻᒪᖔᑕ ᑭᓪᓕᓯᓂᐊᖅᑏᑦ ᑭᓪᓕᓯᓂᐊᕈᑎᒋᓯᒪᔭᖏᑕ ᒥᔅᓵᓄᑦ ᐊᕐᕌᒍᓂᑦ ᐱᔾᔪᑎᒋᓪᓗᒋᑦ ᒐᕙᒪᒃᑯᑦ ᑐᑭᑖᕈᑎᒋᕙᑦᑕᒥᓂᖏᑦ ᐊᑐᐊᒐᖏᓪᓗ.

ᓯᑎᐱᕆ 2013ᒥ, ᑲᑐᔾᔨᖃᑎᒌᒃᑯᑦ ᑎᓕᓯᒪᔭᖏᑦ ᑲᑎᖃᑎᖃᓚᐅᕐᓯᒪᒻᒪᑕ ᑭᒡᒐᑐᖅᑎᖏᓐᓂᒃ ᑲᓇᑕᐅᑉ ᒐᕙᒪᒃᑯᑦ ᐋᑐᕚᒥ. ᑲᑎᒪᓚᐅᕐᓯᒪᔪᑦ ᐱᔾᔪᑎᖃᖅᑐᑎᒃ ᑐᓂᓯᓂᐊᕐᖓᑕ ᓇᓕᖅᑲᖏᓐᓂᒃ ᐅᓂᒃᑳᑦ ᐊᒻᒪᓗ ᐅᓂᒃᑳᖃᕐᓂᐊᕐᖓᑕ ᖃᐅᔨᒍᑎᒋᓯᒪᔭᖏᓐᓂᒃ ᐊᒻᒪᓗ ᐊᑐᓕᖁᔨᔾᔪᑎᒋᓯᒪᔭᖏᓐᓂᒃ ᑭᓪᓕᓯᓂᐊᖅᑏᑦ. ᑲᑐᔾᔨᖃᑎᒌᒃᑯᑦ ᓱᓕ ᐃᖅᑲᓇᐃᔮᖃᕐᐸᑦᑐᑦ ᐋᖅᑭᑦᑕᐅᑎᑦᑎᓇᓱᐊᖅᑐᑎᒃ ᐊᒻᒪᓗ ᑲᑐᔾᔨᖃᑎᖃᕈᒪᓪᓗᑎᒃ ᑕᐃᒪᐃᒋᐊᖃᕐᖓᑕ ᐃᓕᓴᕆᔭᐅᖁᓪᓗᒋᑦ ᑕᐃᔅᓱᒪᓂ ᐱᑦᑎᐊᖏᔾᔪᑎᒥᓃᑦ ᐊᒻᒪᓗ ᐊᑐᓕᖅᑎᑦᑎᖁᔨᓪᓗᑎᒃ ᐊᑐᓕᖁᔨᔾᔪᑕᐅᓯᒪᔪᓂᑦ ᑭᓪᓕᓯᓂᐊᖅᑎᓂᑦ.

ᖃᐅᔨᒍᑎᒋᓯᒪᔭᖏᑦ ᐱᒻᒪᕆᐅᔪᑦ

ᑭᓪᓕᓯᐊᓂᖅᑏᑦ ᐱᔭᕇᕈᑎᖃᔪᔪᑦ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᔨᓪᓗᐊᑕᒥᓂᐅᓂᕋᖅᑐᒋᑦ ᐊᓯᔾᔨᕈᑕᐅᓯᒪᔪᓂᑦ ᕿᑭᖅᑕᓂ ᓄᓇᓕᓐᓂᑦ ᐊᑯᓐᓂᖏᓐᓂ 1950 ᐊᒻᒪᓗ 1975. ᐊᑐᐊᒐᑦ ᐱᓕᕆᐊᓪᓗ, ᐱᒋᐊᕈᑕᐅᓯᒪᓪᓗᑎᒃ ᐃᓱᒪᒋᔭᖏᑎᒍᑦ, ᐊᐅᓚᑦᑎᕕᑎᒍᑦ ᐊᒻᒪᓗ ᒪᑭᒪᓇᓱᐊᕈᑎᓂᑦ ᐱᔾᔪᑎᖃᖅᑐᑎᒃ, ᐊᑐᖅᑎᑕᐅᓯᒪᒻᒪᑕ ᐃᓄᓐᓄᑦ ᑐᑭᓯᒋᐊᕐᕕᖃᕐᓯᒪᒐᑎᒃ ᐅᕝᕙᓘᓐᓃᑦ ᐊᖏᖅᑕᐅᓯᒪᒐᑎᒃ, ᐊᒻᒪᓗ ᐃᓘᓐᓇᖏᓐᓂᒃ ᐅᑭᐅᖅᑕᖅᑐᒥᐅᑦ ᖃᓪᓗᓈᑦ ᓄᓇᖓᓐᓂᒥᐅᑎᑐᑦ ᐱᐅᓯᖃᓕᖅᑎᒐᓱᑦᑐᒋᑦ. ᐊᒻᒪᓗ ᓱᓕ, ᑐᑭᓯᔭᐅᓯᒪᒐᔪᑦᑑᔮᖃᑦᑕᕋᓗᐊᖅᑐᓂ ᐊᒻᒪᓗ ᐊᑐᓕᖅᑎᑕᐅᓯᒪᖃᑦᑕᖅᑐᒥᓂᐅᒋᐊᔅᓴᖏᓐᓂᒃ ᐊᑲᐅᓂᕐᐹᖑᒐᔭᖅᑑᔮᖅᑐᓂᑦ ᐃᓄᓐᓄᑦ ᑐᕌᖓᔪᓂᑦ ᐃᓱᒪᒋᓪᓗᒋᑦ, ᐃᓄᐃᑦ ᐃᓕᖅᑯᓯᖓᑦ ᐃᓱᒪᒋᔭᐅᓯᒪᓐᓂᖏᒻᒪᑦ ᐅᕝᕙᓘᓐᓃᑦ ᑐᑭᓯᔭᐅᓯᒪᓐᓂᖏᒻᒪᑦ. ᐊᒥᓱᑦ ᐱᓕᕆᐊᑦ ᐃᓱᒪᔅᓴᕐᓯᐅᕈᑕᐅᓯᒪᑦᑎᐊᖃᑦᑕᓂᙱᑎᐊᕐᖓᑕ, ᐊᐅᓚᑕᐅᑲᒻᒪᒐᔪᖃᑦᑕᖅᑐᑎᒃ ᐊᒻᒪᓗ/ᐅᕝᕙᓘᓐᓃᑦ ᑮᓇᐅᔭᖃᖅᑎᑕᐅᕙᑦᑐᒥᓂᐅᓪᓗᑎᒃ ᐊᒥᒐᕐᓯᔪᓂᑦ.

ᑕᒪᓐᓇ ᐱᔾᔪᑎᒋᓪᓗᒍ, ᐃᓄᐃᑦ ᐊᑐᕐᓯᒪᔪᑦ ᐃᕐᖐᓐᓇᖅ/ᑕᕝᕙᓴᐃᓐᓇᖅ ᐊᒻᒪᓗ ᐱᐅᙱᓪᓚᕆᑦᑐᓂᑦ ᐃᓕᖅᑯᓯᖅᑎᒍᑦ, ᐃᓅᓯᖅᑎᒍᑦ, ᐊᒻᒪᓗ ᒪᑭᒪᓇᓱᐊᕈᑎᑎᒍᑦ ᐊᓯᐅᔨᓂᕐᒥᒃ ᑕᐃᔅᓱᒪᓂ ᑖᒃᑯᓇᓂ ᐊᕐᕌᒍᓂᑦ, ᐊᑑᑎᓂᒥᓂᖏᑦ ᓱᓕ ᐃᑉᐱᒋᔭᐅᕙᑦᑐᑎᒃ. ᐃᓚᖏᓐᓂ, ᑭᖑᓂᐊᒍᑦ ᐊᑐᖅᑕᐅᓯᔪᒥᓃᑦ ᑭᖑᕚᕆᔭᐅᔪᓄᑦ ᐃᑉᐱᓐᓂᕈᑕᐅᓯᒪᓪᓗᑎᒃ. ᐃᓄᐃᑦ ᐅᓪᓗᒥ ᐊᑐᖃᑦᑕᖅᑐᑦ ᐱᔭᕆᐊᑐᔪᓂᑦ, ᓲᕐᓗ ᐊᒥᓱᐊᓗᐃᑦ ᐊᔪᕐᓴᓪᓚᕆᖃᑦᑕᖅᑐᑎᒃ, ᑎᒍᔭᐅᖅᑲᕙᑦᑐᑎᒃ, ᐊᔪᓕᕈᑎᖃᕐᓯᒪᕙᑦᑐᑎᒃ, ᐋᓐᓂᐊᕙᑦᑐᑎᒃ. ᐱᕕᖃᕐᓂᕐᓴᐅᓕᕋᓗᐊᖅᑎᓪᓗᒋᑦ ᐅᓪᓗᒥ ᐱᖃᑕᐅᔪᓐᓇᓂᕐᓴᐅᓕᖅᑐᑎᒃ ᑲᓇᑕᒥ ᐊᐅᓚᑦᑎᕕᖃᕐᕕᒻᒥ ᐊᒻᒪᓗ ᐃᓕᖅᑯᓯᖅᑎᒍᑦ ᐃᓅᓯᕐᒥ, ᐅᓪᓗᒥᓕ ᐊᑐᖅᑕᐅᓪᓚᑦᑖᖃᑦᑕᖅᑐᖅ ᐊᒥᓱᑦ ᐃᓄᐃᑦ ᓱᓕ ᐊᔅᓱᕈᖃᑦᑕᕐᖓᑕ ᖃᐅᑕᒫᑦ.