ᐅᓪᓗᒥ ᓱᑯᑦᑎᐊᓃᓕᖅᑭᑕ

ᐱᔭᕇᕈᑎᖏᑦ ᐅᓂᒃᑳᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (ᑭᓪᓕᓯᓂᐊᖅᑏᑦ) ᓴᖅᑭᖅᑕᐅᓚᐅᕐᓯᒪᒻᒪᑕ ᐅᑐᐱᕆ 20, 2010ᖑᑎᓪᓗᒍ ᐃᓚᒋᔭᐅᓪᓗᑎᒃ ᐊᕐᕌᒍᑕᒫᕐᓯᐅᒻᒥᑦ ᑲᑎᒪᕕᔾᔪᐊᕐᓂᖓᓐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ (ᑲᑐᔾᔨᖃᑎᒌᑦ). ᐱᖓᓱᓂᑦ ᐊᕐᕌᒍᓂᑦ ᑭᖑᓂᐊᒍᑦ, ᑲᒪᒋᔭᐅᕙᓪᓕᐊᓪᓚᕆᔪᒻᒪᑕ ᐱᕙᓪᓕᐊᑎᑦᑎᒍᒪᓪᓗᑎᒃ ᑐᑭᓯᒍᑎᔅᓴᓂᑦ ᓄᐊᑕᐅᓯᒪᔪᓂᑦ ᑭᓪᓕᓯᓂᐊᖅᑏᑦ ᐱᓕᕆᑎᓪᓗᒋᑦ. ᑕᒪᓐᓇ ᖃᐅᔨᕙᓪᓕᐊᒍᑕᐅᔭᕆᐊᖃᔪᔪᖅ ᐃᓗᓕᓪᓚᑦᑖᖏᓐᓂᒃ ᐊᒥᓱᑦ ᐱᔾᔪᑕᐅᓯᒪᔪᑦ ᓴᖅᑭᕐᓯᒪᔪᓂᑦ ᐱᔭᕇᕈᑎᖏᓐᓂ ᐅᓂᒃᑳᓂᑦ ᐊᒻᒪᓗ ᐋᖅᑭᔅᓱᐃᒍᑕᐅᓪᓗᑎᒃ ᓄᓇᓖᑦ ᑕᐃᔅᓱᒪᓂ ᐊᑐᖃᑦᑕᕐᓯᒪᔭᖏᓐᓂᒃ ᐃᓘᓐᓇᖏᓐᓄᑦ ᓄᓇᓕᓐᓄᑦ ᕿᑭᖅᑖᓗᒻᒥ ᓄᓇᓕᓐᓂᑦ. ᑕᒪᒃᑯᐊ ᐱᓇᓱᐊᕈᑕᐅᔪᔪᑦ ᐊᖏᔪᐊᓗᒻᒥᒃ ᐃᖅᑲᓇᐃᔮᖃᕈᑕᐅᓯᒪᔪᑦ ᑕᑯᖅᑯᔾᔭᐅᒍᓐᓇᕐᓯᓯᒪᓪᓗᑎᓪᓗ ᕿᑭᖅᑖᓗᒻᒥᐅᓄᑦ, ᐊᒻᒪᓗ ᑲᓇᑕᒥᐅᓕᒫᓄᑦ.

ᑲᑐᔾᔨᖃᑎᒌᒃᑯᑦ ᓴᖅᑭᑎᑦᑎᔪᔪᑦ ᓈᒪᔪᓂᑦ ᐅᓂᒃᑳᓕᐊᖑᓯᒪᔪᓂᑦ ᑲᔪᓯᑎᑦᑎᓪᓗᑎᒃ ᐃᖅᑲᓇᐃᔮᕆᔪᔭᖏᓐᓂᒃ ᑭᓪᓕᓯᓂᐊᖅᑏᑦ. ᑖᒃᑯᐊ ᐅᓂᒃᑳᑦ ᒪᑯᓂᖓ ᐱᔾᔪᑎᓖᑦ: ᓄᓇᓖᑦ ᑕᐃᔅᓱᒪᓂ ᐊᑐᕐᓯᒪᔭᖏᑦ ᖁᓕᓂᑦ ᐱᖓᓱᓂᓪᓗ (13) ᓄᓇᓕᓐᓂᑦ ᕿᑭᖅᑖᓗᒻᒥᐅᓂᑦ, ᐊᒻᒪᓗ ᒪᕐᕉᒃ ᖃᐅᔨᓴᕈᑕᐅᓗᐊᔪᔫᒃ: “ᕿᒥᕐᕈᓂᖅ ᐸᓖᓯᒃᑯᓐᓂᑦ ᐊᒻᒪᓗ ᐃᓄᐃᑦ ᕿᒧᔅᓯᖏᓐᓂᒃ ᐅᓂᒃᑳᑦ  (2006)”, ᐊᒻᒪᓗ “ᐃᖅᑲᓇᐃᔭᖅᑎᑕᐅᔪᑦ ᐃᓱᒪᒍᓯᒥᓂᖏᑦ ᑲᓇᑕᒥᐅᓂᑦ ᐊᐅᓚᑦᑎᓂᕐᒧᑦ: ᒐᕙᒪᒃᑯᓐᓂ ᐊᐅᓚᑦᑎᔩᑦ ᐊᒻᒪᓗ ᕿᑭᖅᑕᓂ ᓄᓇᓖᑦ 1950ᒥ 1975ᒧᑦ.” ᑕᕝᕙᓂ ᑎᑎᕋᖅᑕᐅᓯᒪᓯᓐᓈᕐᒥᔪᑦ ᐃᖅᑲᓇᐃᔮᖑᓯᒪᔪᓂᑦ ᑎᓴᒪᐅᔪᙱᒐᖅᑐᑦ ᐱᔾᔪᑕᐅᓯᒪᔪᑦ ᒥᔅᓵᓄᑦ ᐅᓂᒃᑳᑦ ᐱᔾᔪᑎᓖᑦ ᒪᑯᓂᖓ ᐋᓐᓂᐊᖅᑐᓕᕆᓂᖅ, ᐃᓪᓗᓕᕆᓂᖅ, ᒪᑭᒪᓇᓱᐊᕈᑎᓂᑦ ᐱᕙᓪᓕᐊᔪᓕᕆᓂᖅ, ᐸᓖᓯᓕᕆᓂᖅ, ᐃᓕᓐᓂᐊᕐᓂᓕᕆᓂᖅ, ᕿᒻᒦᑦ1, ᐊᒻᒪᓗ ᓅᓯᒪᖃᑦᑕᕈᓐᓇᕐᓂᖅ.

ᑖᒃᑯᐊ ᐅᓂᒃᑳᑦ ᓴᖅᑭᖅᑕᐅᓪᓚᑦᑖᓚᐅᕐᓯᒪᔪᑦ ᐃᓄᓕᒫᓂᑦ ᑲᑎᑎᑦᑎᓪᓗᑎᒃ ᐅᑐᐱᕆ 9, 2013ᖑᑎᓪᓗᒍ ᐋᖓᓕᒃᑲᓐ ᑐᔅᓯᐊᕐᕕᖓᑕ ᑲᑎᒪᕕᐊᓂ ᐃᖃᓗᓐᓂ, ᓄᓇᕗᒥ. ᑖᓐᓇ ᐱᒻᒪᕆᐊᓪᓗᓂ ᑲᑎᒍᑕᐅᑎᓪᓗᒍ, ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᑕᕝᕙᓂ ᑲᑎᖃᑎᖃᔪᔪᑦ ᐃᓚᖃᖅᑐᑎᒃ ᑖᒃᑯᓂᖓ ᑭᓪᓕᓯᓂᐊᖅᑏᑦ ᑲᒥᓯᓇᖓᓐᓂᒃ, ᐃᖅᑲᖅᑐᐃᔨᒥᓂᕐᒥᒃ ᔭᐃᒥᓯ ᐃᒡᓗᓕᐅᖅᑎ, ᓄᓇᕗᑦ ᒪᓕᒐᓕᐅᖅᑎᕐᔪᐊᖓᓐᓂᒃ ᓕᐅᓇ ᐊᒡᓗᒃᑲᖅ, ᓂᕈᐊᖅᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂ, ᐊᒻᒪᓗ ᐃᓄᓐᓂᑦ ᐅᓂᒃᑳᕐᓯᒪᔪᓂᑦ ᑭᓪᓕᓯᓂᐊᖅᑎᓄᑦ.

ᓴᖅᑭᖅᑕᐅᓂᖏᑦ ᑭᓪᓕᓯᓂᐊᖅᑏᑦ ᐅᓂᒃᑳᖏᑦ ᐱᒻᒪᕆᐊᓘᓪᓗᓂ ᑲᒪᒋᔭᐅᔪᔪᖅ ᑲᑐᔾᔨᖃᑎᒌᒃᑯᓐᓂᑦ ᐱᓇᓱᐊᕈᑎᖃᐃᓐᓇᑎᓪᓗᒋᑦ ᐱᓕᕆᖃᑎᖃᕐᓂᕐᒥᒃ ᐃᓄᓐᓂᑦ ᐊᒻᒪᓗ ᒐᕙᒪᒃᑯᓐᓂᑦ ᑲᔪᓯᑎᑕᐅᖁᓪᓗᒋᑦ ᐊᑐᓕᖁᔨᔾᔪᑕᐅᓯᒪᔪᑦ ᑭᓪᓕᓯᓂᐊᖅᑎᓂᑦ. ᐃᓄᒃᑎᑐᑦ ᓇᓗᓇᐃᕐᓗᒍ, ᕿᑭᖅᑕᓂ ᓄᓇᓖᑦ ᐃᓄᐃᑦ ᐱᓇᓱᐊᕈᑎᓖᑦ ᓴᐃᒻᒪᖃᑎᒌᓐᓂᕐᒥᒃ: ᓴᐃᒻᒪᕈᑎᖃᕐᓂᕐᒥᒃ ᑕᐃᔅᓱᒪᓂ ᐊᑭᓕᒥᓂᖏᓐᓂᒃ, ᐊᒻᒪᓗ ᐱᓕᕆᖃᑎᖃᕈᒪᓪᓗᑎᒃ ᐃᑉᐱᒋᖃᑦᑕᐅᑎᑦᑎᐊᕐᓗᑎᒃ ᐊᒻᒪᓗ ᐊᔾᔨᒌᑎᑦᑎᓗᑎᒃ. ᑲᑐᔾᔨᖃᑎᒌᒃᑯᑦ ᓂᕆᐅᑦᑐᑦ ᖃᐅᔨᒍᑎᒋᓯᒪᔭᖏᑦ ᐊᒻᒪᓗ ᐊᑐᓕᖁᔨᔾᔪᑕᐅᓯᒪᔪᑦ ᑭᓪᓕᓯᓂᐊᖅᑎᓂᑦ, ᐃᓚᒋᔭᐅᓗᑎᒃ ᑕᐃᔅᓱᒪᓂ ᐊᑐᖅᑕᐅᓂᑯᒥᓃᑦ ᑖᒃᑯᓇᓂ ᓄᐊᑕᐅᓯᒪᔪᓂᑦ ᐃᓕᓐᓂᐊᕈᑎᓂᑦ ᐅᓂᒃᑳᓕᐊᖑᓯᒪᔪᓂᑦ, ᐱᔪᓐᓇᕐᓯᒍᑕᐅᓂᐊᕆᐊᖏᑕ ᐃᓄᓐᓄᑦ ᐊᒻᒪᓗ ᐃᑲᔫᑎᖃᕐᓂᐊᕆᐊᖏᑕ ᒪᒥᑎᑦᑎᓂᕐᒧᑦ ᐋᓐᓂᕈᑕᐅᓯᒪᔪᓂᑦ, ᑐᑭᓯᒍᑕᐅᓗᑎᒃ ᑐᑭᓯᓂᕐᓗᒍᑕᐅᓯᒪᔪᓂᑦ ᐊᒻᒪᓗ ᐃᓱᒪᒋᔪᓐᓇᕐᓯᒍᑕᐅᔪᒪᓂᐊᖅᑐᔅᓴᐅᕗᑦ ᐃᓚᒌᓂᑦ ᐊᒻᒪᓗ ᐃᓕᖅᑯᓯᖃᖃᑎᒌᙱᑦᑐᓂᑦ.

1 ᐃᓄᒃᑎᑐᑦ ᑕᐃᒎᓯᖅ ᐃᓄᐃᑦ ᕿᒧᔅᓯᖏᓐᓄᑦ