ᔭᐃᐱᑎ ᑯᓪᓗᐊᓕᒃ

QTQK22IN

ᔭᐃᐱᑎ ᖁᓪᓗᐊᓕᒃ ᐸᖕᓂᖅᑑᑉ ᓯᓚᑖᓂ ᐃᓅᓚᐅᖅᓯᒪᔪᖅ 1954-ᖑᑎᓪᓗᒍ, ᓄᓇᓕᕋᓛᕐᒥᐅᑕᐅᓚᐅᖅᖢᓂᓗ ᑎᓄᔾᔭᕕᐅᑉ ᓯᓚᑖᓂ, ᐸᖕᓂᖅᑑᑉ ᖃᓂᒋᔮᓂ. 1967-ᖑᑎᓪᓗᒍ, ᐃᓚᒌᑦ ᐸᓖᓯᒃᑯᓐᓄᑦ ᐅᖃᐅᔾᔭᐅᓚᐅᖅᓯᒪᔪᑦ ᓄᒃᑎᖁᔭᐅᓪᓗᑎᒃ ᐸᖕᓂᖅᑑᕐᒧᑦ, ᐅᖃᐅᔾᔭᐅᒐᒥᒃ ᓄᒃᑎᓕᖅᖢᑎᒃ ᕿᒧᒃᓯᖅᖢᑎᒃ. ᐅᖃᓚᐅᖅᑐᖅ ᓄᒃᑎᕆᐊᖃᓚᐅᕐᓂᕋᖅᖢᑎᒃ ᐃᓅᓕᓴᖅᑕᐅᖃᑦᑕᕈᓐᓇᕐᓂᐊᕋᒥᒃ ᐊᒻᒪᓗ ᐃᓕᓐᓂᐊᕈᓐᓇᕐᓂᐊᕐᒪᑕ ᕿᑐᕐᖓᕆᔭᐅᔪᑦ. ᔭᐃᐱᑎ ᐅᖃᓚᐅᖅᑐᖅ 6 ᑕᖅᑭᑦ ᓄᒃᑎᖅᓯᒪᓕᖅᑎᓪᓗᒋᑦ ᐸᖕᓂᖅᑑᕐᒧᑦ, ᕿᒻᒥᖏᑦ ᑐᖁᕋᖅᑕᐅᓚᐅᖅᓯᒪᔪᑦ ᓄᑖᕐᒥᒃ ᐱᖁᔭᖅᑕᖃᓕᕐᒪᑦ ᐅᖃᖅᓯᒪᔪᓂᒃ ᓄᓇᓕᖕᓂ ᕿᒻᒥᖅᑕᖃᕆᐊᖃᓐᖏᓐᓂᖓᓂᒃ. ᐅᖃᓚᐅᕐᒥᔪᖅ ᑲᑎᓕᒫᖅᖢᒋᑦ ᕿᒻᒥᖃᓚᐅᖅᑐᖅ 17-ᓂᒃ, ᐊᒻᒪᓗ ᖁᑭᖅᑕᐅᖃᑦᑕᓚᐅᖅᓯᒪᓪᓗᑎᒃ ᐃᐲᕌᖓᑕ. ᕿᒻᒦᑦ ᖁᑭᖅᑕᐅᖃᑦᑕᓚᐅᖅᑐᑦ ᐸᓖᓯᒃᑯᓐᓄᑦ. ᔭᐃᐱᑎ ᐅᖃᓚᐅᕐᒥᔪᖅ ᖃᕐᒪᒥᐅᑕᐅᓚᐅᖅᓯᒪᓂᕐᒥᓂᒃ ᐸᖕᓂᖅᑑᕐᒧᑦ ᓄᒃᑎᓵᖅᑎᓪᓗᒋᑦ, ᐊᕐᕌᒍᓪᓗ ᐊᒥᓲᓐᖏᑦᑐᑦ ᐊᓂᒍᕐᒪᑕ ᐃᒡᓗᑖᖅᑎᑕᐅᓚᐅᖅᖢᑎᒃ. ᔭᐃᐱᑎ ᒪᕐᕉᖕᓄᑦ ᐊᕐᕌᒎᖕᓄᑦ ᐃᓕᓐᓂᐊᓚᐅᖅᓯᒪᔪᖅ ᐸᖕᓂᖅᑑᕐᒥ, ᑭᓯᐊᓂᓗ ᓄᖅᑲᓚᐅᖅᓯᒪᓪᓗᓂ ᐃᓚᒥᓂᒃ ᐃᑲᔪᕈᓐᓇᕐᓂᐊᕋᒥ. ᕿᑭᖅᑕᕐᔪᐊᕐᒧᑦ ᓄᒃᑎᓕᓚᐅᖅᓯᒪᔪᖅ 20-ᖏᓐᓂ ᐊᕐᕌᒍᖃᓕᖅᖢᓂ. ᕿᑭᖅᑕᕐᔪᐊᕐᒥ, ᐊᖑᓇᓱᖃᑦᑕᖅᑐᖅ ᐊᒻᒪᓗ ᐃᓛᓐᓂᒃᑯᑦ ᐃᖅᑲᓇᐃᔭᓚᐅᖃᑦᑕᖅᖢᓂ.