ᔭᐃᑯᓛᓯ ᕿᓕᖅᑎ

QTPI10IN

ᔭᐃᑯᓛᓯ ᕿᓕᖅᑎ Guys Bight-ᒥ ᐃᓅᓚᐅᖅᓯᒪᔪᖅ, ᒥᑦᑎᒪᑕᓕᐅᑉ ᑲᓇᖕᓇᖓᓂ, 1947-ᖑᑎᓪᓗᒍ. Gise Bit-ᒥᐅᑕᐅᓚᐅᖅᓯᒪᔪᖅ ᐃᓚᒌᑦ ᑭᓯᐊᓂ ᒥᑦᑎᒪᑕᓕᖕᒧᑦ ᓄᒃᑎᖁᔭᐅᓕᕐᒪᑕ 1960-ᖏᑦ ᐊᑐᓕᖅᑎᓪᓗᒋᑦ. ᔭᐃᑯᓛᓯ ᐃᖅᑲᐅᒪᔪᖅ ᑭᖑᓪᓕᖅᐹᑦᑎᐊᖑᖃᑕᐅᓪᓗᓂ ᕿᒧᒃᓯᐅᑎᖃᓕᓚᐅᕐᓂᕐᒥᓂᒃ ᓄᒃᑎᖅᓯᒪᓕᖅᑎᓪᓗᒋᑦ ᓄᓇᓕᖕᓄᑦ. ᐅᖃᓚᐅᕐᒥᔪᖅ ᕿᒻᒦᑦ ᐃᐱᖅᓯᒪᖃᑦᑕᖁᔭᐅᓪᓗᑎᒃ, ᐃᐲᓐᖔᖅᑐᓪᓗ ᖁᑭᖅᑕᐅᖃᑦᑕᕐᓂᐊᕐᓂᕋᖅᑕᐅᓪᓗᑎᒃ. ᐊᕐᕌᒍᒐᓴᖕᓂ ᒥᑦᑎᒪᑕᓕᖕᒥᐅᑕᐅᓕᖅᑎᓪᓗᒍ ᕿᒻᒥᖏᑦ ᖁᑭᐊᔭᐅᓚᐅᖅᓯᒪᔪᑦ. ᕿᒻᒥᖏᑦ ᑐᖁᕋᖅᑕᐅᓚᐅᖅᓯᒪᔪᑦ ᐃᓚᒌᑦ ᓱᓕ ᖃᒧᑕᐅᔭᖅᑖᓚᐅᓐᖏᑎᓪᓗᒋᑦ. ᔭᐃᑯᓛᓯ ᐃᖅᑲᐅᒪᔪᖅ ᐃᒡᓗᖃᓚᐅᓐᖏᓐᓂᕐᒥᓂᒃ ᓄᒃᑎᓵᖅᖢᑎᒃ, ᐊᒻᒪᓗ ᐃᓚᒌᑦ ᓯᒡᔭᒥ ᑐᐱᖅᓯᒪᔭᕆᐊᖃᓚᐅᕐᓂᖏᓐᓂᒃ. ᐃᖅᑲᐅᒪᔪᖅ ᑕᑯᓐᓇᓚᐅᖅᓯᒪᓂᕐᒥᓂᒃ ᐊᑖᑕᒌᖕᓂᒃ ᕿᐊᔫᖕᓂᒃ, ᐃᕐᓂᖓ ᐱᔭᐅᖕᒪᑦ ᐃᓕᓐᓂᐊᕆᐊᖅᑎᑕᐅᓕᖅᖢᓂᓗ ᐱᔪᒪᓐᖏᒃᑲᓗᐊᖅᑎᓪᓗᒍ. ᕿᒻᒥᖏᑦ ᑯᑭᐊᔭᐅᓚᐅᖅᑎᓪᓗᒋᑦ, ᔭᐃᑯᓛᓯ ᐃᖅᑲᓇᐃᔮᖅᑖᓕᓚᐅᖅᓯᒪᔪᖅ ᐃᒡᓗᓕᐅᖅᑐᐊᓘᓕᖅᑎᓪᓗᒋᑦ, ᐊᒻᒪᓗ ᒥᑦᑎᒪᑕᓕᐅᑉ ᑯᐊᐸᖓᓂ. ᐅᓂᒃᑲᐅᓯᖃᓚᐅᕐᒥᔪᖅ ᖃᓄᐃᑦᑑᓚᐅᖅᓯᒪᓂᖓᓂᒃ ᐋᓐᓂᐊᖃᕐᓇᓐᖏᑦᑐᓕᕆᓂᖅ. ᐊᓈᓇᑦᑎᐊᖓ ᖃᓪᓗᓈᑦ ᓄᓇᖓᓐᓄᑦ ᐊᐅᓪᓚᖅᑎᑕᐅᓚᐅᖅᓯᒪᔪᖅ ᐊᒻᒪᓗ ᐅᑎᒃᑲᓐᓂᓚᐅᖅᓯᒪᓐᖏᖢᓂ. ᐃᓚᒌᑦ ᑐᓴᖅᑎᑕᐅᓚᐅᖅᓯᒪᓐᖏᑦᑐᑦ ᐃᓅᔪᓐᓃᕐᓂᖓᓂᒃ. ᐅᖃᓚᐅᕐᒥᔪᖅ ᑕᐃᒪᐃᑦᑐᑦ ᐋᓐᓂᕈᑎᓪᓚᕆᐊᓘᓚᐅᖅᓯᒪᓂᖏᓐᓂᒃ ᐊᒻᒪᓗ ᐊᒃᑐᐃᓂᖃᓪᓚᕆᓚᐅᕐᓂᖏᓐᓂᒃ ᐃᓄᖕᓂᒃ.