ᐃᓚᐃᔭ ᐸᓪᓗᖅ

QTKM21IN

ᐃᓚᐃᔭ ᐸᓪᓗᖅ ᑭᒻᒥᕉ ᖃᓂᒋᔮᓂ ᐃᓅᓚᐅᖅᓯᒪᔪᖅ 1941-ᒥ. ᓄᓇᓕᕋᓛᓂ ᐊᔾᔨᒌᓐᖏᑦᑐᓂ ᐱᕈᖅᓴᓚᐅᖅᓯᒪᔪᖅ ᐃᓚᒌᑦ ᑭᒻᒥᕈᕐᒧᑦ ᓄᒃᑎᓚᐅᖅᑳᖅᑎᓐᓇᒋᑦ 1960-ᖏᓐᓂ ᓱᕈᓯᖅᓯᐅᑎᑖᖃᑦᑕᕐᓂᐊᕋᒥᒃ. ᐅᓂᒃᑳᓚᐅᖅᑐᖅ ᖃᓄᐃᑦᑑᓚᐅᖅᓯᒪᓂᖓᓂᒃ ᓄᓇᓕᕋᓛᕐᒥᐅᑕᐅᑎᓪᓗᒋᑦ, ᐃᒡᓗᑖᖅᑎᑕᐅᓕᖅᑎᓪᓗᒋᓪᓗ ᑭᒻᒥᕈᕐᒥ. ᐃᖅᑲᐅᒪᔪᖅ ᐊᓈᓇᖓ ᒪᑦᑖᕐᕕᒃᑯᑦ ᐊᐅᓪᓚᖅᑎᑕᐅᔭᕆᐊᖃᓚᐅᖅᓯᒪᓂᖓᓂᒃ ᖃᓪᓗᓈᑦ ᓄᓇᖓᓐᓄᑦ ᐳᕙᒡᓗᖕᓂᖓᓄᑦ. ᐃᖅᑲᐅᒪᖕᒥᔪᖅ ᐃᓚᒌᑦ ᑐᓴᐅᒪᖃᑎᖃᑦᑎᐊᓚᐅᓐᖏᓐᓂᖏᓐᓂᒃ ᐊᓈᓇᒥᑕ ᒥᒃᓵᓅᖓᔪᓂᒃ. ᐃᓚᐃᔭ ᐅᓂᒃᑲᐅᓯᖃᓚᐅᖅᑐᖅ ᖃᓄᖅ ᐃᖅᑲᓇᐃᔭᖃᑎᒌᑦᑎᐊᖃᑦᑕᓚᐅᕐᓂᖏᑦ ᐃᓄᐃᑦ ᐊᒻᒪᓗ ᐸᓖᓯᒃᑯᑦ. ᐃᖅᑲᐅᒪᔪᖅ ᕿᒧᒃᓯᐅᑏᑦ ᐊᒃᓱᐊᓗᒃ ᐊᑑᑎᑲᓚᐅᕐᓂᖏᓐᓂᒃ ᐃᓄᖕᓄᑦ, ᐱᓗᐊᕐᓗᒍ ᐊᖑᓇᓱᖕᓂᕐᒧᑦ ᐊᒻᒪᓗ ᒥᑭᒋᐊᕐᓂᐊᕐᓂᕐᒧᑦ, ᖃᒧᑕᐅᔭᐃᑦ ᑎᑭᓚᐅᖅᑎᓐᓇᒋᑦ. ᐃᓚᐃᔭ ᐃᖅᑲᐅᒪᓐᖏᑦᑐᖅ ᐸᓖᓯᒃᑯᑦ ᕿᒻᒦᔭᐃᓚᐅᕐᓂᖏᓐᓂᒃ, ᐃᖅᑲᐅᒪᒐᓗᐊᖅᖢᓂ ᕿᒻᒦᑦ ᓄᓇᓖᑦ ᐃᓗᐊᓂ ᐃᐲᓐᖔᖃᑦᑕᓚᐅᕐᓂᖏᓐᓂᒃ. ᐃᖅᑲᐅᒪᖕᒥᔪᖅ ᐃᓄᐃᑦ ᓇᖕᒥᓂᖅ ᖁᑭᐊᖃᑦᑕᓚᐅᕐᓂᖏᓐᓂᒃ ᕿᒻᒥᓂᒃ ᐋᓐᓂᐊᔪᓂᒃ, ᐱᓪᖤᓐᖏᓴᖅᑐᓂᒃ ᐅᕝᕙᓘᓐᓃᑦ ᐊᓯᖏᓐᓂᒃ ᐋᓐᓂᐊᓕᖕᓂᒃ. ᐃᖅᑲᐅᒪᓐᖏᑦᑐᖅ ᐅᒋᐊᖅᑕᐅᔪᖃᓚᐅᖅᓯᒪᖕᒪᖔᖓ ᕿᒻᒥᓄᑦ.