ᔪᐊᓇᓯ ᐃᖃᓗᒃ

QTSA34IN

ᔪᐊᓇᓯ ᐃᖃᓗᒃ ᐃᓅᓚᐅᖅᓯᒪᔪᖅ 1934-ᒥ ᐊᒻᒪᓗ ᐱᕈᖅᓴᓚᐅᖅᓯᒪᓪᓗᓂ ᑳᑖᐱᖕᒥ. ᐃᖅᑲᐅᒪᔪᖅ ᐃᓛᓐᓂᒃᑯᑦ ᑳᖃᑦᑕᓚᐅᖅᓯᒪᓂᕐᒥᓂᒃ ᐱᕈᖅᓴᖅᖢᓂ. ᔪᐊᓇᓯ ᐅᓂᒃᑲᐅᓯᖃᖃᓯᐅᔾᔨᓚᐅᖅᑐᖅ ᕿᒻᒥᓅᖓᔪᓂᒃ. ᐅᖃᓚᐅᖅᑐᖅ ᕿᒻᒦᑦ ᓄᒃᑕᐅᑎᑐᐊᖑᓚᐅᖅᓯᒪᓂᖏᓐᓂᒃ ᐊᒻᒪᓗ ᐊᓐᓇᐅᒪᔾᔪᑎᑐᐊᖑᓪᓗᑎᒃ. 1954-ᒥ, 19-ᓂᒃ ᐊᕐᕌᒍᖃᓕᖅᖢᓂ, ᔪᐊᓇᓯ ᒨᔅ ᕚᒃᑐᕆᒧᑦ ᐊᐅᓪᓚᓚᐅᖅᓯᒪᔪᖅ ᐳᕙᒡᓗᒋᐊᖅᑐᖅᖢᓂ. ᐅᓂᒃᑳᓚᐅᖅᑐᖅ ᐃᓄᐃᑦ ᑕᐃᑲᓂ ᐋᓐᓂᐊᕕᖕᒦᑦᑐᑦ ᐅᓄᖅᑐᐊᓘᓚᐅᕐᓂᖏᓐᓂᒃ, ᐊᒻᒪᓗ ᐃᖅᑲᐅᒪᖕᒥᔪᖅ ᑐᓵᔨᑕᖃᓚᐅᕐᓂᖓᓂᒃ ᐋᓐᓂᐊᕕᖕᒥ, ᐃᓄᐃᑦ ᑐᑭᓯᐅᒪᓂᐊᕐᒪᑕ ᖃᓄᐃᓕᐅᖅᑕᐅᕙᓪᓕᐊᓂᕐᒥᓂᒃ. ᔪᐊᓇᓯ ᐊᖏᕐᕋᒥᓄᑦ ᐅᑎᓚᐅᖅᓯᒪᔪᖅ 20-ᓂᒃ ᐊᕐᕌᒍᖃᓕᖅᖢᓂ. ᑕᐃᔅᓱᒪᓂ ᓯᕗᓪᓕᖅᐹᒥᒃ ᕿᒧᒃᓯᐅᑎᑖᓚᐅᖅᓯᒪᔪᖅ, ᐊᒻᒪᓗ ᐅᖃᓚᐅᕆᓪᓗᓂ ᐃᓚᖏᑦ ᕿᒻᒥᖏᑦ ᑐᖁᓴᖅᑕᐅᓚᐅᖅᓯᒪᓂᕋᖅᖢᓂᒋᑦ ᑭᖑᓂᐊᓂ.