ᑕᐃᕕᑦ ᒥᑭᔪᖅ

QTSA33IN

ᑕᐃᕕᑦ ᒥᑭᔪᖅ ᐃᓅᓚᐅᖅᓯᒪᔪᖅ 1953-ᖑᑎᓪᓗᒍ. ᐅᓂᒃᑲᐅᓯᖃᖃᓯᐅᔾᔨᓚᐅᖅᑐᖅ ᖃᓄᖅ ᕿᒧᒃᓯᐅᑏᑦ ᐊᑐᖅᑕᐅᖃᑦᑕᓚᐅᖅᓯᒪᖕᒪᖓᖏᑦ, ᐊᒻᒪᓗ ᖃᓄᐃᓕᐅᖅᑎᐅᓚᐅᖅᓯᒪᖕᒪᖔᖏᑦ ᐸᓖᓯᒃᑯᑦ ᕿᒻᒦᑦ ᐱᔾᔪᑎᒋᓪᓗᒋᑦ. ᐃᖅᑲᐅᒪᔪᖅ ᑰᔾᔪᐊᕌᐱᖕᒥ ᐸᓖᓯᒃᑯᑦ ᖁᑭᖅᓯᖃᑦᑕᓚᐅᕐᓂᖏᓐᓂᒃ ᕿᒻᒥᓂᒃ ᐃᐲᓐᖔᖅᑐᓂᒃ. ᑕᐃᕕᑦ ᐅᓂᒃᑲᐅᓯᖃᓚᐅᕐᒥᔪᖅ ᕿᒻᒥᒧᑦ ᑮᔭᐅᓚᐅᖅᓯᒪᓂᕐᒥᓂ ᑕᓪᓕᒪᓂᒃ ᐊᕐᕌᒍᖃᖅᑎᓪᓗᒍ. ᓴᓂᑭᓗᐊᕐᒧᑦ ᓄᒃᑎᓚᐅᖅᓯᒪᔪᖅ 1967-ᒥ ᐊᕐᕌᒍᖃᓕᖅᖢᓂ 14-ᓂᒃ. ᐃᓚᒌᑦ ᓄᒃᑎᓚᐅᖅᓯᒪᔪᑦ ᐅᒥᐊᒃᑯᑦ, ᕿᒻᒥᓕᒫᒥᓂᒃ ᓇᒃᓴᖅᖢᑎᒃ. ᑕᐃᕕᐅ ᐊᑖᑕᖓᑕ ᕿᒧᒃᓯᐅᑎᖏᓐᓂᒃ ᐊᑐᖃᑦᑕᓯᒋᐊᓚᐅᖅᓯᒪᔪᖅ 17-ᓂᒃ ᐊᕐᕌᒍᖃᖅᖢᓂ. ᐊᑖᑕᖓ ᓇᖕᒥᓂᖅ ᕿᒻᒥᒥᓂᒃ ᑐᖁᕋᐃᓚᐅᖅᓯᒪᔪᖅ ᓄᒃᑎᕋᒥᒃ ᓄᓇᕕᓂᕐᒥᑦ ᐃᑎᓕᕋᔪᖕᒥᑦ. 1990-ᖏᑦ ᐊᑐᓕᖅᑎᓪᓗᒋᑦ, ᑕᐃᕕᑎ ᓇᖕᒥᓂᖅ ᕿᒧᒃᓯᐅᑎᑖᕋᓱᓕᓚᐅᖅᓯᒪᔪᖅ, ᑭᓯᐊᓂᓕ ᑕᐃᔅᓱᒪᓂ ᖃᐅᔨᓕᓚᐅᖅᑐᖅ ᕿᒻᒥᓪᓚᕇᑦ ᐊᑭᑐᓗᐊᕐᓂᖏᓐᓂᒃ. 1997-ᖑᓕᖅᑎᓪᓗᒍ ᑕᓪᓕᒪᓂᒃ ᕿᒻᒥᐊᕐᔪᓂᒃ ᓂᐅᕕᓚᐅᖅᓯᒪᔪᖅ ᐃᓄᐃᑦ ᕿᒻᒥᖏᑦᑕ ᐊᔾᔨᒋᓐᖏᑕᖏᓐᓂᒃ, ᕿᒧᒃᓯᖃᑦᑕᓕᖅᖢᓂᓗ. ᑕᐃᕕᑦ ᐃᖅᑲᐅᒪᔪᖅ ᐊᖏᖃᑎᒌᖃᑦᑕᓚᐅᖅᓯᒪᓐᖏᓐᓂᖏᓐᓂᒃ ᓄᓇᖅᑲᑎᒌᖑᓂᑰᓐᖏᑦᑐᑦ. ᑕᐃᕕᑦ 1970-ᖏᓐᓂ ᐃᒡᓗᓕᐅᖅᑎᐅᖃᑕᐅᓚᐅᖅᓯᒪᔪᖅ, ᐊᒻᒪᓗ ᐅᓪᓗᒥ ᑎᑎᕋᐅᔭᕐᓂᕐᒥᒃ ᐊᒻᒪᓗ ᐃᖃᐃᔭᕐᓂᕐᒥᒃ ᐃᓕᓴᐃᖃᑦᑕᖅᖢᓂ.