ᔭᐃᑯ ᐋᓗᓘ

QTPI09IN

ᔭᐃᑯ ᐋᓗᓘ ᐃᓅᓚᐅᖅᓯᒪᔪᖅ 1948-ᒥ. ᐅᓂᒃᑲᐅᓯᖃᖃᓯᐅᔾᔨᓚᐅᖅᑐᖅ ᖃᓄᖅ ᕿᒻᒦᑦ ᑐᖁᕋᖅᑕᐅᓚᐅᖅᓯᒪᓂᖏᓐᓂᒃ. ᓇᓗᓇᐃᖅᓯᓚᐅᖅᑐᖅ ᐸᓖᓯᒃᑯᑦ ᐃᑲᔪᖅᑎᖏᑦ ᓛᓴᓘᓯ ᖃᔮᖅ ᐊᒻᒪᓗ ᔫᓱᐊ ᖁᒪᖔᐱᒃ ᐸᓖᓯᒃᑯᓐᓄᑦ ᑎᓕᔭᐅᓚᐅᖅᓯᒪᓂᖏᖕᓂᒃ ᕿᒻᒥᓂᒃ ᑐᖁᕋᐃᖁᔭᐅᓪᓗᑎᒃ. ᑕᐃᒪᓐᓇ ᔭᐃᑯ ᐅᖃᐅᔾᔭᐅᓚᐅᖅᓯᒪᔪᖅ ᐊᑖᑕᒥᓄᑦ 2000-2001-ᖑᑎᓪᓗᒍ. ᔭᐃᑯ ᐅᖃᓚᐅᕐᒥᔪᖅ 1964-ᖑᑎᓪᓗᒍ ᑰᒡᔪᐊᕌᓗᖕᒧᑦ ᐊᐅᓪᓚᖅᑎᑕᐅᓚᐅᖅᓯᒪᓂᕕᓂᕐᒥᓂ ᐃᓕᓐᓂᐊᕆᐊᖅᑎᑕᐅᓪᓗᓂ, ᐊᒻᒪᓗ ᐊᐅᓪᓚᖅᑎᑕᐅᓚᐅᕐᓂᕐᒥᓄᑦ ᐃᓄᐃᑦ ᐱᖅᑯᓯᓪᓚᕆᖏᑦᑎᑐᑦ ᐊᖑᓴᓱᑦᑎᐊᕈᓐᓇᓐᖏᓕᓚᐅᕐᓂᕐᒥᓂᒃ. ᒥᑦᑎᒪᑕᓕᖕᒧᑦ ᐅᑎᓚᐅᖅᓯᒪᔪᖅ ᐊᒻᒪᓗ ᐃᖅᑲᓇᐃᔭᓕᖅᖢᓂ ᒥᕝᕕᖕᒥ, ᐊᖓᔪᖅᑳᖑᓯᒪᓪᓗᓂ ᒥᑦᑎᒪᑕᓕᐅᑉ ᑯᐊᐸᖓᓂ, ᐅᖅᓱᐊᓗᒃᓯᐅᖅᑎᓂ, ᐊᒻᒪᓗ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ.