ᐃᓕᓴᐱ ᐆᑦᑐᕙᒃ

ᐃᓕᓴᐱ ᐆᑦᑐᕙᒃ ᐃᓅᓚᐅᖅᓯᒪᔪᖅ ᑕᓪᓗᕈᑎᐅ ᐃᒪᓂ, ᑕᓪᓗᕈᒻᒥ. ᐃᓕᓴᐱ ᐸᓂᒋᔭᐅᔪᖅ ᐃᓄᖕᒧᑦ ᐊᒻᒪᓗ ᖃᓪᓗᓈᕐᒧᑦ ᐸᓖᓯᒧᑦ, ᑭᓯᐊᓂᓕ ᐱᕈᖅᓴᖅᑕᐅᓚᐅᖅᓯᒪᔪᖅ ᐃᓄᖕᒧᑦ ᐊᑖᑕᒥᓄᑦ. ᐅᓂᒃᑲᐅᓯᖃᓚᐅᖅᑐᖅ ᐃᓅᓕᓴᖅᑕᐅᒋᐊᖃᕐᓂᕐᒧᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᔭᕆᐊᖃᑦᑕᖅᑐᕕᓂᕐᓂᒃ. ᐊᓈᓇᑦᑎᐊᖓ ᐊᒻᒪᓗ ᐊᑖᑕᖓ ᑕᒪᕐᒥᒃ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓚᐅᖅᓯᒪᔫᒃ ᐳᕙᒡᓗᖕᓂᖏᓐᓄᑦ. ᐊᑖᑕᖓ ᐅᑎᓚᐅᖅᓯᒪᓐᖏᑦᑐᖅ, ᑭᖑᓂᐊᒍᓪᓗ ᐆᒻᒪᓯᖅᖢᓂ ᐃᓅᔪᓐᓃᓚᐅᖅᓯᒪᓪᓗᓂ. ᐃᒐᕐᔪᐊᕐᒥᐅᑕᐅᑎᓪᓗᒋᑦ, ᐃᓕᓴᐱ ᒥᑦᑎᒪᑕᓕᖕᒧᑦ ᓄᒃᑎᖁᔭᐅᖏᓐᓇᓕᓚᐅᖅᓯᒪᔪᖅ ᕿᑐᕐᖓᖏᑦ ᐃᓕᓐᓂᐊᕆᐊᕈᓐᓇᕐᓂᐊᕐᒪᑕ. ᐊᑕᐅᓯᖅ ᕿᑐᕐᖓᖓ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᖅ, ᐊᒻᒪᓗ ᐅᐱᕐᖔᓐᖑᕐᒪᑦ ᕿᑐᕐᖓᖏᑦ ᐊᒥᐊᒃᑯᑦ ᐱᔭᐅᒋᓪᓗᑎᒃ. ᐃᓕᓐᓂᐊᖅᑐᓄᑦ ᐃᒡᓗᖁᑎᒋᔭᐅᔪᒥᐅᑕᐅᓚᐅᖅᓯᒪᔪᑦ. ᐃᓕᓴᐱ ᐅᖃᐅᓯᖃᓚᐅᕐᒥᔪᖅ ᕿᑐᕐᖓᖏᑦ ᐅᑎᕋᓗᐊᕋᒥᒃ ᐊᓯᔾᔨᖅᓯᒪᓕᓚᐅᕐᓂᕋᖅᖢᒋᑦ ᐃᓕᖅᑯᓯᖃᑎᒌᓐᖏᓗᐊᖅᑐᒥᐅᑕᐅᓚᐅᕐᓂᖏᓐᓂᒃ ᐱᔾᔪᑎᖃᖅᖢᑎᒃ. ᐃᓕᓴᐱ ᖃᓪᓗᓈᑦ ᓄᓇᖓᓐᓃᑲᐃᓐᓇᓚᐅᖅᓯᒪᔪᖅ ᐳᕙᒡᓗᖕᓂᖓᓄᑦ 31-ᓂᒃ ᐊᕐᕌᒍᖃᓕᖅᖢᓂ, ᐊᒻᒪᓗ 1968-ᖑᓕᖅᑎᓪᓗᒍ ᒥᑦᑎᒪᑕᓕᖕᒧᑦ ᐊᐅᓪᓚᖅᑎᑕᐅᓚᐅᖅᓯᒪᓪᓗᓂ. ᓇᓗᓇᐃᖅᓯᔪᒪᔪᖅ ᐅᐃᖓᑕ ᕿᒻᒥᖏᑦ ᑎᓴᒪᑦ ᖁᑭᐊᔭᐅᓚᐅᖅᓯᒪᓂᖏᓐᓂᒃ ᐸᓖᓯᒃᑯᓐᓄᑦ ᐱᓱᓕᕐᓂᕐᒪᑕ ᐃᒐᕐᔪᐊᕐᒥᑦ ᒥᑦᑎᒪᑕᓕᖕᒧᑦ.