ᓕᕙᐃ ᐃᕕᒃ

QTPA16IN

ᓕᕙᐃ ᐃᕕᒃ ᐃᓅᓚᐅᖅᓯᒪᔪᖅ 1947-ᒥ ᐃᓪᓗᒐᔪᖕᒥ, ᐸᖕᓂᖅᑐᑉ ᖃᓂᒋᔮᓂ ᓄᓇᓕᕋᓛᕐᒥ. ᐅᓂᒃᑲᐅᓯᖃᓚᐅᖅᑐᖅ ᐃᓚᒌᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓚᐅᖅᓯᒪᓂᖏᓐᓂᒃ ᐸᖕᓂᖅᑑᕐᒧᑦ, ᐊᒻᒪᓗ ᐊᑖᑕᖓᑕ ᕿᒻᒥᖏᑦ ᐃᓚᖏᑦ ᖁᑭᐊᔭᐅᓚᐅᖅᓯᒪᓂᕕᓂᖏᓐᓂᒃ. ᓄᓇᓕᕋᓛᕐᒥᐅᑕᐅᑎᓪᓗᒋᑦ ᓱᓕ, ᐸᓖᓯ ᐊᑖᑕᖓᓂᒃ ᐅᖃᐅᔾᔨᓚᐅᖅᓯᒪᔪᖅ ᖃᐅᒃᐸᑦ ᕿᒻᒥᖏᑦ ᖁᑭᐊᔭᐅᓂᐊᕐᓂᕋᖅᖢᓂᒋᑦ. ᐊᑖᑕᖓ ᐅᓐᓄᐊᒃᑯᑦ ᓄᓇᓕᕋᓛᕐᒧᑦ ᐅᑎᕈᒪᓕᓚᐅᖅᓯᒪᔪᖅ ᕿᒻᒦᔭᖅᑕᐅᓂᐊᓐᖏᓐᓇᒥ. ᐃᓚᒌᑦ ᓄᓇᓕᕋᓛᕐᒥᑦ ᖃᓪᓗᓇᔾᔨᐊᖅᓯᒪᑎᓪᓗᒋᑦ, ᑕᓪᓕᒪᑦ ᕿᒻᒥᖏᑦ ᖁᑭᐊᔭᐅᓚᐅᖅᓯᒪᔪᑦ. ᓕᕙᐃ ᐃᖅᑲᐅᒪᔪᖅ ᐃᓄᐃᑦ ᑳᖃᑦᑕᓕᓚᐅᕐᓂᖏᓐᓂᒃ ᓄᓇᓕᖕᓄᑦ ᓄᒃᑎᖅᑎᖅᑕᐅᓯᒪᓕᖅᑎᓪᓗᒋᑦ.