ᕌᐳᑦ ᐅᐃᓕᔭᒻᓴᓐ

ᕌᐳᑦ ᐅᐃᓕᔭᒻᓴᓐ ᐃᓅᓚᐅᖅᓯᒪᔪᖅ ᐋᒃᔅᓕᒥ, ᐃᖕᓚᓐᒥ 1931−ᖑᑎᓪᓗᒍ. ᐃᓕᓐᓂᐊᕋᓂᒃᓯᒪᔾᔪᑎᑖᓚᐅᖅᓯᒪᔪᖅ Bachelors’ degree−ᒥᒃ ᓇᓗᓇᐃᒃᑯᑕᕐᒥᒃ ᑳᐅᓪᑕᓐ ᔫᓂᕘᓯᑎᖓᓂᒃ ᐃᓕᓐᓂᐊᕐᕕᐊᓗᖕᒥ ᐋᑐᔮᒥ, ᐃᓕᓐᓂᐊᕆᐊᒃᑲᓐᓂᓚᐅᖏᓱᖓᖅᓱᓂ PHD−ᑖᕋᓱᐊᕈᒻᒥᒃ ᖁᑦᑎᖕᓂᖅᓴᒥᒃ ᐃᓕᓐᓂᐊᕌᓂᒃᓯᒪᐅᑎᒥᒃ Royal University of Uppsala−ᒥ Sweden−ᒥ ᓱᐄᑕᓐᒥ. ᕌᐴᑦ ᐃᖃᓇᐃᔭᓚᐅᖅᓯᒪᔪᖅ ᖃᐅᔨᓴᕐᕕᖕᒥ ᕗᐊᑦ ᓯᒻᓴᓐᒥ, ᐊᒻᒪᓗ ᐃᖃᓇᐃᔭᖅᑎᑕᐅᓚᐅᖅᓯᒪᓪᓗᓂ ᐃᒡᓗᕐᔪᐊᓕᐅᖃᑕᐅᓂᕐᒥᒃ ᐸᓐᓂᖅᑐᕐᒥ. ᕌᐳᑦ ᐅᖃᐅᓯᖃᖅᑐᖅ ᐱᒻᒪᕆᐅᓂᖏᓐᓂᒃ ᐃᓚᒌᖕᓂᖅ ᐃᓄᖕᓂ, ᐊᒻᒪᓗ ᐊᓯᔾᔨᖅᐸᓪᓕᐊᓕᓚᐅᖅᓯᒪᓂᖏᓐᓂᒃ ᐃᓄᐃᑦ ᐃᓅᓯᖏᑦ ᐃᓅᖃᑎᒌᖕᓂᖏᓐᓂ. ᐅᖃᐅᓯᖃᖅᑐᖅ ᐊᑐᖅᑕᐅᖃᑦᑕᕐᓂᖏᓐᓂᒃ ᕿᒻᒦᑦ ᓴᓇᕐᕈᑎᐅᔪᑎᑐᑦ, ᐅᖃᖅᓱᓂᓗ ᐅᖃᐅᓯᐅᖃᑦᑕᕆᐊᓕᓚᐅᕐᓂᖏᓐᓂᒃ ᓈᒻᒪᖏᓕᐅᕈᑕᐅᖃᑦᑕᓕᖅᓱᑎᒃ ᑭᓯᐊᓂ ᖃᓗᓈᖃᓕᖅᑎᓪᓗᒍ, ᐃᓄᐃᑦ ᐃᓕᖅᑯᓯᖏᓐᓂᒃ ᖃᐅᔨᒪᖏᓗᐊᖅᑐᓂᒃ, ᐱᓗᐊᖅᑐᒥᒃ ᒐᕙᒪᒃᑯᑦ ᐃᖃᓇᐃᔭᖅᑎᖏᓐᓂᒃ ᐅᑭᐅᖅᑕᖅᑐᕐᒧᐊᕆᐅᖅᑐᑦ 1950−ᖏᓐᓂ. ᑕᐃᒪᓐᖓᑦ 1950−ᖏᓐᓂᒃ ᑲᔪᓯᓪᓗᑎᒃ, ᐃᓱᒪᓘᑖᐅᓂᖏᑦ ᕿᒻᒦᑦ ᐊᐅᓚᑕᐅᔭᕆᐊᖃᕐᓂᖏᑦ ᐱᒻᒪᕆᐅᓕᖅᑎᑕᐅᕙᓪᓕᐊᑐᐃᓐᓇᓚᐅᖅᓯᒪᖕᒪᑕ ᕿᒻᒦᓪᓗ ᖁᑭᐊᔭᐅᖃᑦᑕᓕᖅᓱᑎᒃ ᐸᓖᓯᒃᑯᓐᓅᒐᔪᓚᐅᖅᑐᖅ, ᓄᓇᓖᖕᓂᓗ ᕿᒻᒥᓕᕆᔩᑦ ᑎᒃᑯᐊᖅᑕᐅᓯᒪᖃᑦᑕᓕᖅᑎᓪᓗᒋᑦ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ. ᕌᐴᑦ ᐅᖃᐅᓯᖃᖅᑐᖅ ᐃᓕᓐᓂᐊᖅᑎᑦᑎᓇᓱᐊᕈᑏᑦ ᐊᑐᖅᑕᐅᓯᒪᔪᑦ ᑲᔪᓯᓯᒪᑦᑎᐊᖏᓐᓂᖏᓐᓂᒃ ᐸᓯᒃᓯᓯᒪᓪᓗᓂᓗ ᐊᔪᕐᓇᕈᑕᐅᓯᒪᓂᖏᓐᓂᒃ ᐱᔾᔪᑕᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓚᖃᖅᑎᑦᑎᖏᑕᐃᓐᓇᕐᓂᖏᓐᓂᒃ, ᐃᓕᓐᓂᐊᕈᑎᒃᓴᓄᑦ.