ᓲᓴᓐ ᓯᖒᕆ

QTOT08IN

ᓲᓴᓐ ᓯᖒᕆ ᑭᓐᖓᐃᑦ ᖃᓂᒋᔮᓂ ᐃᓅᓚᐅᖅᓯᒪᔪᖅ 1927-ᒥ. 1934-ᖑᓕᖅᑎᓪᓗᒍ, 8-ᓂᒃ ᐊᕐᕌᒍᖃᓕᖅᑎᖢᓂ, ᑕᓪᓗᕈᑎᐅᑉ ᐃᒪᖓᓄᑦ ᓄᒃᑎᓚᐅᖅᓯᒪᔪᖅ ᐃᑦᑐᒃᑯᒥᓃᖢᓂ. ᖁᑦᑎᒃᑐᕐᒧᑦ ᓄᒃᑎᖅᑕᐅᓚᐅᖅᓯᒪᔪᖅ 1935-ᒥ ᐅᒥᐊᕐᔪᐊᒃᑯᑦ ᓇᔅᑯᐲᒥᒃ ᐊᑎᓕᒃᑯᑦ. ᓲᓴᓐ ᐸᓂᖅᑑᒧᓐᖓᐅᓚᐅᖅᓯᒪᔪᖅ, ᒥᑦᑎᒪᑕᓕᖕᒧᑦ ᐊᒻᒪᓗ ᐃᒃᐱᐊᕐᔪᖕᒧᑦ. 13-ᓂᒃ ᐊᕐᕌᒍᖃᓕᖅᖢᓂ ᒥᑦᑎᒪᑕᓕᓕᐊᓕᓚᐅᖅᓯᒪᔪᖅ, ᐊᑖᑕᖓ ᑕᐃᑯᓐᖓᐅᖁᔭᐅᓚᐅᖅᓯᒪᖕᒪᑦ ᓄᓕᐊᖅᑖᕆᐊᖅᑐᖅᖢᓂ. ᐃᓚᒌᑦ ᐃᒃᐱᐊᕐᔪᖕᒧᑦ ᐅᑎᓕᓚᐅᖅᓯᒪᔪᑦ ᐊᓈᓇᒃᓴᖅᑖᖅᓯᒪᓕᖅᖢᑎᒃ. ᓲᓴᓐ ᐋᑐᕚᒥᐅᑕᐅᓕᖅᑐᖅ ᐊᒻᒪᓗ ᐅᑭᐅᖅᑕᖅᑐᒧᑦ ᐅᑎᓚᐅᖃᑦᑕᖅᖢᓂ. ᐅᓂᒃᑲᐅᓯᖃᓚᐅᖅᑐᖅ ᕿᒻᒦᑦ ᑐᖁᕋᖅᑕᐅᖃᑦᑕᓚᐅᕐᓂᕕᓂᖏᓐᓂᒃ. ᐅᖃᓚᐅᖅᑐᖅ ᐃᒃᐱᐊᕐᔪᖕᒥᒎᖅ ᓇᖕᒥᓂᖅ ᑕᑯᓪᓚᑦᑖᓚᐅᖅᓯᒪᓐᖏᑦᑐᖅ ᕿᒻᒥᓂᒃ ᑐᖁᕋᖅᑕᐅᔪᓂᒃ, ᑭᓯᐊᓂᓕ ᑐᓴᐅᒪᔪᖅ ᑐᖁᕋᐃᖃᑦᑕᓚᐅᕐᓂᖏᓐᓂᒃ ᒥᑦᑎᒪᑕᓕᖕᒥ. ᐅᖃᓚᐅᖅᑐᖅ ᕿᒻᒦᑦ ᐱᓕᒻᒪᒃᓴᖅᑕᐅᑦᑎᐊᖅᑐᐊᓘᖃᑦᑕᓚᐅᕐᓂᖏᓐᓂᒃ ᐊᒻᒪᓗ ᓄᒃᑕᐅᑎᒋᔭᐅᖃᑦᑕᖅᖢᑎᒃ ᐊᖑᓴᓱᒍᑕᐅᖃᑦᑕᖅᖢᑎᒡᓗ ᓲᓴᓐ ᐅᖃᓚᐅᕐᒥᔪᖅ 1966-ᖑᓕᕋᓗᐊᖅᑎᓪᓗᒍ ᕿᒧᒃᓯᐅᑎᓂᒃ ᕿᒻᒥᖃᕈᓐᓃᓚᐅᕐᓂᕋᖅᖢᓂᒋᑦ.