ᓯᒥᐅᓂ ᑯᓄᒃ

QTOT07IN

ᓯᒥᐅᓂ ᑯᓄᒃ ᐃᓅᓚᐅᖅᓯᒪᔪᖅ ᐳᕙᒡᓗᒡᕕᖕᒥ ᓛᓐᑳᔅᑐ, ᐊᓐᑎᐅᕆᔪᒥ 1959-ᖑᑎᓪᓗᒍ. ᖃᓪᓗᓈᒥᒃ ᐊᑖᑕᓕᒃ. ᐃᒡᓗᓕᖕᒥ ᐃᓕᓐᓂᐊᕆᐊᕐᖓᓚᐅᖅᓯᒪᔪᖅ ᐊᒻᒪᓗ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕆᐊᖅᑎᑕᐅᓯᒪᓂᑰᓪᓗᓂ. ᐅᓂᒃᑳᓚᐅᖅᑐᖅ ᐃᓕᓴᖅᑎᐅᑎᓪᓗᒍ ᐊᖑᓐᓂᐊᖅᑕᐅᖃᑦᑕᓚᐅᖅᓯᒪᓂᕐᒥᓂᒃ. ᐃᒡᓗᓕᒑᕐᔪᖕᒥᑦ ᐃᒡᓗᓕᖕᒧᑦ ᐅᑎᓚᐅᖅᓯᒪᔪᖅ 9-ᓂᒃ 10-ᓂᒡᓘᓐᓃᑦ ᐊᕐᕌᒍᖃᓕᖅᑎᓪᓗᒍ. ᓯᒥᐅᓂ ᐅᔾᔨᕈᓱᓚᐅᖅᑐᖅ ᐊᓯᔾᔨᕐᓂᐅᓚᐅᖅᓯᒪᔪᓂᒃ ᐃᓕᓐᓂᐊᕆᐊᖅᓯᒪᓪᓗᓂ ᐊᐅᓪᓚᖅᓯᒪᑎᓪᓗᒍ, ᐃᒡᓗᑦ ᐊᖏᓂᖅᓴᐅᓕᕐᓂᖏᓐᓂᒃ ᐊᒻᒪᓗ ᕿᒻᒦᑦ ᐃᐱᖅᓯᒪᔭᕆᐊᖃᓕᕐᓂᖏᓐᓂᒃ. ᓯᒥᐅᓂ ᐅᒋᐊᖅᑕᐅᓚᐅᖅᓯᒪᔪᖅ ᕿᒻᒥᒧᑦ ᐊᒻᒪᓗ ᐊᐅᓕᖅᓱᖅᑕᐅᔭᕆᐊᖃᓚᐅᖅᓯᒪᓪᓗᓂ, ᑭᓯᐊᓂᓕ ᐃᖅᓯᓐᖏᑦᑐᖅ ᕿᒻᒥᓂᒃ. ᓯᒥᐅᓂ ᐃᖃᓗᖕᓄᑦ ᐃᓕᓐᓂᐊᕐᕕᐊᓗᖕᒧᑦ ᐃᓕᓐᓂᐊᕆᐊᓚᐅᖅᓯᒪᔪᖅ, ᐊᒻᒪᓗ ᐱᖓᓱᓄᑦ ᐊᕐᕌᒍᓄᑦ ᐃᓱᒪᓕᕆᓂᕐᒥᒃ ᐃᓕᓐᓂᐊᓚᐅᖅᓯᒪᓪᓗᓂ ᑳᓪᑕᓐ ᓯᓚᑦᑐᖅᓴᕐᕕᒡᔪᐊᖓᓂ.