ᒦᑲ ᐅᓂᐅᖅᓵᒐᖅ

QTOT04IN

ᒦᑲ ᐅᓂᐅᖅᓵᒐᖅ ᐃᓅᓚᐅᖅᓯᒪᔪᖅ 1962-ᒥ. ᒦᑲ ᐃᖃᓗᖕᒥᐅᑕᐅᒐᓗᐊᖅᖢᓂ ᐋᑐᕚᒥᐅᑕᐅᓕᖅᑐᖅ. ᒦᑲᐅ ᐊᓈᓇᖓ ᐋᓐᓂᓚᐅᖅᑎᓪᓗᒍ, ᐃᓚᒌᑦ ᓂᐊᖁᓐᖒᒧᑦ ᓄᒃᑎᓚᐅᖅᓯᒪᔪᑦ ᐋᓐᓂᐊᕕᖕᒧᑦ ᖃᓂᓐᓇᓱᒃᓗᑎᒃ ᐃᖃᓗᖕᓃᑦᑐᒧᑦ. ᒦᑲ ᐅᓂᒃᑲᐅᓯᖃᓚᐅᖅᓯᒪᔪᖅ ᐊᑖᑕᖓᑕ ᕿᒻᒥᖏᑦ ᑐᖁᕋᖅᑕᐅᔪᐊᓘᑎᓪᓗᒋᑦ 1966-ᒥ ᓂᐊᖁᓐᖒᒥ. ᒦᑲ ᐃᖅᑲᐅᒪᔪᖅ ᐊᑖᑕᖓ ᐃᒃᐱᒍᓱᓗᐊᓕᖃᑦᑕᓚᐅᕐᓂᖓᓂᒃ ᕿᒻᒦᑦ ᑐᖁᕋᖅᑕᐅᓂᕆᓚᐅᖅᑕᖏᓐᓂᒃ ᐅᓂᒃᑲᓕᕌᖓᒥ, ᐊᑖᑕᖓᑕ ᕿᒧᒃᓯᐅᑏᑦ ᐊᖑᓇᓱᒍᑎᒋᔭᑐᐊᕆᓚᐅᖅᓯᒪᖕᒪᒋᑦ ᐊᒻᒪᓗ ᐃᓅᔾᔪᑎᑐᐊᕆᓪᓗᓂᒋᑦ. ᒦᑲ ᐅᖃᓚᐅᖅᑐᖅ ᕿᒻᒦᑦ ᑐᖁᕋᖅᑕᐅᖕᒪᑕ ᐃᓄᐃᑦ ᐃᓅᓯᖓ ᓄᖅᑲᑲᓪᓚᓚᐅᖅᓯᒪᓂᕋᖅᖢᓂᐅᒃ ᐊᒻᒪᓗ ᑕᐃᒃᑯᐊ ᕿᒻᒦᔭᖅᑕᐅᓚᐅᖅᑐᑦ ᐊᑭᓕᖅᑕᐅᔭᕆᐊᖃᕋᓱᒋᓪᓗᓂᒋᑦ.