ᐅᐊᓪᑕ ᕋᑦᓂᑭ

ᐅᐊᓪᑕ ᕋᑦᓂᑭ ᐅᐃᓂᐲᖕᒥ ᐃᓅᓚᐅᖅᓯᒪᔪᖅ 1925-ᒥ. ᑕᕆᐅᑉ ᐊᑭᐊᓄᑦ ᐅᓇᑕᕆᐊᖅᑐᓚᐅᖅᓯᒪᔪᖅ ᐊᒻᒪᓗ ᐋᑐᕚᒧᑦ ᓄᒃᑎᖅᖢᓂ 1955-ᒥ ᐃᓄᓕᕆᔨᑐᖃᒃᑯᑦ ᐅᑭᐅᖅᑕᖅᑐᒥ ᑲᒪᔨᐅᔪᓂ ᐃᖅᑲᓇᐃᔭᕆᐊᖅᖢᓂ. ᐊᔪᖅᓴᖅᑐᓕᕆᔨᒃᑯᖏᓐᓂ ᐃᖅᑲᓇᐃᔭᓚᐅᖅᓯᒪᔪᖅ, ᐊᒻᒪᓗ ᑲᒪᒋᔭᖃᖃᑦᑕᓚᐅᖅᖢᓂ ᐃᒡᓗᓕᕆᓂᕐᒥᒃ ᐊᒻᒪᓗ ᐊᓐᓂᐊᖃᕐᓇᓐᖏᑦᑐᓕᕆᓂᕐᒥᒃ, ᐃᓚᓕᐅᖢᒍ ᐅᑎᖅᑎᑕᐅᔭᕆᐊᓖᑦ ᐊᐅᓪᓚᖅᑎᑕᐅᓯᒪᔪᕕᓃᑦ ᓱᕈᓰᑦ ᐊᒻᒪᓗ ᐃᓐᓇᐃᑦ ᓄᓇᖏᓐᓄᑦ ᐅᑭᐅᖅᑕᖅᑐᒧᑦ. ᕚᓪᑐ ᐃᖅᑲᓇᐃᔭᓚᐅᖅᓯᒪᖕᒥᔪᖅ ᑐᓴᐅᒪᔾᔪᑎᖃᕈᓐᓇᖅᓯᓂᐊᕐᒪᑕ ᐋᓐᓂᕕᓕᐊᖅᓯᒪᔪᑦ ᖃᓪᓗᓈᑦ ᓄᓇᖓᓐᓄᑦ ᐊᒻᒪᓗ ᐃᓚᖏᑦ ᐅᑭᐅᖅᑕᖅᑐᒦᑦᑐᑦ. ᑐᓴᐅᒪᓐᖏᑦᑐᖅ ᕿᒻᒦᑦ ᑐᖁᓴᖅᑕᐅᖁᔭᐅᓚᐅᕐᓂᖏᓐᓂᒃ, ᑭᓯᐊᓂᓕ ᐊᕕᒃᑐᖅᓯᒪᔪᓂ ᐅᕝᕙᓘᓐᓃᑦ ᓄᓇᓕᖕᓂ ᑕᐃᒪᐃᑦᑐᒥᒃ ᑎᓕᐅᕈᑎᑕᖃᕋᓱᒋᓐᓈᓚᐅᖅᑐᖅ, ᐊᒻᒪᓗ ᓇᓗᓇᐃᖅᓯᓪᓗᓂ ᕿᒻᒦᑦ ᐃᐱᖅᓯᒪᓐᖏᑦᑐᑦ ᑲᒪᒋᔭᐅᓪᓗᐊᑕᕋᔭᕋᓱᒋᓪᓗᓂᒋᑦ ᐸᓖᓯᒃᑯᓐᓄᑦ. ᕚᓪᑐ ᐅᓂᒃᑳᓚᐅᕐᒥᔪᖅ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᕐᓂᒃ ᐊᒻᒪᓗ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦᑕ ᖃᓄᐃᓕᖓᖃᑦᑕᕐᓂᕕᓂᖏᓐᓂᒃ, ᐊᖓᔪᖅᑲᐅᓯᖅᓯᒪᓗᐊᖃᑦᑕᓚᐅᕐᓂᖏᓐᓂᒃ ᐊᒻᒪᓗ ᐃᓄᖕᓂᒃ ᐱᐅᒃᓴᖃᑦᑕᓚᐅᖅᓯᒪᓐᖏᓐᓂᖏᓐᓂᒃ. ᐅᖃᐅᓯᖃᓚᐅᕐᒥᔪᖅ ᖃᒪᓂᑦᑐᐊᕐᒧᐊᖅᑎᖅᑕᐅᓇᓱᓚᐅᖅᓯᒪᓂᖏᓐᓂᒃ ᐃᓄᐃᑦ ᐊᒻᒪᓗ ᐸᓖᓯᒃᑯᑦ ᖃᐅᔨᓴᓚᐅᓐᖏᓐᓂᖏᓐᓂᒃ ᑕᐃᑲᓂ ᖃᓄᐃᓐᓂᕕᓂᐅᓚᐅᖅᓯᒪᔪᓂᒃ. ᐅᖃᓚᐅᕐᒥᔪᖅ ᑲᓇᑕᒥᐅᑦ ᐃᓄᖕᓂᒃ ᓄᖑᑎᕆᓇᓱᓚᐅᖅᓯᒪᓂᖏᓐᓂᒃ 1952-ᒧᑦ ᑎᑭᖢᒍ, ᒐᕙᒪᒃᑯᑦ ᑕᐃᔅᓱᒪᓂ ᐋᖅᑭᒃᓱᐃᓯᒋᐊᓚᐅᖅᓯᒪᖕᒪᑕ ᐃᖅᑭᓕᖕᓄᑦ ᑐᕌᖓᔪᓂᒃ ᐊᑐᐊᒐᓂᒃ. ᐃᖅᑲᓇᐃᔭᕐᓂᕐᒥᓂ ᕚᓪᓗ ᐃᓄᓕᕆᔨᑐᖃᒃᑯᓐᓄᑦ ᐃᖅᑲᓇᐃᔭᖃᑦᑕᓚᐅᖅᓯᒪᖕᒥᔪᖅ.