ᐋᓚᓯ ᔫᒥ

QTIQ01IN

ᐋᓚᓯ ᔫᒥ ᐃᓅᓚᐅᖅᓯᒪᔪᖅ 1936-ᖑᑎᓪᓗᒍ, ᐳᕕᕐᓂᑐᕐᒥ, ᑯᐸᐃᖕᒥ. 1942-ᖑᓕᖅᑎᓪᓗᒍ, ᓅᓚᐅᖅᓯᒪᔪᑦ ᐊᑖᑕᖓ ᓄᒍᒪᓕᕐᒪᑦ ᐸᓐᓂᖅᑐᕐᒧᑦ, ᐅᒪᔪᓕᐊᓗᓂᖓᓄᑦ. ᐋᓚᓯ ᐃᖅᑲᐅᒪᑦᑎᐊᖅᑐᑦ ᓅᑕᐅᓯᑳᓪᓚᒃᑐᐊᓗᓚᐅᖅᓯᒪᓂᖏᓐᓂᒃ ᓯᕗᓂᐊᒍᑦ ᖃᐅᔨᒪᑎᑕᐅᖏᑦᑎᐊᖅᓱᑎᒃ ᓕᐊᖁᖑᓗᑦ. ᓄᓇᓕᕋᓛᖑᓂᖅᓴᒧᑦ ᐃᖃᓗᐃᑦ ᓯᓚᑕᓃᑦᑐᒧᑦ. ᑎᑭᓐᓇᒥᒃ, ᓈᒪᔪᓂᒃ ᐃᒡᓗᒃᓴᖃᖅᑎᑕᐅᓚᐅᖏᓚᑦ, ᖃᒻᒪᕐᒦᓕᓚᐅᖅᓯᒪᕗᑦ ᒪᕐᕉᖕᓂᒃ ᐊᕐᕌᒎᖕᓂᒃ ᓇᖕᒥᓂᖅ ᓴᓇᓯᒪᔭᖓᓂᒃ. ᐋᓕᓯ ᐅᓐᓂᕐᓗᒃᓴᓚᐅᖅᐳᖅ ᐃᓚᒌᒃᑐᑦ ᓅᑕᐅᔪᐊᓘᓚᐅᖅᓯᒪᖕᒪᑕ ᖃᒻᒪᖓᓂᒃ, ᓴᓗᒎᑎᓕᐊᓗᖕᒧᑦ ᓄᓇᓯᐅᒻᒧᑦ ᐲᔭᖅᑕᐅᓪᓗᓂ ᖃᒻᒪᖓᑦ. ᐊᓐᓂᐊᓯᐅᖅᑎᐅᔪᖅ ᐃᓱᐊᖅᓴᐃᔨᓗ ᐅᖃᓚᐅᖅᓯᒪᔫᒃ ᐋᓕᓯᒧᑦ ᖃᓂᒪᓇᕐᓂᕐᒧᑦ ᐅᓗᕆᐊᓇᕐᓂᖓᓂᒃ ᐊᒻᒪᓗ ᖃᓂᒻᒪᕕᐅᓕᕈᓐᓇᕐᓂᖓᓂᒃ ᓱᕈᓯᕐᓄᑦ. ᑭᖑᓂᐊᓂ ᐲᔭᖅᑕᐅᓚᐅᖅᑎᓪᓗᒍ ᖃᒻᒪᖓᑦ, ᓴᑭᒃᑐᒥᓂᓕᓚᐅᖅᑐᑦ ᑕᒪᕐᒥᒃ ᑕᐃᑲᓃᖏᓐᓇᓕᖅᓱᑎᒡᓗ ᑭᓯᐊᓂ ᐃᒡᓗᕋᓛᖅᑖᖅᑎᑕᐅᒐᒥᒃ ᐊᕐᓇᖒᔾᔪᑎᖑᐊᕈᓗᖕᓂᒃ, ᐅᖂᓴᐅᑎᖃᖏᑦᑐᒥᒃ, ᐃᓗᓕᖃᖏᑦᑐᒥᒃ. ᐋᓚᓯ ᐃᖅᑲᐅᒪᑦᑎᐊᖅᑐᖅ ᑐᖁᕋᖅᑕᐅᓚᐅᖅᓯᒪᓂᖏᓐᓂᒃ ᐅᐃᖓᑕ ᕿᒻᒥᖏᑦ, ᔫᓐ 1961−ᖑᑎᓪᓗᒍ, ᓂᐅᕕᕐᕕᐅᑉ ᓯᓚᑖᓂ, ᕿᒻᒦᑦ ᐱᑐᑦᑕᐅᓯᒪᕙᓚᐅᕐᒪᑕ ᑕᐅᕙᓂ ᑕᐃᔅᓱᒪᓂ. ᐸᓖᓯᐅᔪᖅ ᐃᓄᒡᓗ ᐃᑲᔪᖅᑎᖓ ᖁᑭᖅᓯᓚᐅᖅᓯᒪᔪᑦ ᐅᖃᖏᑦᑎᐊᖅᓱᑎᒃ ᓯᕗᓂᐊᒍᑦ. ᐋᓕᓯᐅᑉ ᐅᓂᒃᑳᖏᓐᓂ, ᑕᒪᓐᓇ ᐱᐅᖏᑦᑐᒻᒪᕆᐊᓗᖕᒥᒃ ᐊᒃᑐᐃᓂᖃᓚᐅᖅᑐᖅ ᐅᐃᒥᓂᒃ ᐃᕐᓂᒥᓂᒡᓗ, ᑕᐅᑐᓚᐅᖅᑐᒥᒃ, ᓄᖃᖅᑎᑦᑎᒍᓐᓇᓚᐅᖏᑦᑐᖅ. ᐅᓂᒃᑳᓚᐅᖅᑐᖅ ᖃᓄᖅ ᕿᒥᖃᕈᓐᓃᕋᒥᒃ ᐃᓕᖅᑯᓯᕐᒥᓂᒃ ᐊᑐᕈᓐᓇᐃᓕᑦᑎᐊᓚᐅᖅᑐᑦ ᐊᐅᓛᕈᓐᓇᓂᕐᒧᑦ ᐊᖑᓇᓱᒍᓐᓇᕐᓂᕐᒧᓪᓗ. ᐊᒻᒪᑦᑕᐅᖅ ᓱᓕ, ᐋᓚᓯ ᐃᖅᑲᐅᒪᑦᑎᐊᖅᑐᖅ ᐊᓯᐊᓂᒃᑕᐅᖅ ᕿᒻᒥᒥᒃ ᖁᑭᖅᑕᐅᔪᖃᓚᐅᖅᓯᒪᔪᒥᒃ ᐃᒡᓗᖓᑕ ᓯᓚᑎᑦᑎᐊᖓᓂ, ᐃᒡᓗᖓ ᓱᕋᖅᑕᐅᓪᓗᓂ ᖃᕐᔪᐊᓄᑦ. ᑕᑯᓗᒋᑦᑕᐅᖅ ᐅᓐᓂᕐᓗᒃᓯᒪᔭᖏᑦ ᓴᐃᑐᑭ ᔫᒥᐅᑉ, ᐋᓚᓯᐅᑉ ᐃᕐᓂᖓᑕ.