ᐹᓪ ᖁᐊᓴ

ᐹᓪ ᖁᐊᓴ ᐃᓅᓕᓚᐅᖅᓯᒪᕗᖅ ᐃᒡᓗᓕᐅᑉ ᖃᓂᒋᔮᓂ. ᐅᓂᒃᑲᐅᓯᒃᑯᑦ ᓇᓗᓇᐃᖅᓯᓂᕆᔭᖓ ᑐᓴᐅᓯᕐᓇᖅᐳᖅ ᐊᑐᕐᓂᕆᓚᐅᖅᑕᖓᓂᒃ ᖃᓪᓗᓈᓂ ᐳᕙᒡᓗᒃᑐᒃᑯᕕᖕᒦᓐᓂᕆᓚᐅᖅᑕᒥᓂᒃ ᐊᖓᔪᖅᑳᖏᒃᑕᓗ ᐊᑐᓚᐅᖅᑕᖓᓂᒃ ᐊᐅᓪᓚᖅᓯᒪᑎᓪᓗᒍ ᐃᓕᓐᓂᐊᕆᐊᖅᓯᒪᓪᓗᓂ. ᐊᖓᔪᖅᑳᖏᒃᑕ ᕿᒻᒥᖏᑦ ᑐᖁᕋᖅᑕᐅᓚᐅᖅᓯᒪᒐᓗᐊᖅᑐᑦ ᑭᓯᐊᓂᓕ ᐊᓈᓇᒥᓄᑦ ᑕᒪᓐᓇ ᐅᓂᒃᑲᐅᓯᕆᔭᐅᖁᔭᖓ ᑕᐃᑲᓃᓚᐅᙱᓐᓇᒥ. ᐊᕐᕌᒍᓪᓗᐊᒥ ᐳᕙᒡᓗᒃᑐᒃᑯᕕᖕᒦᓚᐅᖅᖢᓂ ᐅᑭᐅᑭᑦᑐᒻᒪᕆᑯᓘᓪᓗᓂ ᐃᓄᒃᑐᑦ ᐅᖃᕈᓐᓇᐃᕐᓕᕐᓚᓚᐅᖅᓯᒪᓂᕋᖅᑐᖅ. 1959ᕈᔪᖕᒥ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᖅ ᐊᖓᔪᖅᑳᖏᒃ ᐅᖃᐅᔾᔭᐅᓚᐅᖅᓯᒪᓐᓂᕐᒪᑎᒃ ᓄᑕᕋᖅᓯᐅᑕᐃᖅᑕᐅᓇᔭᕐᓂᕋᖅᑕᐅᓪᓗᑎᒃ ᕿᑐᕐᖓᖏᑦ ᐃᓕᓐᓂᐊᕆᐊᙱᑉᐸᑕ. ᐹᓪ ᐅᒃᐱᕆᔭᖃᖅᐳᖅ ᕿᒻᒦᔭᖅᑕᐅᓂᖅ, ᐃᓕᓐᓂᐊᕆᐊᖃᕐᓂᖅ, ᐊᒻᒪ ᓅᑎᑕᐅᓂᖅ ᓄᓇᓕᖕᓄᑦ ᐃᓚᒋᔭᐅᑐᐃᓐᓇᕆᐊᒃᓴᖏᓐᓂᒃ ᖃᓪᓗᓈᙳᖅᑎᑕᐅᓇᓱᖕᓂᕐᒧᑦ. ᐅᖃᐅᓯᖃᖅᖢᓂ ᔅᑏᕙᓐ ᕼᐋᐸᑉ ᒪᒥᐊᓐᓂᖃᕐᓂᕆᔭᖓ ᐃᓄᖕᓄᑦ ᓴᐱᕈᓐᓃᖅᐹᓪᓕᕈᑕᐅᓕᓚᐅᕆᐊᒃᓴᖓᓂᒃ ᐱᓇᔪᒃᑲᓐᓂᕆᐊᒃᓴᖅ, ᑭᓯᐊᓂᓗ ᒐᕙᒪᒃᑯᑦ ᐃᓄᖕᓂᒡᓗ ᐊᓪᓚᓂᒡᓗ ᐊᔾᔨᒌᒃᑎᑦᑎᓇᓱᖃᑦᑕᓪᓗᐊᙱᒻᒪᑕ ᐊᑐᖅᓯᒪᔭᖏᑦ ᐊᔾᔨᒌᖑᙱᒻᒪᑕ. ᑐᒃᓯᕋᖅᑕᖃᖅᐳᕐᓗ ᐃᓄᐃᓪᓗ ᐸᓖᓯᒃᑯᓪᓗ ᐃᓱᒪᒋᔪᓐᓃᕐᕕᒋᔭᖃᕐᓂᒃᑯᑦ ᑲᑎᓐᓂᖅᓴᐅᓂᖃᕋᓱᓪᓗᐊᕐᒪᑕ, ᐊᒻᒪ ᐸᓖᓯᒃᑯᑦ ᐃᓄᐃᑦ ᖃᓄᐃᓕᐅᕐᓂᖏᓐᓄᑦ ᐃᓚᓕᐅᑎᓯᒪᓂᖅᓴᐅᓇᓱᖃᑦᑕᓪᓗᐊᕐᓂᕋᖅᖢᓂᒋᑦ ᓲᕐᓗ ᐊᖑᓇᓱᒐᓱᖃᑕᐅᕙᒡᓗᑎᒃ.