ᐲᑕ ᑰᓂᓕᐅᓯ

QTCR36IN

ᐲᑕ ᑰᓂᓕᐅᓯ ᐱᕈᕐᓴᓚᐅᕐᑐᖅ ᕿᑭᖅᑕᖅᔪᐊᑉ ᖃᓂᒋᔮᓂ. ᐅᓂᒃᑳᒥᓂ ᐊᑐᖅᓯᒪᔭᒥᓂᒃ ᐃᖅᑲᐅᒪᑦᓯᓪᓗᓂ ᑕᒻᒫᕐᕕᒃᑯᑦ ᓰᑏᕼᐊᐅᒃᑯᑦ ᐅᒥᐊᕐᔪᐊᒃᑰᖃᑦᑕᕐᓂᒥᓂᖕᒥᓂᒃ ᐊᐅᓪᓚᕐᑎᑕᐅᓪᓗᓂᓗ ᕼᐋᒧᑕᐅᑉ ᐳᕙᓪᓗᒋᐊᕐᕕᖓᓄᑦ ᐃᓅᓕᓴᕐᑕᐅᔭᕐᑐᖅᑐᓂ ᐳᕙᓪᓗᒍᓐᓇᐃᕈᑎᑦᓴᖏᓐᓂᒃ. ᑕᐃᑦᓱᒪᓂ ᐊᕙᑎᑦ ᖁᓖᓪᓗ ᐊᕐᕌᒍᖃᕐᑐᓂ. ᐊᐅᓪᓚᕐᓯᒪᓂᕐᒥᓂ ᐳᕙᓪᓗᒧᑦ ᐃᓅᓕᓴᕐᑕᐅᔭᕐᑐᖅᓯᒪᓪᓗᓂ, ᐲᑕ ᐅᖃᓚᐅᕐᑐᖅ ᑲᓇᑕᐅᑉ ᐳᑭᖅᑕᓕᖏᓐᓄᑦ ᐸᓖᓯ ᓄᓕᐊᖓᓂᒃ ᓄᑦᑎᖅᑎᕆᓚᐅᕐᓯᒪᒻᒪᑦ ᑲᖏᖅᑐᒑᐱᒻᒧᑦ ᐊᓪᓛᓘᓐᓃᑦ ᐱᖁᑎᒥᓂᒃ ᓇᑦᓴᕈᓐᓇᕐᓯᓚᐅᓐᖏᑦᑐᖅ ᕿᒪᑐᐃᓐᓇᕐᑐᒋᑦ. ᐅᖃᐅᔾᔭᐅᓪᓗᓂ ᓅᑦᑕᕆᐊᖃᓕᕐᖓᑕ ᕿᑐᕐᖓᖏᑦ ᐃᓕᓐᓂᐊᕆᐊᕐᓂᐊᓕᕐᒪᑕ. ᐲᑕᐅᑉ ᓄᓕᐊᓂ ᖁᕕᐊᓱᓐᖏᑦᑐᒻᒪᕆᐅᓐᓂᕐᑐᓂ ᐅᑎᖅᑐᓂᓗ ᓄᓇᒋᓚᐅᕐᑕᒥᓄᑦ. ᐃᓚᒌᑦ ᓅᑦᑕᓯᓐᓇᓕᓚᐅᕐᑑᒐᓗᐊᑦ ᑭᖑᓂᐊᒍᑦ ᑲᖏᖅᑐᒑᐱᒻᒧᑦ ᐃᓪᓗᖃᕐᓂᖅᓴᐅᓕᕐᖓᑦ. ᐲᑕ ᐊᑐᖅᑕᒥᓂᕐᖕᒥᓂᒃ ᐅᓂᒃᑳᖅᑐᖅ ᓇᖕᒥᓂᖅ ᕿᒻᒥᖏᑦ ᖁᑭᖅᓴᕐᑕᐅᓚᐅᕐᖓᑕ ᑲᓇᑕᐅᑉ ᐳᑭᖅᑕᓕᖏᑕ ᐸᓖᓯᖏᓐᓄᑦ. ᐲᑕ ᐅᓂᒃᑳᕐᑐᓂ ᖃᐅᔨᑎᑕᐅᒐᑎᒃ ᐅᖃᐅᔾᔭᐅᖅᑳᖏᑦᓯᐊᕐᑐᑎᒃ ᑕᒫᓂᕐᕆᓂᖏᑦ ᕿᒻᒦᑦ ᖁᑭᐊᔭᐅᓂᐊᕐᖓᑕ. ᐅᖃᖅᑐᓂ ᖃᓄᑐᐃᓐᓇᖅ ᐅᓂᒃᑳᖅᑐᖃᖃᑦᑕᖅᐸᑦ ᕿᒻᒦᑦ ᑐᖁᕋᕐᑕᐅᔪᒥᓂᐅᒋᐊᖏᑦ ᐋᓐᓂᐊᒧᑦ ᓯᐊᒻᒪᔭᒃᑐᒧᓪᓘᓐᓃᑦ ᐋᓐᓂᐊᓂᖏᓐᓄᑦ ᓱᓕᓐᖏᑦᓯᐊᕐᑐᑦ. ᐲᑕ ᐅᖃᐅᓯᖃᖅᑐᓂ ᖃᓄᑎᒋ ᕿᒻᒥᖏᑦ ᖁᑭᐊᔭᐅᓚᐅᕐᑎᓪᓗᒋᑦ ᖃᓄᐃᓕᖓᓕᓚᐅᕐᒪᖔᑦ ᐃᓅᓯᕐᖕᒥᓂ. ᐆᒪᔪᕋᓲᑎᖃᕈᓐᓃᕐᑐᓂ ᐱᐅᓯᑐᖃᖅᑎᒍᑦ ᐊᓐᓇᐅᒪᔾᔪᑎᓂᒃ ᐊᒻᒪ ᓱᒃᑯᐋᓘᔪᕆᓕᕐᑐᓂ ᐊᑑᑎᖃᓐᖏᑦᑑᔪᕆᓕᕐᑐᓂᓗ.