ᕿᑭᖅᑕᓂᒃᑯᑦ ᖁᕕᐊᓱᒍᑎᖃᖅᐳᑦ ᑯᐸᐃᒃ ᒐᕙᒪᒃᑯᖏᑦ ᐃᓕᓴᖅᓯᓂᖃᖅᑎᓪᓗᒋᑦ ᓄᓇᕕᖕᒥ ᕿᒻᒦᔭᖅᑕᐅᓯᒪᓂᕐᒥᒃ

ᐃᖃᓗᐃᑦ, ᓄᓇᕗᑦ  - ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᓴᖅᓯᕗᑦ ᐱᒻᒪᕆᐅᓂᖓᓂᒃ ᑯᐸᐃᒃ ᒐᕙᒪᒃᑯᑦ ᒪᒥᐊᓐᓂᖏᓐᓂᒃ ᕿᒻᒦᔭᖅᑕᐅᓚᐅᖅᓯᒪᓂᕐᓂᖏᓐᓂᒃ ᓄᓇᕕᖕᒥᐅᑦ ᐸᓖᓯᒃᑯᓐᓄᑦ ᐊᒻᒪ ᒐᕙᒪᖏᓐᓄᑦ 1950 ᐊᒻᒪ 1960 ᐊᕐᕌᒍᖏᑕ ᐊᑯᓐᓂᖓᓂ. ᑲᐸᐃᒃ ᐊᖓᔪᖅᑳᖓ, ᔮᓐ

ᓴᕋᐃ ᒪᒥᐊᓐᓂᖏᓐᓂᒃ ᓇᓗᓇᐃᖅᓯᓚᐅᖅᐳᖅ ᑕᒪᑐᒧᖓ ᑲᖏᖅᓱᐊᓗᔾᔪᐊᕐᒥᒃ.

“ᑕᒪᓐᓇ ᓯᕗᒧᒍᑎᑦᑎᐊᕙᐅᕗᖅ ᐋᖅᑭᒃᓱᐃᓂᕐᒥᒃ ᐃᓅᖃᑎᒌᑦᑎᐊᕐᓂᕐᒧᑦ ᑕᑎᒍᓱᖕᓂᕐᒥ ᐃᓄᐃᑦ ᓄᓇᓕᖏᓐᓂᑦ ᓄᓇᕕᖕᒥ ᐊᒻᒪ ᒐᕙᒪᖏᓐᓄᑦ,” ᐅᖃᓚᐅᖅᐳᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐅᑲᓕᖅ ᐃᔨᑦᓯᐊᖅ.

ᑲᓇᑕᐅᑉ ᐱᓖᓯᒃᑯᖏᑦ ᖃᐅᔨᓇᓱᓚᐅᖅᐳᑦ ᓇᒻᒥᓂᖅ ᕿᒻᒦᔭᖅᑕᐅᖃᑦᑕᖅᓯᒪᓂᕋᖅᑐᓂᒃ 2006-ᒥ ᐊᒻᒪ ᓇᒻᒥᓂᖅ ᐸᓯᔭᒃᓴᐅᓐᖏᓐᓂᕋᓚᐅᖅᐳᑦ ᐱᓂᕐᓗᓚᐅᖅᓯᒪᓐᖏᓐᓂᕋᖅᑐᑎᒃ ᐊᒻᒪ ᕿᒻᒦᔭᐃᓂᖅ ᓄᓇᓕᖕᓄᑦ ᐊᑦᑕᕐᓇᖅᑕᐃᓕᒪᔪᕕᓂᐅᓂᕋᖅᑐᒍ. ᑕᐃᒫᒃ ᐅᖃᓚᐅᖅᑎᓪᓗᒋᑦ ᐃᖅᑲᖅᑐᐃᔨ ᔮᓐ-ᔮᒃ ᑯᕉᑐ
ᐅᓂᒃᑳᓕᐅᓚᐅᖅᐳᖅ 2010-ᒥ ᒐᕙᒪᑐᖃᒃᑯᒡᒎᖅ ᕿᒻᒦᔭᐅᔪᕕᓂᐅᓂᕋᖅᑐᒋᑦ ᐊᒥᓱᐊᓗᖕᓂᒃ ᐃᓄᐃᑦ ᓅᑕᐅᖁᓪᓗᒋᑦ ᓄᓇᓕᐅᓕᖅᑐᓄᑦ ᓄᓇᕕᖕᒥ.

2007-ᒥ, ᕿᑭᖅᑕᓂᒃᑯᑦ ᐱᒋᐊᖅᑎᑦᑎᓚᐅᖅᐳᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂᒃ ᕿᒥᕐᕈᓇᖁᓪᓗᒋᑦ ᕿᒻᒦᔭᖅᑕᐅᖃᑦᑕᖅᓯᒪᓂᕐᒥᒃ ᐊᒻᒪ ᐊᓯᖏᓐᓂᒃ ᐃᓄᖕᓂᒃ ᒐᕙᒪᑐᖃᒃᑯᑦ ᐱᓂᕐᓗᒃᓯᒪᓂᖏᓐᓂᒃ. ᑖᔅᓱᒪ ᑭᓪᓕᓯᓂᐊᕐᓂᐅᑉ ᐱᔾᔪᑎᒋᓪᓗᐊᑕᓚᐅᖅᑕᖓ ᒪᒥᓴᕈᓐᓇᖁᓪᓗᒋᑦ ᐃᓄᐃᑦ ᐊᒃᓱᕈᖅᑎᑕᐅᓯᒪᓂᖏᓐᓄᑦ, ᐊᒻᒪ ᐋᖅᑭᒋᐊᖅᐹᓪᓕᖁᓪᓗᒍ ᐃᓅᖃᑎᒌᑦᑎᐊᕐᓂᖏᑦ ᐃᓄᐃᑦ ᐊᒻᒪ ᒐᕙᒪᒃᑯᑦ. ᑖᒃᑯᐊ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᓕᐅᓚᐅᖅᐳᑦ ᑲᓇᑕᐅᑉ ᐊᑐᖃᑦᑕᖅᓯᒪᓂᖏᓐᓂᒃ ᐃᓄᐃᑦ ᐅᓂᒃᑳᕐᓂᖏᒍᑦ ᕿᑭᖅᑖᓗᖕᒥᐅᓄᑦ ᓄᓇᕗᒻᒥ.

“ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ ᕿᒥᕐᕈᓇᒃᑕᐅᓚᐅᖅᑐᑦ ᐊᖏᓂᖅᓴᐅᓚᐅᖅᐳᑦ ᕿᒻᒦᔭᖅᑕᐅᖃᑦᑕᕐᓂᕕᓂᕐᒥᒃ ᐊᒻᒪ ᐱᖃᓯᐅᔾᔨᓚᐅᖅᐳᖅ ᐃᓕᓐᓂᐊᕐᓂᓕᕆᓂᕐᒥᒃ, ᓅᑎᑕᐅᖃᑦᑕᖅᓯᒪᔪᓂᒃ, ᐃᓪᓗᓕᕆᓂᕐᒥᒃ, ᐋᓐᓂᐊᑦᑕᐃᓕᒪᔪᓕᕆᓂᕐᒥᒃ, ᐃᖅᑲᖅᑐᐃᓂᓕᕆᓂᕐᒥᒃ ᐊᒻᒪ ᐊᓯᖏᓐᓂᒃ ᐃᓄᖕᓄᑦ ᐊᑐᖅᑕᐅᖃᑦᑕᖅᓯᒪᔪᓂᒃ. ᐃᓄᐃᑦ ᓱᓕᔪᒥᒃ ᐅᖃᐅᓯᕆᖃᑦᑕᖅᓯᒪᔭᖏᑦ ᐃᓕᓴᕆᔭᐅᔭᕆᐊᖃᖅᐳᑦ ᒐᕙᒪᑐᖃᒃᑯᓐᓄᑦ ᒪᒥᓴᕐᓂᖅ ᐱᒋᐊᕈᓐᓇᖁᓪᓗᒍ ᓄᓇᓕᑦᑎᓐᓂ,” ᐅᖃᓚᐅᖅᐳᖅ ᐃᔨᑦᓯᐊᖅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᔭᕇᖅᓯᕋᑖᓚᐅᖅᐳᑦ ᐊᑐᓕᖅᑎᓐᓂᐊᖅᑕᖏᓐᓂᒃ ᐱᖁᔭᐅᓚᐅᖅᑐᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ ᐅᓂᒃᑳᓕᐊᕆᓚᐅᖅᑕᖏᓐᓂᑦ ᐊᒻᒪ ᑭᐅᔭᐅᔪᒪᓂᐊᖅᐳᑦ ᒐᕙᒪᓕᒫᓄᑦ ᓄᓇᕗᒻᒥ ᐃᓂᖃᖅᑐᓄᑦ.

- 30 -

ᑐᑭᓯᒋᐊᕐᕕᒃᓴ ᐅᕗᖓ:

ᑕᐃᕕᑎ ᔪᐊᓇᓯ
ᐱᕙᓪᓕᐊᔪᓂᑦ ᑐᓴᐅᒪᑎᑦᓯᔨ
ᐅᖄᓚᐅᑎᖓ: (867) 975 8414
ᓱᒃᑲᑦᑐᒃᑰᕈᑎᖓ: (867) 979 3238
ᖃᕆᓴᐅᔭᒃᑯᑦ ᑐᕌᕈᑎᖓ: media@qia.ca