ᐸᐅᓗᓯ ᑲᐅᒡᔭᒃ

ᐸᐅᓗᓯ ᑲᐅᒡᔭᒃ ᐃᓅᓕᓚᐅᖅᓯᒪᕗᖅ 1941ᒥ. ᐃᒃᐱᐊᕐᔪᖕᒥᐅᑕᐅᕗᖅ. ᐅᓂᒃᑲᐅᓯᒃᑯᑦ ᓇᓗᓇᐃᖅᓯᓂᕆᔭᒥᓂ ᑐᓴᐅᓯᖅᓯᕗᖅ ᐊᖓᔪᖅᑳᒥ ᓅᑕᐅᓂᕆᓚᐅᖅᑕᖓᓂᒃ ᑭᙵᕐᓂᑦ ᐃᒃᐱᐊᕐᔪᖕᒧᑦ. ᐃᖅᑲᐅᒪᕗᖅ ᐊᖓᔪᖅᑳᒥᓄᑦ ᐅᖃᐅᔾᔭᐅᖃᑦᑕᓚᐅᕐᓂᕐᒥᓂ ᐊᑯᓂᐊᓗᒃ ᓂᕆᐅᓚᐅᖅᓯᒪᔭᕆᐊᒃᓴᖅ ᑭᙵᕐᓄᑦ ᐅᑎᖅᑎᑕᐅᓛᕋᔭᕆᐊᒃᓴᖅ, ᑭᓯᐊᓂ ᑕᐃᒪᓐᓇᐅᔭᐅᓚᖅᙱᓚᑦ. ᐸᐅᓗᓯ ᑐᓴᐅᓯᖅᓯᒋᕗᖅ ᐊᐅᓪᓚᐅᒪᑎᑕᐅᓪᓗᓂ ᖃᓪᓗᓈᓄᑦ ᐃᓕᓐᓂᐊᕆᐊᖅᓯᒪᑎᑕᐅᓚᐅᖅᓯᒪᓂᕐᒥᓂ ᐊᑯᓂᐊᓗᒃ ᖃᓪᓗᓈᓃᓚᐅᖅᖢᓂ ᐃᓚᒥᓂᒃ ᑐᓴᙱᔅᓲᔭᖅᖢᓂ ᑲᑎᑦᑐᓐᓇᓕᑕᐃᓐᓇᖅᖢᓂᒋᑦ ᑭᓯᐊᓂ ᐊᖏᕐᕋᐅᔪᓐᓇᖅᓯᓕᑕᐃᓐᓇᕋᒥ.