ᐊᐱᖅᑯᑎᑦ ᐊᒻᒪᓗ ᑭᐅᔾᔪᑎᑦ

ᕿᑭᖅᑕᓂ, ᐅᐊᑦᑎᐊᕈ ᖃᐅᔨᒪᔭᐅᕙᔪᔪᖅ ᐃᒪᒃ ᕿᑭᖅᑖᓗᒃ, ᑲᓇᓐᓇᕐᐸᓯᖓᓃᓐᓂᕐᐹᖅ ᐊᒻᒪᓗ ᐃᓄᒋᐊᕐᓂᕐᓴᐃᑦ ᑕᒫᓂ ᓄᓇᖃᖅᑐᑎᒃ ᓄᓇᕗᒥ. ᓇᑉᐸᖏᑦ 17,000 ᓄᓇᖃᖅᑐᑎᒃ ᐃᓪᓗᒐᓴᓕᕐᔪᐊᖃᕐᕕᑐᐊᕐᒥ, ᐃᖃᓗᓐᓂ, ᐊᒻᒪᓗ ᐊᓯᖏᑦ 12 Hᐊᒪᓚᐅᔪᓂᑦ ᓄᓇᖃᖅᑐᑎᒃ. ᑕᒪᕐᒥᒃ 13 ᓄᓇᓖᑦ ᓄᓇᓕᒡᒍᑏᑦ ᑎᓂᑉᐸᑦᑐᒥᒃ ᐅᓕᖃᑦᑕᖅᑐᒥᒃ ᐃᒪᐅᑉ ᖃᓂᒋᔮᓂ, ᐱᓗᐊᖅᑐᒥ ᕿᑭᖅᑖᓗᒃ ᐅᕝᕙᓘᓐᓃᑦ ᕿᑭᖅᑕᕋᓛᖑᓂᕐᓴᐃᑦ ᖃᓂᒋᔭᖓᓃᑦᑐᑦ. ᐃᓄᔅᓯᐅᑏᑦ ᓂᕿᒋᔭᐅᕙᑦᑐᑦ ᓄᓇᖓᓐᓂ ᒪᑯᓇᙵᑦ ᐱᑕᖃᐅᑦᑎᐊᖅᑐᑎᓪᓗ ᑐᑦᑐᐃᑦ, ᓇᑦᑏᑦ ᐃᖃᓗᐃᑦ, ᒪᑯᐊᓗ ᕿᓚᓗᒐᐃᑦ, ᐊᐃᕖᑦ ᓇᓄᐃᓪᓗ. ᐊᔾᔨᒌᑦᑐᐃᓐᓇᐸᓘᓪᓗᑎᓪᓗ ᐅᖃᐅᓯᖏᑦ ᐃᓄᒃᑎᑐᑦ ᐊᑐᖅᑕᐅᕕᐅᑎᑉᐸᑦᑐᑎᒃ ᓄᓇᖓᓐᓂ. 

ᑕᒫᓂ 12,000ᖏᓐᓃᑦᑐᑦ ᐃᓄᐃᑦ ᓄᓇᓖᑦ ᕿᑭᖅᑕᓂ 13ᓂᑦ ᓄᓇᓕᓐᓂᑦ ᐊᒥᓲᓂᖏᑦ ᐊᔾᔨᒌᙱᑐᒡᒍᑕᐅᓪᓗᑎᒃ ᑕᒫᓂ ᐃᖃᓗᓐᓂ (ᓄᓇᓖᑦ 6,085 – 50%ᖑᓪᓗᑎᒃ ᐃᓄᐃᑦ) ᐊᐅᓱᐃᑦᑐᕐᒥ (ᓄᓇᓖᑦ 140 – 86%ᖑᓪᓗᑎᒃ ᐃᓄᐃᑦ).  ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᐃᕙᑦᑐᑦ ᐃᓄᓐᓂᑦ ᓄᓇᓕᓐᓂᑦ ᑕᒪᓂ. ᑕᒪᕐᒥᒃ ᐃᓄᐃᑦ ᑭᕙᓪᓕᕐᒥᐅᓪᓗ ᕿᑎᕐᒥᐅᓪᓗ, ᓄᓇᑖᖃᑕᐅᓯᒪᔪᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᑎᒍᑦ. ᐃᓚᖏᑦ ᕿᑭᖅᑕᓂ ᐃᓄᐃᑦ ᐃᓚᖃᐅᕐᒥᔪᑦ ᓄᓇᕕᒻᒥᐅᓂᑦ ᐃᓄᓐᓄᑦ ᑯᐸᐃᒻᒥ. 

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (ᑭᓪᓕᓯᓂᐊᖅᑏᑦ ᐋᖅᑭᑦᑕᐅᓂᑯᐃᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ (ᕿᑭᖅᑕᓂᒃᑯᓐᓂ) ᐅᑐᐱᕆ 2007ᒥ. ᕿᑭᖅᑕᓂᒃᑯᑦ ᐊᐅᓚᑦᑎᓲᑦ ᐃᓄᓐᓄᑦ−ᓄᓇᖁᑎᒋᔭᐅᔪᓂᑦ ᐊᒻᒪᓗ ᐱᓇᓱᐊᕋᔅᓴᖃᖅᑎᑕᐅᓪᓗᑎᒃ ᓴᐳᔾᔨᓂᕐᒥᒃ ᐊᑐᖅᑎᑦᑎᒋᐊᒃᑲᓂᕐᓂᕐᒥᓪᓗ ᐱᔪᓐᓇᐅᑎᖏᓐᓂᒃ ᐱᔪᒐᕆᔭᖏᓐᓂᓪᓗ ᐃᓄᐃᑦ ᕿᑭᖅᑕᓂ, ᖁᑦᑎᑦᑐᒥ ᓴᓂᑭᓗᐊᕐᓗ ᕿᑭᖅᑕᖏᓐᓂ. ᓴᖅᑮᓚᐅᕐᓯᒪᔪᑦ ᑭᓪᓕᓯᓂᐊᖅᑎᓂᑦ ᖃᐅᔨᓴᖁᓪᓗᒋᑦ ᐱᓪᓚᑦᑖᓂᑦ, ᐊᐱᕐᓱᖃᑦᑕᖁᓪᓗᒋᓪᓗ ᖃᐅᔨᓯᒪᔪᓂᑦ, ᐃᓄᓕᒫᖅᑎᑦᑎᓗᑎᒃ ᓈᓚᓐᓂᖃᖃᑦᑕᖁᓪᓗᒋᑦ ᐊᒻᒪᓗ ᐅᓂᒃᑳᓕᐅᖁᓪᓗᒋᑦ−ᐃᓚᒋᔭᐅᔪᓂᑦ ᕿᑭᖅᑕᓂᒃᑯᓐᓄᑦ ᐊᒻᒪᓗ ᑭᒃᑯᑐᐃᓐᓇᕐᓂᑦ−ᓱᓕᔪᓂᑦ ᐱᔾᔪᑎᓕᓐᓂᑦ ᑕᒪᒃᑯᓂᖓ ᕿᒻᒦᔭᖅᑕᐅᓚᐅᕐᓯᒪᔪᓂᑦ, ᐊᐅᓪᓛᖅᑎᑕᐅᓚᐅᕐᓯᒪᔪᓂᑦ ᐊᒻᒪᓗ ᐊᓯᖏᓐᓂᒃ ᑐᑭᑖᕈᑎᒋᕙᑦᑕᒥᓂᖏᓐᓂᒃ ᑲᓇᑕᒥᐅᑦ ᒐᕙᒪᒃᑯᖏᑕ 1975ᒧᑦ ᑎᑭᑦᑐᒍ, ᐊᒻᒪᓗ ᐃᓱᒪᔅᓴᕐᓯᐅᕈᑎᖃᕐᓂᐊᕋᒥᒃ ᐊᑑᑎᓯᒪᓂᖏᓐᓂᒃ ᑐᑭᑖᕈᑕᐅᕙᑦᑐᒥᓃᑦ ᐃᓄᐃᑦ ᐃᓕᖅᑯᓯᖓᓐᓄᑦ, ᒪᑭᒪᓇᓱᐊᕈᑎᖏᓐᓄᑦ ᐊᒻᒪᓗ ᐃᓅᓯᖏᓐᓄᑦ.  

ᑭᓪᓕᓯᓂᐊᖅᑏᑦ ᖃᐅᔨᓴᔪᙱᑦᑐᑦ ᖁᑦᑎᑦᑐᒧᑦ ᐊᐅᓪᓛᖅᑕᐅᓂᑯᓂᑦ, ᐃᓕᓐᓂᐊᕆᐊᖅᑎᑕᐅᕙᑦᑐᒥᓂᕐᓂᑦ ᐅᕝᕙᓘᓐᓃᑦ ᐱᔾᔪᑎᓕᓐᓂᑦ ᐊᓯᖏᓐᓂᒃ.

ᑭᓪᓕᓯᓂᐊᖅᑏᑦ ᓯᕗᓪᓕᕐᐹᖑᓪᓗᑎᒃ ᐃᓄᓐᓄᑦ−ᐃᑲᔪᖅᑕᐅᓪᓗᑎᒃ ᐊᒻᒪᓗ ᐃᓄᓐᓄᑦ−ᓯᕗᓕᖅᑕᐅᓪᓗᑎᒃ ᐊᐅᓚᔾᔭᐃᒋᐊᕈᑎᖃᔪᔪᑦ ᑕᐃᒫᒃ. ᑖᓐᓇ ᐊᔾᔨᒋᔭᐅᙱᑦᑐᒥᒃ ᑐᑭᓕᐅᑎᔭᔅᓴᐅᒻᒥᔪᖅ ᑕᒪᐃᓐᓅᖓᔪᓂᑦ ᐃᓅᓯᓕᕆᓂᕐᒧᑦ ᒪᓕᒐᖅᑎᒍᑦ ᑐᑭᓯᓇᓱᐊᕈᑕᐅᔪᒻᒪᑦ ᓯᕗᓕᖅᑕᐅᓪᓗᓂ ᓄᓇᖃᖅᑳᕐᓯᒪᔪᓄᑦ ᑲᑐᔾᔨᖃᑎᒌᓄᑦ.

ᐊᕐᕌᒍᒐᓵᓗᓐᓂᑦ, ᑲᓇᑕᒥᐅᑦ ᒐᕙᒪᒃᑯᖏᑦ ᕿᐱᓗᖃᑦᑕᕐᓯᒪᒻᒪᑕ ᐃᓄᐃᑦ ᖃᐅᔨᓴᖃᑦᑕᖁᔨᓯᒪᑎᓪᓗᒋᑦ ᐃᓄᓕᒫᓂᑦ ᕿᒻᒦᔭᖅᑕᐅᓚᐅᕐᓯᒪᓂᖏᓐᓂᒃ ᐊᒻᒪᓗ ᐊᐅᓪᓛᖅᑎᑕᐅᓚᐅᕐᓯᒪᓂᖏᓐᓂᒃ ᐃᓄᐃᑦ ᓄᓇᒋᕙᑦᑕᒥᓂᖏᓐᓂᒃ ᑲᑎᑕᐅᓪᓗᑎᒃ ᓄᓇᓕᒡᒍᑎᐅᑎᑕᐅᓕᖅᑐᑎᒃ ᐊᒻᒪᓗ ᐊᕕᑦᑐᕐᓯᒪᐅᓕᖅᑐᑎᒃ. ᐊᑯᓐᓂᖏᓐᓂ 1950 ᐊᒻᒪ 1975, ᑕᒪᒃᑯᐊ ᐊᓯᔾᔨᕐᓂᐅᔪᑦ ᐊᓯᔾᔨᕈᑕᐅᓪᓚᕆᓚᐅᕐᓯᒪᒻᒪᑕ ᖃᐅᑕᒫᑦ ᐃᓅᓯᕆᕙᑦᑕᖏᓐᓂ ᐃᓄᐃᑦ. ᖃᐅᔨᒋᐊᕈᑎᖃᖔᕋᑎᒃ, ᒐᕙᒪᒃᑯᑦ ᑎᓕᓯᓚᐅᕐᓯᒪᒻᒪᑕ ᑲᓇᑕᒥᐅᑦ ᐸᓖᓯᒃᑯᖏᓐᓂᒃ (ᐸᓖᓯᒃᑯᑦ) ᑕᒪᒃᑯᓂᖓ ᐸᓯᑦᑎᒍᑕᐅᔪᓂᑦ ᖃᐅᔨᒋᐊᖁᓪᓗᒋᑦ ᐊᒻᒪᓗ ᑐᓴᖅᑎᑦᑎᓛᖁᓪᓗᒋᑦ ᒪᓕᒐᓕᐅᕐᕕᔾᔪᐊᕐᒧᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᓅᒻᒥᓪᓚᕆᓚᐅᕐᓯᒪᔪᑦ ᐸᓖᓯᒃᑯᑦ ᐅᓂᒃᑳᖏᑦ ᐱᔾᔪᑎᒋᓪᓗᒋᑦ, ᕿᐱᓗᐊᓯᒪᓚᐅᕐᓯᒪᒻᒪᑕ ᐃᓄᐃᑦ ᓱᖅᑯᐃᒋᔭᖏᓐᓂᒃ ᐊᒻᒪᓗ ᐃᑉᐱᒍᓱᑦᑎᐊᖏᓐᓂᖃᓚᐅᕐᓯᒪᒻᒪᑕ ᐃᓄᓐᓂᑦ ᐃᓄᑐᖃᕐᓂᑦ. ᐱᓗᐊᖅᑐᒥᓪᓗ, ᕿᑭᖅᑕᓂᒃᑯᑦ ᐅᑉᐱᕈᓱᓚᐅᕐᓯᒪᔪᑦ ᐸᓖᓯᒃᑯᑦ ᐅᓂᒃᑳᖏᑦ ᐱᕕᖃᕐᓂᖏᓐᓂ ᐊᑐᙲᓐᓇᓚᐅᕐᓂᖏᓐᓂᒃ ᓴᐃᒻᒪᖃᑎᒌᑎᑦᑎᓂᕐᒥᒃ ᐃᓄᓐᓂᑦ ᒐᕙᒪᒃᑯᓂᓪᓗ ᐊᐅᓚᑦᑎᔨᐅᔪᓂᑦ. ᑖᒃᑯᐊ ᐱᔾᔪᑎᒋᓪᓗᒋᑦ, ᑲᑐᔾᔨᖃᑎᒌᒃᑯᑦ ᑐᑭᑖᕈᑎᖃᓕᓚᐅᕐᓯᒪᔪᑦ ᓇᒻᒥᓂᖅ ᐋᖅᑮᔪᒪᓕᖅᑐᑎᒃ ᑭᓪᓕᓯᓂᐊᖅᑕᒋᓂᐊᖅᑕᖏᓐᓂᒃ.  

ᑐᖏᓕᐊᓂ ᐅᓇᑕᕕᔾᔪᐊᖅᑐᖃᓚᐅᕐᓯᒪᒻᒪᓂᑦ, ᑲᓇᑕᒥᐅᑦ ᒐᕙᒪᒃᑯᖏᑦ ᐱᒋᐊᖅᑎᑦᑎᓯᒪᒻᒪᑕ ᐃᓅᓯᕐᒧᑦ, ᒪᑭᒪᓇᓱᐊᕈᑎᓄᑦ ᐃᓕᖅᑯᓯᕐᒧᓪᓗ ᐊᓯᔾᔨᕈᑕᐅᓯᒪᔪᓂᑦ ᐅᑭᐅᖅᑕᖅᑐᒥ ᐊᕗᖔᓗᒃ, ᓈᒻᒪᖏᑦᑐᓂᓪᓗ ᓱᓕᓗ ᐊᑦᑐᐊᓂᖃᖅᑐᓂᑦ ᐃᓅᓯᖏᓐᓄᑦ ᕿᑭᖅᑕᓂ ᐃᓄᓐᓄᑦ. ᐊᒥᓱᕐᔪᐊᕌᓗᐃᑦ ᑕᒪᒃᑯᐊ ᑐᑭᑖᕈᑕᐅᖃᑦᑕᕐᓯᒪᔪᑦ ᑐᑭᓯᒋᐊᕐᕕᖃᖃᑦᑕᕋᑎᒃ ᐃᓄᓐᓂᑦ ᐊᒻᒪᓗ ᐊᑑᑎᑎᑦᑎᓯᒪᓂᖏᑦ ᓱᓕ ᐃᑉᐱᒋᔭᐅᖃᑦᑕᕐᖓᑕ ᐅᓪᓗᒥ.

ᑐᕌᒐᓪᓗᐊᑕᕆᔪᔭᖓᑦ ᑭᓪᓕᓯᓂᐊᖅᑏᑦ, ᑕᐃᒪᐃᒻᒪᑦ, ᖃᐅᔨᒪᑦᑎᐊᕈᑕᐅᓂᐊᕐᖓᑦ ᑎᑎᕋᖅᑕᐅᑦᑎᐊᕐᓯᒪᓂᕐᓴᐅᓗᑎᒃ ᑕᐃᔅᓱᒪᓂ ᐊᑐᖅᑕᐅᓚᐅᕐᓯᒪᔪᑦ ᐊᒻᒪᓗ ᐊᑑᑎᓂᒥᓂᖏᑦ, ᑕᑯᓯᒪᔭᖏᑎᒍᑦ ᕿᑭᖅᑕᓂ ᐃᓄᐃᑦ. ᐃᖅᑲᓇᐃᔮᕆᔪᔭᖏᑦ ᑭᓪᓕᓯᓂᐊᖅᑏᑦ ᐅᕙᑦᑎᓐᓄᓕᒫᖅ ᑕᑯᑎᑦᑎᒻᒪᑕ−ᐃᓄᓐᓄᑦ ᐊᓯᖏᓐᓄᓪᓗ ᑲᓇᑕᒥᐅᓕᒫᓄᑦ−ᑐᙵᕕᖃᖅᑐᓂᑦ ᓱᓕᔪᕐᓇᖅᑐᓂᑦ, ᐃᓕᖅᑯᓯᖅᑎᒍᑦ ᑕᐃᔅᓱᒪᓂ ᖃᐅᔨᒪᔭᐅᔪᓂᑦ ᑐᙵᕕᒋᔪᓐᓇᑕᑦᑎᓐᓂᒃ ᐃᑲᔫᑎᖃᕐᓂᐊᕐᖓᑕ ᓴᐃᒻᒪᕈᑎᖃᕐᓂᕐᒧᑦ ᑕᐃᔅᓱᒪᓂ ᑕᒻᒪᕈᑕᐅᓯᒪᔪᓂᑦ.  

ᓯᕕᑐᓂᕐᓴᒥᓪᓕ ᓱᓕᔪᕐᓂᐊᕐᓂᖅ ᓴᐃᒻᒪᖃᑎᒌᖁᔨᓂᕐᒧᓪᓗ ᐱᓕᕆᒍᑕᐅᔪᖅ ᐊᑐᖅᑎᑦᑎᒋᐊᒃᑲᓐᓂᕈᑕᐅᒍᒪᕗᖅ ᒪᒥᓴᐃᓂᕐᒥᒃ ᐃᓱᒪᒋᔪᓐᓇᐃᕐᓯᓂᕐᒥᓪᓗ ᑕᐃᒃᑯᓄᖓ ᐊᔅᓱᕈᖅᑎᑕᐅᓯᒪᔪᓄᑦ ᑕᐃᔅᓱᒪᓂ ᑕᒻᒪᕈᑕᐅᓚᐅᕐᓯᒪᔪᓄᑦ, ᐊᒻᒪᓗ ᐋᖅᑭᑦᑕᐅᖁᓪᓗᒍ ᐃᓅᖃᑎᒌᒍᓐᓇᕐᓂᖓᑦ ᐃᓄᐃᑦ ᒐᕙᒪᒃᑯᓪᓗ. ᐃᓄᒃᑎᑐᑦ ᑕᐃᓗᒍ, ᕿᑭᖅᑕᓂ ᐃᓄᐃᑦ ᐱᓇᓱᐊᕈᑎᓖᑦ ᓴᐃᒻᒪᖃᑎᒌᓐᓂᕐᒥᒃ: ᓴᐃᒻᒪᖃᑎᖃᕐᓂᕐᒥᒃ ᑕᐃᔅᓱᒪᓂ ᐊᑭᓕᒥᓂᖏᓐᓂᒃ.

ᐱᓗᐊᓗᖅᑐᒥ, ᑭᓪᓕᓯᓂᐊᖅᑏᑦ ᓂᕆᐅᑦᑐᑦ ᖃᐅᔨᒍᑎᖏᑦ ᐊᑐᓕᖁᔨᔾᔪᑎᖏᓪᓗ ᐱᔪᓐᓇᕐᓯᒍᑕᐅᓂᐊᕆᐊᖏᑕ ᐃᓄᓐᓄᑦ ᐋᖅᑭᔅᓱᐃᓂᕐᒧᑦ ᓯᕗᓂᔅᓴᑎᓐᓄᑦ ᐊᑐᕈᒥᓇᕐᓂᕐᓴᓂᑦ ᐃᒻᒥᓐᓄᑦ. ᐃᓕᓴᕆᔭᐅᔭᕆᐊᖃᕐᓂᖓ ᐋᓐᓂᐊᑎᑕᐅᓚᐅᕐᓯᒪᓂᖏᓐᓂᒃ ᐃᓄᐃᑦ ᐱᔾᔪᑎᒋᓪᓗᒋᑦ ᒥᔅᓯᖃᙱᑦᑐᒥᒃ ᒐᕙᒪᒃᑯᑦ ᑐᑭᑖᕈᑎᖃᖃᑦᑕᓚᐅᕐᓯᒪᓂᖏᑦ ᐱᒻᒪᕆᐅᖃᑕᐅᒻᒪᑦ ᐊᑐᕆᐊᖃᕐᓂᐊᑎᓪᓗᒋᑦ ᓴᐃᒻᒪᕈᑎᖃᕐᓂᕐᒧᑦ/ᒪᒥᑎᑦᑎᓂᕐᒧᑦ ᐊᑐᓂᑦ ᐃᐱᓐᓂᕈᑕᐅᓯᒪᔪᓂᑦ, ᐋᖅᑭᒍᑕᐅᓗᓂ ᑐᑭᓯᓂᕐᓗᒍᑕᐅᓯᒪᔪᒥᓂᕐᓂᑦ ᐊᒻᒪᓗ ᐃᓱᒪᒋᔪᓐᓇᐃᕐᓯᒍᒪᓂᕐᒥᒃ ᐃᓚᒌᒡᒍᑎᓂᑦ ᐊᒻᒪᓗ ᐃᓕᖅᑯᓯᖃᖃᑎᒌᙱᑦᑐᓂᑦ.  

ᑕᐃᒪᙵᑦ ᐱᒋᐊᖅᑎᑕᐅᓚᐅᕐᓯᒪᒻᒪᑕᓂᑦ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (ᑭᓪᓕᓯᓂᐊᖅᑏᑦ) ᑲᑎᕐᓱᐃᔪᒻᒪᑕ ᓱᓕᔪᕐᓇᖅᑐᓂᑦ ᓄᐊᑕᐅᓯᒪᔪᓂᑦ ᑕᐃᔅᓱᒪᓂᓴᕐᓂᑦ ᑎᑎᖅᑲᓂᑦ ᐊᒻᒪᓗ ᐊᐱᕐᓱᓚᐅᕐᓯᒪᔪᑦ Hᐊᓐᓇᓚᖏᓐᓃᑦᑐᓂᑦ ᖃᐅᔨᓯᒪᔪᓂᑦ ᐃᓄᓕᒫᖅᑎᑦᑎᕙᑦᑐᑎᒃ ᓈᓚᓐᓂᖃᖃᑦᑕᖅᑐᑎᒃ ᓱᓕᔪᓂᑦ ᑐᓴᕐᓂᐊᕋᒥᒃ ᑕᐃᔅᓱᒪᓂ 1950ᒥ 1975ᒧᑦ ᐊᑐᖅᑕᒥᓂᕐᓂᑦ,  ᐱᒻᒪᕆᐊᓘᓪᓗᓂ ᑕᒪᓐᓇ ᐊᓯᔾᔨᐸᓪᓕᐊᓂᒃᑰᓚᐅᕐᓯᒪᒻᒪᑕ ᕿᑭᖅᑕᓂ.

ᖃᐅᔨᓴᕈᑎᒋᔪᔭᕗᑦ ᒪᕐᕉᓐᓂᒃ ᖃᓂᒌᓪᓚᕆᑦᑑᓐᓂᒃ ᐱᓕᕆᓂᐅᓯᒪᔫᓐᓂᒃ:         

  • ᓯᕗᓪᓕᖅ ᓄᐊᑦᑎᓪᓗᑕ ᐅᓂᒃᑳᓂᑦ ᖃᓄᐃᓕᐅᕈᑕᐅᓯᒪᔪᓂᑦ 1950 1975ᓗ ᐊᑯᓐᓂᖓᓂ ᐃᓄᓐᓂᑦ ᐃᓅᔪᒥᓂᕐᓂᑦ ᑕᒪᐅᓇ ᐱᔭᕆᐊᑐᔪᐊᓗᒃᑯᑦ, ᐊᒻᒪᓗᑦᑕᐅᖅ ᕿᑐᕐᖓᖏᑦ, ᓱᓕ ᐃᖅᑲᐅᒪᑦᑎᕙᑦᑐᑦ ᐊᔅᓱᕈᓚᐅᕐᓯᒪᓂᖏᓐᓂᒃ ᐊᖏᔪᖅᑳᖏᑕ ᐃᓚᖏᑕᓗ.  
  • ᐊᐃᑉᐹᓂ ᑲᒪᒋᔭᖃᕆᐊᖃᔪᔪᑦ ᐃᑦᑕᕐᓂᓴᕐᓂᑦ ᖃᐅᔨᓴᕐᓂᕐᒥᑦ ᐊᒻᒪᓗ ᐊᐱᕐᓱᖃᑦᑕᕐᓗᑎᒃ ᖃᓪᓗᓈᕐᓂᑦ ᐃᖅᑲᓇᐃᔭᕐᓯᒪᔪᓂᑦ ᕿᑭᖅᑕᓂ ᑖᒃᑯᐊ ᐊᕐᕌᒍᑦ ᐊᑐᖅᑎᓪᓗᒋᑦ. ᐊᐱᕐᓱᖃᑦᑕᔪᔪᑦ ᖃᐅᔨᓴᕐᓂᕐᒥ ᒪᑯᐊ ᐊᐱᕐᓱᖅᑕᐅᖃᓯᐅᑎᓪᓗᑎᒃ ᐊᒥᓱᑲᓪᓚᐃᑦ ᓄᖅᑲᖓᓕᖅᑐᑦ ᐸᓖᓯᒥᓃᑦ, ᒐᕙᒪᒃᑯᓐᓂ ᐃᖅᑲᓇᐃᔭᖅᑎᒥᓃᑦ ᐊᒻᒪᓗ ᐃᓕᓴᕕᓐᓂᑦ ᖃᐅᔨᓴᖅᑎᒥᓃᑦ. 

ᑭᓪᓕᓯᓂᐊᖅᑏᑦ ᑕᑯᔭᖅᑐᖃᑦᑕᔪᔪᑦ ᑭᒃᑯᑐᐃᓐᓇᕐᓅᖓᔪᓂᑦ, ᓇᒻᒥᓂᓕᓐᓂᑦ ᐊᒻᒪᓗ ᓇᒻᒥᓂᖅ ᐱᖁᑎᒋᔭᐅᔪᓂᑦ ᐃᑦᑕᕐᓂᓴᖃᕐᕕᓐᓂᑦ ᓇᒥᓕᒫᖅ ᑲᓇᑕᒥ, ᓇᓂᓯᖃᑦᑕᔪᔪᑦ ᑎᑎᖅᑲᓂᑦ ᑕᑯᔾᔪᑕᐅᔪᔪᑦ ᖃᓄᐃᓕᐅᕈᑕᐅᕙᑦᑐᒥᓂᕐᓂᑦ ᖃᐅᔨᓴᕈᑎᖏᓐᓂᒃ ᑭᓪᓕᓯᓂᐊᖅᑎᒃᑯᑦ. ᐃᑦᑕᕐᓂᓴᓕᕆᔩᑦ ᐃᖅᑲᓇᐃᔭᔪᔪᑦ ᑭᓪᓕᓯᓂᐊᖅᑎᓄᑦ ᑕᑯᔪᓐᓇᕐᓯᔪᔪᑦ ᐃᑦᑕᕐᓂᓴᕐᓂᑦ ᑎᑎᖅᑲᓂᑦ ᐅᖃᓕᒫᒐᖃᕐᕕᖏᓐᓂ ᐃᑦᑕᕐᓂᓴᖃᕐᕕᖏᓐᓂᓪᓗ ᑲᓇᑕᐅᑉ, ᓄᓇᑦᓯᐊᕐᒥ ᐃᑦᑕᕐᓂᓴᖃᕐᕕᓐᓂᑦ, ᐸᓖᓯᒃᑯᑦ ᑎᑎᖅᑲᖁᑎᖃᕐᕕᖓᓐᓂ, ᓂᐅᕕᖅᑎᒃᑯᑦ Hᐊᑦᓴᓐ ᐸᐃ ᐃᑦᑕᕐᓂᓴᖁᑎᖏᓐᓂᒃ, ᓯᒥᔅᓲᓂᐊᓐ ᐃᑦᑕᕐᓂᓴᖃᕐᕕᖏᓐᓂᒃ, ᐋᖓᓕᒃᑲᒃᑯᑦ ᑐᔅᓯᐊᕐᕕᓕᕆᔩᑦ ᐃᑦᑕᕐᓂᓴᖃᕐᕕᖏᓐᓂᒃ, ᐊᑐᕆ ᑲᓇᑕᒥ ᑐᖅᑲᑕᕐᕕᒻᒥ ᐊᒻᒪᓗ ᐃᑦᑕᕐᓂᓴᕐᓂᑦ ᑎᓴᑕᓚᐃᒥ. ᓇᒻᒥᓂᖁᑎᒋᔭᐅᔪᑦ ᐃᑦᑕᕐᓂᓴᐃᑦ ᑭᒃᑯᑐᐃᓐᓇᕐᓄᑦ, ᓲᕐᓗ ᕗᕋᐃᔭᓐ ᐱᐅᓴᓐ, ᐊᒻᒪᓗᑦᑕᐅᖅ ᐅᖃᓕᒫᒐᖃᕐᕕᓐᓂᑦ ᓇᒥᑐᐃᓐᓇᖅ ᑲᓇᑕᒥ, ᐱᖃᓯᐅᑎᓪᓗᒍ ᓄᓇᕗᒥ ᐃᖅᑲᖅᑐᐃᕕᒃ, ᑐᑭᓯᒋᐊᕐᕕᐅᔪᒻᒥᔪᑦ ᖃᐅᔨᓴᕐᓂᖏᓐᓂ.   

ᐊᒥᓲᓂᖏᑦ ᑎᑎᖅᑲᐃᑦ ᑎᑎᕋᖅᑕᐅᓯᒪᔪᑦ ᐅᑭᐅᖅᑕᖅᑐᖅ, ᐃᓄᖏᑦ ᐊᐅᓚᑦᑎᓂᕐᓗ ᐱᔾᔪᑎᒋᓪᓗᒍ ᐊᔾᔨᒌᙱᑐᒡᒍᑏᑦ. ᑭᓪᓕᓯᓂᐊᖅᑏᑦ ᐃᑦᑕᕐᓂᓴᓕᕆᔨᖏᑦ ᐱᔾᔪᑎᖃᓗᐊᔪᔪᑦ ᑎᑎᖅᑲᓂᑦ ᑕᐃᒃᑯᓂᖓ ᐊᕐᕌᒍᓂᑦ ᐱᔾᔪᑎᒋᔪᔭᖏᓐᓂᓪᓗ ᖃᐅᔨᓴᕈᑎᖏᓐᓂ. ᐊᒻᒪᓗᑦᑕᐅᖅ, ᑭᓪᓕᓯᓂᐊᖅᑏᑦ ᐊᐱᕐᓱᔪᔪᑦ ᐱᒻᒪᕆᐅᓂᕐᐹᓂᑦ ᒫᓐᓇ ᐃᓕᓴᐃᔨᐅᖃᑦᑕᕐᓯᒪᔪᓂᑦ ᒪᑯᓂᖓ 1900ᖏᓐᓂ ᐃᓄᐃᑦ ᒥᔅᓵᓄᑦ ᐊᑐᖅᑕᐅᖃᑦᑕᕐᓯᒪᔪᓂᑦ ᐊᒻᒪᓗ ᐱᐅᓯᕆᔭᐅᓯᒪᔪᓂᑦ, ᐅᑯᓂᖓ Hᐃᐅ ᕗᕉᑎ, ᒥᐅᓪᑕᓐ ᒪ.ᕋ. ᕗᕇᒪᓐ, ᔮᓐ ᒪᒃᑖᓄᑦ, ᕗᕋᓐᒃ ᔪ. ᑕᔅᑐ, ᔪᐊᔾ ᐅ. ᐅᐃᓐᓱᓪ, ᐊᒻᒪ ᕌᕗᑦ ᔪ. ᐅᐃᓕᐊᒻᓴᓐ. ᒪᕐᕉᒃ ᐃᓕᓴᐃᔨᐅᓯᒪᔫᒃ−ᑕᐃᕕᑎ ᑭᖕ ᐊᒻᒪᓗ ᕗᕌᓐᓯᔅ ᓚᕙᒃ−ᐃᑲᔪᓪᓚᕆᓚᐅᕐᓯᒪᔫᒃ ᑭᓪᓕᓯᓂᐊᖅᑎᓂᑦ ᐱᔾᔪᑕᐅᔪᑦ ᐱᔾᔪᑎᒋᓪᓗᒋᑦ ᖃᐅᔨᒪᓪᓗᐊᑕᖅᑕᖏᓐᓂᒃ (ᐃᓕᓐᓂᐊᖅᑎᑕᐅᖃᑦᑕᕐᓂᖏᓐᓂᒃ ᐃᓄᐃᑦ ᐊᒻᒪᓗ ᕿᒻᒦᑦ ᑐᖁᕋᖅᑕᐅᓚᐅᕐᓯᒪᓂᖏᓐᓂᒃ, ᑖᒃᑯᐊ ᐱᔾᔪᑎᒋᓗᐊᖅᑐᒋᒃ).

ᐃᓄᐃᑦ ᐃᓕᖅᑯᓯᖓᓐᓂ, ᐱᒻᒪᕆᐅᔪᑦ ᑕᐃᔅᓱᒪᓂᓴᐃᑦ, ᒪᓕᒐᓕᕆᓂᕐᒨᖓᔪᓂᑦ ᐊᕙᑎᓕᕆᓂᕐᒨᖓᔪᓪᓗ ᑐᑭᓯᐅᒪᔾᔪᑎᔅᓴᐃᑦ ᐱᓯᒪᔭᐅᑦᑎᐊᕐᓯᒪᐃᓐᓇᕐᖓᑕ ᓱᖅᑯᐃᒋᔭᖏᑎᒍᑦ ᐊᒻᒪᓗ ᑭᖑᕚᖏᓐᓄᑦ ᖃᐅᔨᒪᑎᑦᑎᒍᑕᐅᖏᓐᓇᕐᓯᒪᓪᓗᑎᒃ. ᒫᓐᓇᕋᑖᖅ, ᑲᓇᑕᒥᐅᑦ ᐃᖅᑲᖅᑐᐃᕕᖏᑦ ᐊᑑᑎᖃᕐᓂᖏᓐᓂᒃ ᐱᒻᒪᕆᐅᑎᑦᑎᖃᑦᑕᕐᓯᒪᓕᕐᖓᑕ ᑕᒪᒃᑯᐊ ᖃᐅᔨᒍᑕᐅᖃᑦᑕᕐᓯᒪᔪᑦ ᑕᐃᒫᔅᓴᐃᓐᓇᖅ ᑎᑎᕋᖅᑕᐅᓯᒪᕙᑦᑐᑎᑐᑦ ᐃᓕᓴᕆᔭᐅᓯᒪᓪᓗᑎᒃ ᑎᑎᖅᑲᖁᑏᑦ. ᑕᒪᓐᓇ ᐅᖃᐅᓯᕆᒐᓗᐊᖅᑐᒍ, ᐃᓚᖏᑦ ᖃᓪᓗᓈᑦ ᖃᐅᔨᓴᖅᑐᓕᕆᔩᑦ, ᐊᐅᓚᑦᑎᔩᑦ ᐊᒻᒪᓗ ᑭᒃᑯᑐᐃᓐᓇᐃᑦ ᒪᓕᒐᓕᕆᔾᔪᓯᕐᒥ ᓱᓕ ᑲᖐᓱᒍᑎᖃᖃᑦᑕᖅᑯᑦ. ᓱᓕ ᐃᓱᒪᒋᔭᖃᕐᐸᑦᑐᑦ ᐅᖃᐅᓯᒃᑯᑦ ᐅᖃᐅᓯᐅᓯᒪᔪᓂᑦ ᐱᔪᓐᓇᕐᓂᖃᙱᓂᕐᓴᐅᓱᒋᑦᑎᕙᑦᑐᑦ ᑎᑎᕋᕐᓯᒪᔪᑦ ᓴᓂᐊᓂ.

ᐃᓄᓐᓄᑦ−ᓯᕗᓕᖅᑕᐅᓪᓗᓂ ᐊᐅᓚᔾᔭᐃᒋᐊᕈᑕᐅᓯᒪᔪᖅ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᑕᒪᑐᒥᖓ ᐃᓚᐃᓐᓈᕐᕕᖃᕐᓯᒪᙱᑦᑐᑦ. ᓄᐊᑦᑎᓂᐊᕋᒥᒃ ᐱᓪᓚᑦᑖᖑᓯᒪᔪᓂᑦ ᑐᑭᓯᔭᕆᐊᓕᖏᓐᓂᒃ ᓱᓕᓂᖏᑦ ᓴᖅᑭᓂᐊᕐᖓᑕ ᐊᒻᒪᓗ ᓯᕗᒧᐊᑉᐸᓪᓕᐊᓂᐊᕐᖓᑕ ᓴᐃᒻᒪᖃᑎᒌᓐᓂᕐᒧᑦ, ᑭᓪᓕᓯᓂᐊᖅᑏᑦ ᑲᑎᑎᑦᑎᓚᐅᕐᓯᒪᔪᑦ 345ᓂᑦ ᐅᓂᒃᑳᖑᓯᒪᔪᓂᑦ ᐃᓄᓐᓄᑦ ᖃᓪᓗᓈᕐᓄᓪᓗ, ᑕᒪᒃᑮᓐᓂᒃ ᐃᓄᓕᒫᖅᑎᑎᓪᓗᑎᒃ ᓈᓚᒍᑎᒋᓯᒪᔭᖏᓐᓂᒃ ᐊᒻᒪᓗ ᐃᓄᑑᖃᑎᖃᖅᑐᑎᒃ ᓈᓚᒍᑎᒋᓯᒪᔭᖏᓐᓂᒃ. ᓂᐱᓕᐅᕆᖃᑦᑕᔪᔪᑦ ᑕᒪᒃᑯᓂᖓ ᐅᓂᒃᑳᖑᖃᑦᑕᔪᔪᓂᑦ ᓂᐱᔅᓴᑎᒍᑦ ᑕᕐᕆᔮᔅᓴᑎᒍᓪᓗ; ᕿᒥᕐᕈᔭᐅᖃᑦᑕᔪᔪᑦ ᓇᓗᓇᐃᔭᕐᓯᒪᑦᑎᐊᕐᓂᖏᑦ ᖃᐅᔨᒃᑲᐃᒍᑎᖃᕐᓂᐊᕋᒥᒃ ᖃᐅᔨᓯᒪᔭᖏᓐᓂᒃ; ᑕᐃᓗᐊᙳᐊᖃᑦᑕᕐᓯᒪᓪᓗᒋᓪᓗ ᐃᖅᑲᓇᐃᔮᖏᓐᓂ; ᐊᒻᒪᓗ ᐊᑐᓕᖁᔨᔾᔪᑎᓕᐊᕆᓯᒪᔭᖏᑦ ᒪᓕᔪᔪᑦ ᐃᓱᒪᑐᓂᕐᒥᒃ ᓴᖅᑭᔮᖅᑎᓯᒪᔭᖏᓐᓂᒃ ᐅᖃᐅᓯᒥᓂᖏᓐᓂᒃ.

ᑭᓪᓕᓯᓂᐊᖅᑏᑦ ᓇᐃᓈᕐᓯᒪᓪᓗᑎᑦ ᑎᑎᕋᕐᓯᒪᒻᒪᑕ ᐊᑐᓂᑦ ᐅᓂᒃᑳᖃᑦᑕᕐᓯᒪᔪᓂᑦ ᐃᓄᓕᒫᖅᑎᑎᓪᓗᑎᒃ ᓈᓚᓐᓂᕆᖃᑦᑕᔪᔭᖏᓐᓂ: ᑖᒃᑯᐊ ᓇᐃᓈᕐᓯᒪᓪᓗᑎᒃ ᑎᑎᕋᕐᓯᒪᔪᑦ ᑕᑯᔭᔅᓴᐃᑦ ᓈᓚᒍᑕᐅᓯᒪᔪᓂᑦ ᐊᐱᕐᓱᕈᑕᐅᓯᒪᔪᓂᓪᓗ ᖃᕋᓴᐅᔭᒃᑯᑦ ᐃᑭᐊᖅᑭᕕᒻᒥ.

ᐅᖃᐅᓯᐅᖃᑦᑕᕐᓯᒪᔪᓪᓗ ᓇᒥᑐᐃᓐᓈᑐᒡᒍᑎᐅᓪᓗᑎᒃ ᑕᕝᕙᓂ ᐃᑭᐊᖅᑭᕕᒻᒥ ᐊᒻᒪᓗ ᑭᓪᓕᓯᓂᐊᖅᑏᑦ ᐅᓂᒃᑳᖏᑦ.  

ᐊᐱᕐᓱᕐᓂᕆᔪᔭᑦᑎᓐᓂ ᖃᐅᔨᓴᕐᓂᑎᓐᓂᓪᓗ ᖃᐅᔨᓚᐅᖅᑐᒍᑦ ᐊᑕᐅᓯᑐᐊᑯᓗᒃ ᓱᓕᔪᖅ ᓇᓗᓇᐃᕐᓯᔾᔮᖏᒻᒪᑦ ᐊᓯᔾᔨᕐᓂᐅᓯᒪᔪᓂᑦ ᕿᑭᖅᑕᓂ ᐃᓄᓐᓂᑦ ᐊᑐᖅᑕᐅᓯᒪᔪᓂᑦ 1950ᒥ 1975ᒧᑦ; ᐱᔭᕆᐊᑭᒐᑎᓪᓗ ᖃᐅᔨᓇᓱᓪᓗᒋᑦ ᐱᕋᔭᐃᑦ ᐱᕋᔭᑕᐅᓯᒪᔪᓪᓗ. ᑕᐃᔅᓱᒪᓂ ᓄᓇᒋᙱᑕᖏᓐᓅᖅᑕᐅᓂᑰᒻᒪᑕ ᕿᑐᕐᖓᕇᒡᒍᑏᑦ, ᐃᓪᓗᔅᓴᑕᖃᕐᓯᒪᒐᓂ ᓈᒻᒪᑦᑐᓂᑦ, ᓲᖑᔫᓯᒪᓪᓗᑎᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᒋᔭᐅᓯᒪᔪᑦ, ᐳᕙᓪᓗᓐᓇᐅᓚᐅᕐᓯᒪᓪᓗᓂ ᓇᒥᓕᒫᖅ, ᐃᓕᓐᓂᐊᕆᐊᖅᑎᑕᐅᕙᑦᑐᒥᓂᐅᓪᓗᑎᒃ ᐃᓕᓐᓂᐊᕐᕕᓐᓄᑦ ᐊᒻᒪᓗ ᑐᖁᕋᖅᑕᒥᓂᐅᓪᓗᑎᒃ ᕿᒻᒦᑦ, ᐅᕝᕙᓗᑭᐊᖅ ᕿᒧᔅᓰᑦ. ᑭᓯᐊᓂ ᑕᐃᔅᓱᒪᓂᑦᑕᐅᖅ ᐊᑐᖅᑕᐅᓂᑰᒻᒥᔪᑦ ᐱᓇᓱᐊᕋᔅᓴᖅᑖᕐᓂᕐᓴᐅᓪᓗᑎᒃ, ᓄᑖᓂᑦ ᐃᓅᓯᓕᕆᓂᕐᒧᑦ ᐃᑲᔫᑎᔅᓴᖅᑕᖃᓕᖅᑐᓂ ᐊᒻᒪᓗ ᑲᑐᔾᔨᓪᓗᑎᒃ−ᒥᔅᓯᖃᙱᑦᑐᒥᒃ ᓈᒻᒪᖏᑦᑐᒥᓪᓗ−ᐱᓇᓱᐊᕈᑎᖃᖃᑦᑕᕐᓯᒪᓪᓗᑎᒃ ᑲᑎᑎᑦᑎᒐᓱᓐᓂᕐᒥᒃ ᒪᕐᕉᓐᓂᒃ ᐊᔾᔨᒌᙱᓪᓚᕆᑦᑑᓐᓂᒃ ᐃᓕᖅᑯᓰᓐᓂᒃ: ᐅᑭᐅᖅᑕᖅᑐᒥᐅᑦ ᓯᕿᓂᕐᒥᐅᓪᓗ, ᐃᓄᐃᓪᓗ ᖃᓪᓗᓈᓪᓗ. 

ᖃᐅᔨᒍᑎᒋᓯᒪᔭᖏᑦ ᐱᒻᒪᕆᐅᓂᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓇᐃᓈᕐᓯᒪᓪᓗᑎᒃ ᑎᑎᕋᕐᓯᒪᔪᑦ ᑖᒃᑯᓇᓂ ᑕᐃᒎᓯᖃᐅᖅᑐᒡᒍᑎᓂᑦ ᐃᒫᒃ:

  • ᐊᓯᔾᔨᐸᓪᓕᐊᓂᒥᓂᖏᑦ: ᒐᕙᒪᒃᑯᑦ ᐃᓄᐃᓪᓗ
  • ᐃᓄᐃᑦ ᓄᓇᒋᕙᒃᑕᓐᓂ ᓄᓇᖃᖃᑦᑕᓚᐅᖅᑐᑎᒃ  ᐊᕐᕌᒍᓕᒫᖅ ᑕᕝᕙᓂᔅᓴᐃᓐᓇᖅ ᓄᓇᖃᖃᑦᑕᓕᖅᑐᑎᒃ
  • ᓄᓇᓕᓐᓂᑦ ᐃᓪᓗᓕᕆᓂᖅ
  • ᓄᓇᓕᓐᓂᑦ ᐃᓅᓯᖅ ᐊᒻᒪᓗ ᐋᖓᔮᕐᓇᖅᑐᑦ
  • ᐃᓕᓐᓂᐊᕐᓂᖅ ᐊᒻᒪᓗ ᐊᑑᑎᓯᒪᓂᖏᑦ ᐃᓄᐃᑦ ᐃᓕᖅᑯᓯᖓᓐᓄᑦ
  • ᐊᖑᓇᓱᖃᑦᑕᕐᓂᖅ
  • ᑐᖁᕋᖅᑕᐅᓂᖏᑦ ᕿᒻᒦᑦ
  • ᑭᓪᓕᓯᓂᐊᖅᑏᑦ ᕿᒥᕐᕈᓂᖏᑦ ᐸᓖᓯᒃᑯᑦ ᐊᒻᒪᓗ ᐃᓄᐃᑦ ᕿᒧᔅᓯᖏᑕ ᒥᔅᓵᓄᑦ (2006) ᐅᓂᒃᑳᖏᓐᓂᒃ
  • ᐋᓐᓂᐊᖅᑐᓕᕆᓂᖅ ᐊᒻᒪᓗ ᐊᕕᑎᑕᐅᓂᖏᑦ ᐅᕝᕙᓘᓐᓃᑦ ᐊᓯᐅᔨᓂᖏᑦ ᐃᓚᖏᓐᓂᒃ
  • ᐱᕙᓪᓕᐊᑎᑦᑎᓂᖅ ᐊᒻᒪᓗ ᐃᖅᑲᓇᐃᔭᕐᓂᖅ
  • ᐃᓕᖅᑯᓯᖃᖃᑎᒌᙱᑦᑐᑦ ᑐᑭᓯᐅᒪᖃᑦᑕᐅᑎᖃᑦᑕᕐᓂᖏᑦ

ᐊᓯᔾᔨᐸᓪᓕᐊᓂᒥᓂᖏᑦ: ᒐᕙᒪᒃᑯᑦ ᐃᓄᐃᓪᓗ

  • ᑲᓇᑕᒥᐅᑦ ᒐᕙᒪᒃᑯᖏᑦ ᐱᓕᕆᔨᓪᓗᐊᑕᐅᓯᒪᒻᒪᑕ ᐊᓯᔾᔨᐸᓪᓕᐊᓂᖏᓐᓂᒃ ᕿᑭᖅᑕᓂ 1950 1975ᓗ ᐊᑯᓐᓂᖏᓐᓂ.
  • ᒐᕙᒪᒃᑯᑦ ᐊᑐᐊᒐᖃᓚᐅᕐᓯᒪᒻᒪᑕ ᐅᑭᐅᖅᑕᖅᑐᒥ ᖃᓪᓗᓈᓂᒥᐅᑎᑐᑦ ᐱᐅᕐᓯᖅᑖᖁᓪᓗᒋᑦ ᐊᒻᒪᓗ ᐃᓄᐃᑦ ᖃᓪᓗᓈᑦ ᓄᓇᖓᓐᓂᒥᐅᑎᑐᑦ ᑲᓇᑕᒥᐅᑎᑐᑦ ᐱᐅᓯᖅᑖᖁᓪᓗᒋᑦ.
  • ᐊᓯᔾᔩᕙᓪᓕᐊᓂᒥᓂᖏᑦ ᐃᓄᓐᓄᑦ ᑕᒪᑐᒥᖓ ᑲᔪᓯᑎᑦᑎᕙᓪᓕᐊᓪᓗᑎᒃ ᑐᕌᒐᖓᓐᓂᒃ ᓱᒃᑲᓕᔪᐊᓘᓯᒪᔪᖅ ᐊᒻᒪᓗ ᐊᑐᓯᑳᓪᓚᔅᓯᒪᓪᓗᓂ ᖁᐊᕐᓵᓇᖅᑐᒥᒃ.
  • ᑕᒪᓐᓇ ᐱᕙᓪᓕᐊᕌᕐᔪᓯᒪᙱᒻᒪᑦ ᐱᐅᓯᕆᕙᓚᐅᖅᑕᖏᓐᓂᒃ ᒪᓐᓇᓕᓴᐅᓕᖅᑐᖅ ᐃᓅᓯᕆᓕᖅᑕᑎᓐᓄᑦ: ᐊᔾᔨᒋᙱᓪᓚᕆᑦᑕᖓᓂᒃ ᓄᑖᕐᒧᑦ ᐊᓯᔾᔨᕐᓂᐅᓚᐅᖅᑐᖅ.
  • ᑕᒪᕐᒥᓕᒫᐸᓗᒃ ᐃᖅᑲᓇᐃᔭᖅᑏᑦ ᐅᑉᐱᕆᔭᖃᕐᓯᒪᔪᑦ ᐱᓂᐊᕐᓂᖃᕐᓯᒪᒋᐊᔅᓴᖅ ᐊᑲᐅᓂᕐᐹᖑᓱᒋᔭᖏᓐᓂᒃ ᐃᓄᓐᓄᑦ, ᑭᓯᐊᓂᓕ ᓱᓪᓕᑕᐅᕗᖅ ᐱᓂᐊᕐᓂᖃᖃᑦᑕᕐᓯᒪᒻᒪᑕ ᓇᒻᒥᓂᑐᐊᖅ ᐃᓱᒪᒋᓪᓗᑎᒃ, ᐃᖅᑲᓇᐃᔭᕐᕕᖏᓐᓂᓪᓗ, ᐊᒻᒪᓗ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.
  • ᑐᑭᓯᒋᐊᕐᕕᖃᕐᓂᖏᑦᑐᓘᓐᓃᑦ ᐃᓄᓐᓂᑦ ᐋᖅᑭᔅᓱᐃᓕᕋᒥᒃ ᑲᔪᓯᑎᑦᑎᕙᓪᓕᐊᓕᕋᒥᓪᓗ ᐸᕐᓇᐅᑎᓕᐊᕆᓯᒪᔭᖏᓐᓂᒃ: ᐊᒥᓱᑦ ᐃᓄᐃᑦ ᑐᑭᓯᓚᐅᕐᓯᒪᔪᙱᑦᑐᑦ ᓱᒻᒪᑦ ᑕᒪᒃᑯᓂᖓ ᐊᑐᖅᑎᑕᐅᒋᐊᖃᓯᒻᒪᖔᑕ, ᐊᒻᒪᓗ ᕿᓚᒥᐊᓗᒃ ᑕᒪᓐᓇ ᑕᐃᒪᐃᓯᒪᓪᓗᓂ.
  • ᐱᓕᕆᐊᑦ ᐊᐅᓚᑕᐅᑲᒻᒪᒐᔪᖃᑦᑕᕐᓯᒪᓪᓗᑎᒃ ᐅᕝᕙᓘᓐᓃᑦ ᑮᓇᐅᔭᖃᖅᑎᑕᐅᙱᓗᐊᖃᑦᑕᕐᓯᒪᓪᓗᑎᒃ.
  • ᒐᕙᒪᒃᑯᑦ ᐱᓕᕆᔨᖏᑦ ᑲᒪᒋᔭᓖᑦ ᑕᒪᑐᒥᖓ ᐊᓯᔾᔨᑎᑦᑎᑳᓪᓚᓐᓂᐅᔪᒥᒃ−ᐱᓗᐊᖅᑐᒥ ᐊᓪᓚᓄᑦ ᐅᑭᐅᖅᑕᖅᑐᒥᐅᓄᓪᓗ ᐱᓕᕆᔩᑦ ᑲᓇᑕᒥ (ᐃᓄᓕᕆᔨᑐᖃᒃᑯᑦ) ᐸᓖᓯᒃᑯᓪᓗ−ᓱᓕ ᐅᔾᔨᕈᓱᓪᓚᑦᑖᖏᑦᑐᑦ ᓇᒻᒥᓂᖅ ᑕᐃᔅᓱᒪᓂ ᐊᑐᕐᓯᒪᔭᖏᓐᓂᒃ ᐅᑭᐅᖅᑕᖅᑐᒥ ᐅᕝᕙᓘᓐᓃᑦ ᐊᑑᑎᓯᒪᓂᖏᓐᓂᒃ ᑐᑭᑖᕈᑎᒋᕙᑦᑕᒥᓂᖏᑕ ᐱᓂᐊᕈᑎᒋᕙᑦᑕᒥᓂᖏᑕᓗ.

ᐃᓄᐃᑦ ᓄᓇᒋᕙᒃᑕᖏᓐᓂ ᓄᓇᖃᖃᑦᑕᓚᐅᖅᑐᑎᒃ ᑕᕝᕙᓂᔅᓴᐃᓐᓇᖅ ᐊᕐᕌᒍᓕᒫᖅ ᓄᓇᖃᖃᑦᑕᓕᖅᑐᑎᒃ 

  • 1950 ᑐᖔᓂ, ᐊᒥᓱᑦ ᐃᓄᐃᑦ ᕿᑐᕐᖓᕇᒡᒍᑏᑦ ᓄᓇᖃᖃᑦᑕᕐᓯᒪᔪᑦ ᓄᓇᒥᐅᑕᐅᓪᓗᑎᒃ ᐃᓚᒌᑦ ᑲᑎᙵᐅᖅᑐᒡᒍᑎᐅᕙᑦᑐᑎᒃ ᑕᒫᓂ ᑕᓪᓕᒪᓂᑦ 30ᓄᑦ ᐃᓄᖃᖅᑐᒡᒍᑎᐅᕙᑦᑐᑎᒃ, ᐊᑐᓂᑦ ᐃᓄᖏᑦ ᐱᒻᒪᕆᐅᒋᔭᐅᕙᑦᑐᑎᒃ ᐃᑲᔫᑎᖃᕈᓐᓇᕐᓂᖏᓐᓄᑦ ᓄᓇᖅᑲᑎᖏᑕ ᐃᓅᓯᖏᓐᓄᑦ ᒪᑭᑕᑦᑎᐊᕈᓐᓇᕐᓂᖏᓐᓄᓪᓗ.   
  • ᓅᑉᐸᑦᑐᒥᓃᑦ ᐃᓄᐃᑦ ᓄᓇᒋᕙᒃᑕᖏᓐᓂ ᕿᒧᔅᓯᒃᑯᑦ ᐅᒥᐊᒃᑯᓘᓐᓃᑦ, ᒪᓕᑦᑐᒍ ᑕᖅᑭᖓ ᐊᕐᕌᒍᒥ, ᐊᖑᓇᓱᑉᐸᑦᑐᑎᒃ ᓂᕐᔪᑎᓂᑦ ᓂᕿᖃᕈᑎᒋᓂᐊᖅᑕᖏᓐᓂᒃ, ᐊᓐᓄᕌᖃᕈᑎᒋᓂᐊᖅᑕᖏᓐᓂᓪᓗ ᓇᔪᕋᔅᓴᖃᕈᑎᒋᓂᐊᖅᑕᖏᓐᓂᓪᓗ.
  • ᑕᒪᓐᓇ ᑲᓲᒪᒍᑎᒋᓯᒪᓪᓚᕆᑦᑕᖓ ᓄᓇᒧᑦ ᓈᒪᔾᔪᑎᒋᓯᒪᔭᖓ ᐃᓕᖅᑯᓯᖓᓐᓄᑦ ᐅᖃᐅᓯᖓᓐᓄᓪᓗ. 
  • 1950 ᑭᖑᓂᐊᒍᑦ, ᑲᓇᑕᒥᐅᑦ ᒐᕙᒪᒃᑯᖏᑦ 13ᓂᑦ ᓄᓇᓕᓐᓂᑦ ᐋᖅᑮᓚᐅᕐᓯᒪᔪᑦ ᓄᓇᒋᔭᐅᖏᓐᓇᕐᓂᐊᓕᖅᑐᓂᑦ ᕿᑭᖅᑕᓂ, ᐊᑐᓯᑎᑦᑎᓪᓗᑎᒃ ᐋᑐᕚᑉ ᐸᓇᐅᑎᓕᐊᕆᓯᒪᔭᖓᓐᓂᒃ ᐃᓕᓐᓂᐊᖅᑎᑕᐅᖁᓕᖅᑐᒋᑦ ᐃᓄᐃᑦ ᕿᑐᕐᖓᖏᑦ, ᐋᓐᓂᐊᓯᐅᖅᑕᐅᖃᑦᑕᖁᓕᖅᑐᒋᑦ, ᐊᒻᒪᓗ ᑐᓂᓯᔭᐅᖃᑦᑕᖁᓕᖅᑐᒋᑦ ᕿᑐᕐᖓᓖᑦ ᓱᕈᓯᐊᕿᓂᑦ, ᐊᒻᒪᓗ ᓱᒃᑯᐊᕿᓂᑦ ᐊᒻᒪᓗ ᐃᑦᑐᐊᕿᓂᑦ/ᓂᖏᐅᕿᓂᑦ.
  • ᐃᓚᖏᑦ ᐃᓄᐃᑦ ᓅᓚᐅᕐᓯᒪᔪᑦ ᓄᓇᓕᓐᓄᑦ ᐃᓱᒪᕐᓱᖅᑐᑎᒃ ᐃᖅᑲᓇᐃᔭᕆᐊᖅᑐᑎᒃ, ᐋᓐᓂᐊᓯᐅᖅᑎᓕᒻᒨᖅᑐᑎᒃ ᐅᕝᕙᓘᓐᓃᑦ ᐊᑭᑭᑦᑐᔅᓴᔭᓂᑦ ᐃᓪᓗᑖᕆᐊᖅᑐᖅᑐᑎᒃ.
  • ᐊᓯᖏᑦ ᓅᓚᐅᕐᓯᒪᔪᑦ ᑲᑎᒻᒪᑦᑎᒍᒪᓪᓗᑎᒃ ᕿᑐᕐᖓᖏᓐᓂᒃ ᐃᓕᓐᓂᐊᖅᑐᓂᑦ ᐃᓕᓴᕕᓐᓂᑦ ᐅᕝᕙᓘᓐᓃᑦ ᐃᓚᖏᓐᓂᒃ ᑲᑎᒻᒪᑦᑎᒋᐊᖅᑐᖅᑐᑎᒃ ᐊᐅᓪᓛᕇᕐᓯᒪᔪᓂᑦ.
  • ᓱᓕᓗ ᐊᓯᖏᑦ ᓅᓚᐅᕐᓯᒪᔪᑦ ᑎᓕᐅᖅᑕᐅᓂᕐᒥᓂᒃ ᐃᑉᐱᒍᓱᒃᑲᒥᒃ ᐅᕝᕙᓘᓐᓃᑦ ᓅᖁᔭᐅᓪᓚᕆᒃᑲᒥᒃ ᐊᐅᓪᓛᖅᑎᖁᔭᐅᓪᓗᑎᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ.
  • ᑐᑭᑖᕈᑎᖃᕆᐊᔅᓴᖅ ᐱᐅᓯᕆᕙᑦᑕᖓᓐᓂᒃ ᐃᓅᓯᖃᕐᓂᕐᒥᒃ ᓴᒃᑯᐃᔭᕆᐊᔅᓴᖅ ᐱᔭᕆᐊᑭᑦᑐᑯᓘᓯᒪᙱᑦᑐᖅ, ᐊᒻᒪᓗ ᑐᑭᑖᕈᑎᖃᑐᐊᕋᒥᒃ, ᖃᐅᔨᓇᕐᓯᒪᔪᖅ ᐅᑎᕐᕕᓴᐅᙱᓐᓂᖓᓂᒃ.
  • ᐃᓄᐃᑦ ᐊᖏᔪᐊᓗᒻᒥᒃ ᐃᓅᓯᖏᓐᓂᒃ ᓇᒻᒥᓂᖅ ᐃᓕᖅᑯᓯᖏᓐᓂᓪᓗ ᐊᑭᓖᔾᔪᑎᖃᕐᓯᒪᔪᑦ ᓅᒃᑲᒥᒃ ᓄᓇᓕᓐᓄᑦ. 
  • ᓇᒻᒥᓂᖅ ᐃᓱᒪᕐᓱᖅᑐᑎᒃ ᐃᓱᒪᕐᓱᖏᒃᑲᓗᐊᖅᑐᑎᓪᓘᓐᓃᑦ ᓅᓯᒪᒐᓗᐊᕈᑎᒃ, ᐊᒥᓱᑦ ᐃᓄᐃᑦ ᖃᐅᔨᓕᓚᐅᕐᓯᒪᔪᑦ ᐊᑐᕐᓂᐊᕐᓂᕋᖅᑕᐅᓯᒪᔪᑦ “ᐃᓅᓯᖃᑦᑎᐊᓂᕐᓴᐅᓂᐊᕐᖓᑕᒎᖅ” ᓱᓕᙱᓐᓂᖏᓐᓂᒃ ᐊᒻᒪᓗ ᐃᑉᐱᒍᓱᔅᓯᒪᔪᑦ ᐃᓅᓯᖏᑦ ᐱᐅᙱᓂᕐᓴᐅᓕᕐᓂᖏᓐᓂᒃ, ᐱᐅᓯᕚᓪᓕᕐᓯᒪᙱᓐᓂᖏᓐᓂᒃ, ᐊᐅᓪᓛᖅᑎᑕᐅᓂᕐᒧᑦ.
  • ᓄᓇᓕᓐᓂᑦ ᐃᓅᓯᖃᓕᕐᓂᖅ ᐊᔾᔨᒋᙱᑕᖓᓂᒃ ᐊᔪᕐᓴᕈᑕᐅᓕᕐᓯᒪᕗᖅ, ᐊᒻᒪᓗ ᓅᓯᒪᒍᑕᐅᒍᓐᓇᐃᓪᓕᓯᒪᓪᓗᓂ ᓂᕿᔅᓴᕐᓯᐅᕐᕕᒋᕙᓚᐅᖅᑕᖏᓐᓄᑦ ᐃᑲᔫᑎᖃᖃᑦᑕᕐᓯᒪᔪᓄᑦ ᑎᒥᖏᓐᓄᑦ ᑕᕐᓂᖏᓐᓄᓪᓗ.
  • ᑕᒪᓐᓇ ᐱᔾᔪᑎᒋᓪᓗᒍ, ᐃᓄᐃᑦ ᐅᖁᒪᐃᓪᓕᐅᓪᓚᕆᖃᑦᑕᕐᓯᒪᕗᑦ ᓇᒻᒥᓂᖅ, ᐃᓚᖏᓪᓗ ᓄᓇᖅᑲᑎᖏᓪᓗ ᐊᔅᓱᕈᖅᑎᓪᓗᒋᑦ ᐃᓕᑦᑐᕋᓱᑦᑎᓪᓗᒋᑦ ᑕᒪᒃᑯᓄᖓ ᑭᓱᑐᐃᓐᓇᕐᓄᑦ ᐊᐅᓚᒍᓐᓇᖏᑦᑕᖏᓐᓄᑦ.

ᓄᓇᓕᓐᓂᑦ ᐃᓪᓗᓕᕆᓂᖅ

  • ᐃᓪᓗᓕᕆᓂᖅ ᐊᖏᕐᓂᐹᖑᓯᒪᒐᓗᐊᖅᑎᓪᓗᒍ ᒐᕙᒪᒃᑯᓐᓂ ᐱᕈᕐᐸᓪᓕᐊᑎᑕᐅᔪᓂᑦ ᑐᕌᖓᓪᓗᓂ ᐃᓄᓐᓄᑦ 1959ᒥ 1975ᒧᑦ, ᐃᓪᓗᐃᑦ ᓴᓇᔭᐅᕙᑦᑐᑦ ᐊᒥᓲᖃᑦᑕᕐᓯᒪᙱᑦᑐᑦ, ᒥᑭᓗᐊᕐᐸᑦᑐᑎᓪᓗ, ᐊᒻᒪᓗ ᓈᒻᒪᖏᓪᓚᕆᑦᑐᑎᒃ ᐅᑭᐅᖅᑕᖅᑑᑉ ᓯᓚᒋᕙᑦᑕᖓᓄᑦ.
  • ᑖᒃᑯᐊ ᐊᕐᕌᒍᐃᑦ ᐊᑐᖅᑎᓪᓗᒋᑦ, ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓇᓗᓇᐃᕐᓯᑦᑎᐊᖃᑦᑕᓂᙱᓪᓚᕆᑦᑐᑦ ᖃᓪᓗᓈᑦ ᐃᓱᒪᒋᔭᖏᓐᓂᒃ ᐊᑐᖅᑐᐊᓂᕐᒧᑦ ᑳᓐᑐᓛᓂᑦ ᐊᒻᒪᓗ ᐃᓪᓗᒥᒃ ᓇᒻᒥᓂᖃᕐᓂᕐᒥᒃ, ᑕᒪᓐᓇ ᓄᑖᖑᓯᒪᒻᒪᑦ ᐃᓄᓐᓄᑦ ᖃᐅᔾᔨᑎᒋᔭᐅᒐᓂ.

ᓄᓇᓕᓐᓂᑦ ᐃᓅᓯᖅ ᐊᒻᒪᓗ ᐋᖓᔮᕐᓇᖅᑐᑦ

  • ᓄᓇᓕᓐᓂᑦ ᐃᓅᓯᖅ ᐃᓄᓐᓄᑦ ᑐᙵᕕᖃᓕᕈᑕᐅᓯᒪᒻᒪᑦ ᒐᕙᒪᒃᑯᓐᓂ, ᓴᖅᑮᓪᓗᓂ ᓈᒻᒪᖏᑦᑐᓂᑦ ᐊᐅᓚᑦᑎᒍᑎᓂᑦ ᑕᒪᒃᑮᓐᓂᒃ.   
  • ᑕᒪᕐᒥᒃ ᐃᓗᓕᖏᓐᓂ ᐃᓄᐃᑦ ᖃᐅᑕᒫᑦ ᐃᓅᓯᕆᕙᑦᑕᖏᓐᓂ ᐊᒻᒪᓗ ᐃᓚᖃᕐᓂᕆᕙᑦᑕᖏᑦ ᐊᓯᔾᔨᓚᐅᕐᓯᒪᔪᑦ ᓄᓇᓕᓐᓂᑦ. 
  • ᐆᑦᑑᑎᒋᓗᒍ, ᐃᓚᖏᑦ ᐃᓄᑐᖃᐃᑦ ᐃᑉᐱᒍᓱᔅᓯᒪᒻᒪᑕ ᐊᑑᑎᖃᙱᒋᐊᔅᓴᖅ, ᐊᒻᒪᓗ ᐊᒥᓱᑦ ᐅᐃᒋᔭᐅᔪᑦ ᐃᕐᓂᕆᔭᐅᔪᑦ ᑲᓲᑎᒍᓐᓇᕐᓯᒪᙱᑦᑐᑦ ᓄᑖᓄᑦ ᐱᐅᓯᐅᓕᖅᑐᓄᑦ ᐃᓚᖏᓐᓄᑦ ᐱᒪᔨᐅᒍᒪᑎᓪᓗᒋᑦ.
  • ᐱᖅᑯᓯᖅᑎᒍᑦ ᓄᓕᐊᓂᒍᓯᐅᕙᑦᑐᒥᓃᑦ ᑎᒍᐊᕈᓯᐅᕙᑦᑐᒥᓃᑦ ᓵᙵᑦᑎᒍᑕᐅᖃᑦᑕᕐᓯᒪᓪᓗᑎᒃ ᐃᖅᑲᓇᐃᔭᖅᑎᓄᑦ.
  • ᓄᓇᓖᑦ ᐃᓄᒋᐊᔅᓯᓗᐊᖅᑑᔮᕐᓯᒪᓪᓗᑎᒃ ᐱᔾᔪᑎᒋᓪᓗᒍ ᓄᓇᖅᑲᑎᑖᑦ ᖃᐅᔾᔨᑎᒋᓇᒋᑦ−ᓄᑖᖑᓪᓗᓂ ᑕᒪᓐᓇ ᐃᓄᓐᓄᑦ.
  • ᑕᐃᒃᑯᐊᓗ ᐃᓄᐃᑦ ᕿᒻᒥᖃᙱᑦᑐᑦ ᖃᒧᑕᐅᔭᖃᙱᑐᓪᓘᓐᓃᑦ ᓅᒍᑎᔅᓴᓂᑦ ᐃᑉᐱᒍᓱᖃᑦᑕᕐᓯᒪᒻᒪᑕ ᐃᓅᓯᖃᕐᓂᖅ ᓄᓇᓕᓐᓂᑦ ᐊᓄᓪᓚᓯᖅᑕᐅᒍᑎᒋᔫᔮᖅᑐᒍ.   
  • ᓄᓇᓕᓐᓂᑦ ᐃᓅᓯᖅ ᐊᒥᓱᓄᑦ ᐃᓄᓐᓄᑦ ᐃᒥᐊᓗᒻᒥᒃ ᖃᐅᔨᓴᒍᑕᐅᓯᒪᒻᒥᒻᒪᑦ ᓯᕗᓪᓕᕐᐹᒥᒃ, ᑕᒪᓐᓇ, ᐱᖃᓯᐅᑎᓪᓗᒋᑦ ᑮᓇᐅᔭᐃᔭᕈᑏᑦ ᐋᖓᔮᕐᓇᖅᑐᐃᓪᓗ, ᐃᓅᓯᖃᑦᑎᐊᙱᓐᓂᕐᒧᑦ ᓴᖑᒍᑕᐅᓯᒪᒻᒥᒻᒪᑦ.
  • ᐃᓄᐃᑦ ᓄᓇᖃᖃᑦᑕᕐᓯᒪᒻᒪᑕ ᐃᓅᓯᖏᑦ ᐊᐅᓚᑕᐅᒐᑎᒃ ᐃᓚᒌᖏᓐᓇᑯᓗᐃᑦ ᓄᓇᒋᕙᑦᑕᖏᓐᓂᒃ ᓄᓇᖃᖃᑦᑕᑎᓪᓗᒋᑦ ᐊᒻᒪᓗ ᖃᐅᔨᒪᒐᑎᒃ ᖃᓪᓗᓈᑦ ᐃᓕᖅᑯᓯᖏᓐᓂᒃ ᑐᑭᓯᓂᐊᕋᒥᒃ ᕿᒥᖃᑦᑕᓲᖑᓂᖏᓐᓂᒃ ᐋᖓᔮᓕᕋᓱᑦᑐᑎᒃ, ᐃᒥᖃᑦᑕᓲᖑᓂᖏᓐᓂᒃ ᓂᕆᓯᓐᓈᑦ ᖁᕕᐊᓱᐊᒍᑎᒋᓪᓗᒍ, ᐊᒻᒪᓗ ᐃᒥᖃᑦᑕᓲᖑᓂᖏᓐᓂᒃ ᐊᔾᔨᒋᙱᑕᖓᓂᒃ ᐃᓅᓯᕐᒥ ᐊᑐᕐᓂᐊᕋᒥᒃ.  
  • 1970 ᖃᓂᒋᔭᖏᓐᓂ, ᐊᒥᓱᑦ ᕿᑐᕐᖓᕇᒡᒍᑏᑦ ᐊᑐᖃᑦᑕᓚᐅᕐᓯᒪᔪᑦ ᐅᖁᒪᐃᑦᑐᐊᓗᓐᓂᑦ ᐱᔭᕆᐊᑐᔪᓂᑦ ᐱᔾᔪᑎᒋᓪᓗᒋᑦ ᐋᖓᔭᕐᓇᖅᑐᑦ ᐊᑐᖅᑕᐅᓗᐊᓕᕐᓂᖏᓐᓄᑦ, ᓲᕐᓗ ᒪᑯᐊ ᐃᒥᐊᓗᓗᐊᖃᑦᑕᕐᓂᖅ, ᐊᔪᓕᕐᓯᒪᓂᖅ, ᐋᓐᓂᑎᖅᑎᑕᐅᖃᑦᑕᕐᓂᖅ ᖁᓄᔪᕐᓂᐊᖅᑕᐅᖃᑦᑕᕐᓂᖅ, ᐃᑉᐱᒍᓱᑦᑎᐊᕈᓐᓃᖅᑐᑎᒃ ᕿᑐᕐᖓᖏᓐᓂᒃ, ᐊᔪᕐᓴᖃᑦᑕᕐᓂᖅ ᐊᒻᒪᓗ ᓂᕆᐅᓇᙱᑦᑐᒃᑯᑦ ᑐᖁᖃᑦᑕᖅᑐᑦ ᐱᔾᔪᑎᒋᓪᓗᒋᑦ.   
  • ᑕᒪᒃᑯᐊ ᐱᔭᕆᐊᑭᑦᑐᓂ ᐊᐅᓚᑕᐅᒍᓐᓇᕐᓯᒪᑦᑎᐊᖅᑐᑎᒃ, ᐱᓇᓱᐊᕈᑕᐅᓯᒪᑦᑎᐊᙱᓗᐊᕐᖓᑦ ᐊᐅᓚᑕᐅᔪᓐᓇᕐᓂᖓ ᐃᒥᐊᓗᐃᑦ ᐋᖓᔮᕐᓇᑐᐃᓪᓗ ᑎᑭᑎᑕᐅᖃᑦᑕᕐᓂᖏᑦ.
  • ᑭᓯᐊᓂ ᓱᓕ ᐃᓄᐃᑦ ᐃᑲᔪᖅᑕᐅᓯᒪᙱᓗᐊᖅᑐᑦ ᑲᒪᒋᔭᖃᕐᓂᕐᒥᒃ ᓈᒻᒪᖏᑦᑐᓂᑦ ᐊᑑᑎᓯᒪᔪᓂᑦ ᑖᒃᑯᐊ ᐱᔾᔪᑎᒋᓪᓗᒋᒃ.

ᐃᓕᓐᓂᐊᕐᓂᖅ ᐊᒻᒪᓗ ᐊᑑᑎᓯᒪᓂᖏᑦ ᐃᓄᐃᑦ ᐃᓕᖅᑯᓯᖓᓐᓄᑦ

  • 1950ᖏᓐᓂ, ᑲᓇᑕᒥᐅᑦ ᒐᕙᒪᒃᑯᖏᑦ ᑐᑭᑖᕈᑎᖃᓚᐅᕐᓯᒪᒻᒪᑕ ᑕᒪᕐᒥᒃ ᐃᓄᐃᑦ ᓱᕈᓰᑦ ᐃᓕᓐᓂᐊᑦᑎᐊᕆᐊᖃᕐᖓᑕᒎᖅ ᐃᓚᒋᔭᐅᔪᓐᓇᕐᓯᓂᐊᕐᖓᑕ ᑲᓇᑕᒥᐅᓄᑦ ᐃᓅᖃᑎᒌᓄᑦ ᐊᒻᒪᓗ ᐃᖅᑲᓇᐃᔮᖅᑖᖅᑐᕐᓂᐊᕐᖓᑕ ᓄᑖᓂᑦ ᐃᖅᑲᓇᐃᔮᔅᓴᓂᑦ ᐊᒥᓱᕈᕐᐸᓪᓕᐊᑎᓪᓗᒋᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕈᑎᔅᓴᐃᑦ.  
  • ᑖᓐᓇ ᑐᑭᑖᕈᑦ ᐊᒻᒪᓗ ᐱᓕᕆᔾᔪᓰᑦ ᐊᑐᖅᑕᐅᓯᒪᔪᑦ ᐊᑐᖅᑎᑦᑎᓂᕐᒧᑦ ᑕᒪᑐᒥᖓ ᐊᖏᔪᐊᓗᒻᒥᒃ ᖃᓄᐃᒍᑕᐅᓯᒪᒻᒪᑦ ᐃᓄᓐᓄᑦ ᓱᕈᓯᕐᓄᑦ, ᐃᓚᒌᓄᑦ, ᓄᓇᖅᑲᑎᒌᓄᑦ ᐃᓕᖅᑯᓯᖓᓐᓄᓪᓗ.  
  • ᐃᓄᓕᒫᐸᓗᐃᑦ ᐅᖃᐅᔾᔭᐅᓚᐅᕐᓯᒪᒻᒪᑕ ᕿᑐᕐᖓᖏᑦ ᐃᓕᓐᓂᐊᕆᐊᖅᑎᑕᐅᙱᑉᐸᑕ, ᓱᕈᓯᐊᕿᖃᑦᑕᔾᔮᖏᒻᒪᑕᒎᖅ ᒫᓐᓇ ᐊᑐᖅᑕᐅᓪᓚᕆᖃᑦᑕᓕᖅᑎᓪᓗᒋᑦ ᐊᓐᓇᐅᒪᔭᕆᐊᖃᕐᓂᖏᓐᓄᑦ.
  • ᐊᒥᓱᑦ ᕿᑐᕐᖓᓖᑦ ᕿᑐᕐᖓᖏᓐᓂᒃ ᕿᒪᐃᒍᒪᓚᐅᕐᓯᒪᙱᒻᒪᑕ ᐊᓯᖏᓐᓄᑦ ᐱᓯᒪᔭᐅᓗᑎᒃ ᑕᐃᒫᒃ ᓄᓇᓕᓐᓅᖃᑎᖃᕐᓯᒪᔪᑦ, ᑐᐱᕐᒥᐅᑕᐅᓯᓪᓗᑎᒃ ᐃᓪᓗᑖᕋᓱᓐᓂᖏᓐᓂ.
  • ᐃᓚᖏᑦ ᐃᓄᐃᑦ ᓱᕈᓰᑦ ᐊᐅᓪᓚᖅᑎᑕᐅᓂᑰᒻᒪᑕ ᐃᓕᓐᓂᐊᕆᐊᕐᕕᐅᕙᑦᑐᒥᓂᕐᓄᑦ ᐃᓕᓴᕕᓐᓄᑦ ᐅᕝᕙᓘᓐᓃᑦ ᖃᓪᓗᓈᑦ ᓄᓇᖓᓐᓂᒥᐅᑕᐅᔭᖅᑐᖅᑐᑎᒃ, ᖁᕕᐊᓱᙱᓪᓚᕆᑦᑐᐊᓘᓪᓗᑎᒃ ᑕᒪᒃᑮᒃ ᕿᑐᕐᖓᓖᑦ ᕿᑐᕐᖓᖏᓪᓗ.
  • ᓇᒧᑐᐃᓐᓇᖅ ᐃᓕᓐᓂᐊᕆᐊᕐᖓᑕ, ᐃᓄᐃᑦ ᓱᕈᓰᑦ ᐃᓕᓐᓂᐊᖅᑎᑕᐅᖃᑦᑕᕐᓯᒪᔪᑦ ᐱᔾᔪᑎᖃᙱᑎᐊᒻᒪᕆᑦᑐᓂᑦ ᐃᓅᓯᐅᑉ ᒥᔅᓵᓄᑦ ᐅᑭᐅᖅᑕᖅᑐᒥ, ᐊᒻᒪᓗ ᐊᒥᓱᑦ ᐳᐃᒍᖅᑎᑕᐅᓯᒪᓪᓗᑎᒃ ᐱᔮᖅᑯᒻᒥᑦ ᐃᓄᐃᑦ ᓇᑭᙶᕐᓯᒪᓂᖏᓐᓂᒃ.
  • ᓱᕈᓰᑦ ᐃᓕᓐᓂᐊᖅᑎᑕᐅᓗᐊᖃᑦᑕᕐᓯᒪᔪᑦ ᖃᓪᓗᓈᑎᑐᑦ; ᐃᓄᒃᑎᑑᕆᐊᖃᖅᑎᑕᐅᙱᑎᐊᖅᑐᑎᒃ.
  • ᓱᕈᓰᑦ ᐊᓄᓪᓚᓯᖅᑎᑕᐅᓪᓚᕆᑉᐸᑦᑐᒥᓃᑦ, ᑕᒪᓐᓇ ᐋᓪᓚᐅᓪᓗᓂ ᖃᐅᔾᔨᑎᒋᓇᒍ ᖁᐊᕐᓵᓇᖅᑐᓂᓗ ᐃᓄᓐᓄᑦ.   
  • ᐱᕙᓪᓕᐊᓂᖏᓐᓂ, ᐃᓕᓐᓂᐊᕐᓂᓕᕆᔾᔪᓯᖅ ᐃᓕᖅᑯᓯᖅᑎᒍᑦ ᐊᒻᒪᓗ ᑭᖑᕚᕇᒡᒍᑎᓂᑦ ᐊᕕᑎᑦᑎᓯᒪᔪᖅ ᕿᑐᕐᖓᕆᔭᐅᔪᓂᑦ ᕿᑐᕐᖓᓕᓐᓂᓪᓗ ᖃᐅᔨᒍᑕᐅᓯᒪᓪᓗᓂᓗ ᐋᖅᑭᒐᕐᓂᖏᑦᑐᐊᓘᒋᐊᔅᓴᖓᓂᒃ.
  • ᓱᕈᓰᑦ ᐃᓄᒃᑎᑑᕈᓐᓇᐃᓪᓕᓯᒪᔪᑦ ᐅᖃᖃᑎᖃᕈᓐᓇᐃᓪᓕᖃᑦᑕᕐᓯᒪᔪᑦ ᐊᖏᔪᖅᑳᒥᓐᓂᒃ ᐊᑖᑕᑦᑎᐊᒃᑯᒥᓐᓂᒃ ᐃᑦᑐᒃᑯᒥᓐᓂᓪᓗ ᖃᓪᓗᓇᐅᔭᕈᓐᓇᑎᐊᙱᑦᑐᑦ ᖃᓪᓗᓇᐅᔭᓗᐊᕈᓐᓇᖏᑦᑐᓂᓪᓘᓐᓃᑦ.
  • ᑕᐃᒃᑯᐊ ᐱᕈᐃᔭᒥᓃᑦ ᐃᓕᓴᕕᓐᓂᑦ ᖃᓪᓗᓈᑎᑐᑦ ᐱᐅᓯᓕᓐᓂᑦ ᐊᖏᕐᕋᒥᓄᑦ ᐅᑎᓚᐅᕐᓯᒪᔪᑦ ᑕᑯᓕᖅᑐᑎᓪᓗ ᐊᖏᔪᖅᑳᖏᑕ ᐱᖅᑯᓯᖏᓐᓂᒃ ᐅᑉᐱᕆᔭᖏᓐᓂᒃ ᐊᒻᒪᓗ ᐱᐅᓯᖏᓐᓂᓪᓗ ᐅᐱᒍᓱᒍᓐᓃᖅᑐᑎᒃ.   
  • ᐱᓗᐊᖅᑐᒥᓪᓕ, ᐃᓄᐃᑦ ᐃᓕᓐᓂᐊᑎᑦᑎᔾᔪᓯᖏᑦ, ᐅᑉᐱᕆᔭᖏᑦ, ᐱᒻᒪᕆᐅᒋᔭᖏᑦ ᐃᓕᓯᒪᔭᖏᓪᓗ ᐃᓱᒫᓗᓇᕐᓯᓚᐅᕐᓯᒪᔪᑦ.
  • ᐊᒥᓱᑦ ᕿᑐᕐᖓᓖᑦ ᐃᑉᐱᒍᓱᓕᓚᐅᕐᓯᒪᔪᑦ ᐅᒡᒍᐊᓂᕐᒥᒃ ᑕᒻᒪᓚᐅᕐᓂᕋᒥᒃ ᕿᑐᕐᖓᖏᓐᓂᒃ ᐃᓕᓐᓂᐊᕆᐊᖅᑎᑎᓪᓗᑎᒃ, ᐃᓕᓐᓂᐊᕈᑎᒥᓂᖏᑦ ᐅᐸᓗᖓᐃᕐᓯᒪᒍᑎᒋᔪᓐᓃᓚᐅᕐᓯᒪᒻᒪᒋᑦ ᐃᓅᓯᖃᕐᓂᕐᒧᑦ ᒫᓐᓇᐅᓕᖅᑐᖅ ᑮᓇᐅᔾᔭᔅᓴᕕᐅᕙᓕᖅᑐᒥ ᐅᕝᕙᓘᓐᓃᑦ ᐱᖅᑯᓯᖅᑎᒍᑦ ᐃᓄᐃᑦ ᒪᑭᒪᓇᓱᐊᕈᑎᒋᕙᑦᑕᖏᓐᓄᑦ.

ᐊᖑᓇᓱᖃᑦᑕᕐᓂᖅ

  • ᐊᖑᓇᓱᖃᑦᑕᕐᓂᖅ ᓇᓗᓇᐃᒃᑯᑕᐅᓪᓚᕆᖃᑦᑕᕐᓯᒪᒻᒪᑦ ᐃᓚᒋᔭᐅᓪᓗᓂ ᐃᓄᐃᑦ ᐃᓕᖅᑯᓯᖓᓐᓂ.
  • ᐃᓄᐃᑦ ᐊᑐᖅᑎᑦᑎᓲᖑᒻᒪᑕ ᑐᑭᓯᐅᒪᓪᓚᕆᓐᓂᖏᓐᓂᒃ ᐊᕙᑎᒥᒃ ᒪᓕᒐᕐᓄᑦ, ᐱᐅᓯᕆᔭᐅᕙᑦᑐᓄᑦ ᐊᒻᒪᓗ ᐱᓕᕆᔾᔪᓯᐅᕙᑦᑐᓄᑦ ᖃᐅᔨᒪᑦᑎᐊᕈᑕᐅᕙᑦᑐᓂ ᐃᓱᒪᑐᓪᓗᑎᒃ ᐊᑐᖃᑦᑕᕐᓂᖏᓐᓂᒃ ᓂᕐᔪᑎᓂᑦ.
  • 1950ᖏᓐᓂ, ᒐᕙᒪᒃᑯᑦ ᖁᕝᕙᕆᐊᖅᑎᑦᑎᓚᐅᕐᓯᒪᒻᒪᑕ ᒪᓕᒐᕐᓂᑦ ᒪᓕᑦᑎᑦᑎᒍᑕᐅᕙᑦᑐᓂᑦ ᒪᓕᑦᑐᒋᑦ ᖃᓪᓗᓈᑦ ᓄᓇᖓᓐᓂ ᐱᐅᕐᓱᐊᕈᓰᑦ ᓯᕗᓪᓕᐸᐅᑦᑎᐅᔾᔭᐅᕙᑦᑐᑦ ᐅᑭᐅᖅᑕᖅᑐᒥ ᓱᓪᓕᑏᑦ ᐱᓪᓚᑦᑖᑦ ᐊᑐᖅᑕᐅᖔᕋᑎᒃ.   
  • ᑲᓇᑕᒥ ᐆᒪᔪᓕᕆᔨᕐᔪᐊᒃᑯᑦ ᐋᖅᑭᔅᓱᐃᓚᐅᕐᓯᒪᔪᑦ ᒪᓕᒐᕐᓂᑦ ᑭᓪᓕᖃᖅᑐᒋᑦ ᓇᓗᓇᐃᕐᓯᒪᔪᓂᑦ ᖃᓄᐃᑦᑐᑦ, ᓈᓴᐅᑎᑎᒍᑦ ᖃᖓᒃᑯᓪᓗ ᐊᕐᕌᒍᒥ ᓂᕐᔪᑏᑦ ᐊᖑᓇᓱᑦᑕᐅᖃᑦᑕᓂᐊᕐᒪᖔᑕ ᐃᓄᐃᑦ ᖃᐅᔨᒪᔭᖏᑦ ᐊᑐᖅᑎᑕᐅᒐᑎᒃ ᐅᕝᕙᓘᓐᓃᑦ ᑐᙵᕕᔅᓴᓂᑦ ᑐᑭᓯᐅᒪᔾᔪᑎᔅᓴᓂᑦ ᐱᓯᒪᒐᑎᒃ ᐅᑭᐅᖅᑕᖅᑐᒥ ᓂᕐᔪᑏᑦ ᐊᒥᓲᓂᖏᑕ ᒥᔅᓵᓄᑦ.
  • ᐱᑦᑕᐃᓕᑎᑕᑯᓗᐊᐲᑦ, ᐃᓄᐃᑦ ᓂᕈᐊᒐᖃᕆᐊᖃᕐᐸᑦᑐᒥᓃᑦ ᐱᕐᓕᓯᕐᓗᑎᒃ ᐅᕝᕙᓘᓐᓃᑦ ᐊᖑᓇᓱᓪᓗᑎᒃ ᒪᓕᒐᕐᒥᑦ ᓱᕋᐃᒐᓗᐊᕐᓗᑎᒃ ᐃᔨᕐᓯᒪᓗᒋᓪᓗ ᐊᖑᓂᑦᑕᖏᑦ ᒪᓕᒐᓕᕆᔨᓂᑦ ᐊᑭᓖᑎᑕᐅᓂᐊᙱᓐᓇᒥᒃ ᑎᒍᔭᐅᖅᑲᓂᐊᙱᓐᓇᒥᓪᓗ.

ᑐᖁᕋᖅᑕᐅᓂᖏ ᕿᒻᒦᑦ

  • ᑲᒪᒋᔭᐅᖃᑦᑕᕐᓂᖏᑦ ᐊᐅᓚᑕᐅᖃᑦᑕᕐᓂᖏᓪᓗ ᕿᒧᔅᓰᑦ ᐃᓚᒋᔭᐅᓯᓪᓚᕆᑦᑐᖅ ᐃᓄᐃᑦ ᐃᓕᖅᑯᓯᖓᓐᓄᑦ ᐊᒻᒪᓗ ᐊᖑᓇᓱᓐᓂᕐᒧᑦ ᐱᖅᑯᓯᖏᓐᓂᒃ.
  • ᐃᓄᐃᑦ ᐊᐅᓚᑦᑎᑦᑎᐊᖃᑦᑕᕐᓯᒪᒻᒪᑕ ᕿᒻᒥᓂᑦ ᐊᕐᕌᒍᒐᓴᕐᔪᐊᕌᓗᓐᓂᑦ ᑭᖑᕚᕇᑎᒍᑦ.  
  • ᐃᓄᐃᑦ ᓄᓇᒋᕙᒃᑕᖏᓐᓂ, ᕿᒻᒦᑦ ᐃᓕᙵᑎᐊᕐᐸᑦᑐᒥᓃᑦ ᐃᓄᓐᓄᑦ ᐊᓯᖏᓐᓄᓪᓗ ᕿᒻᒥᓄᑦ.
  • ᓄᓇᓕᓐᓂᑦ ᐃᓅᓯᖃᕐᓂᖅ ᐅᓚᕕᑦᑎᓚᐅᕐᓯᒪᔪᖅ ᐃᓄᐃᑦ ᐃᓕᖅᑯᓯᖓᓐᓂᒃ ᐊᒻᒪᓗ ᐃᓱᒫᓗᓇᕐᓯᑎᑦᑎᓪᓗᓂ ᕿᒻᒥᓂᑦ.
  • ᐊᑯᓐᓂᖏᓐᓂ 1957 ᐊᒻᒪᓗ 1975, ᐊᒥᓲᓂᖏᑦ ᕿᒻᒦᑦ ᕿᑭᖅᑕᓂ ᖃᑦᑏᓐᓇᕈᕐᐸᓪᓕᓪᓚᕆᓚᐅᕐᓯᒪᔪᑦ. ᑐᖁᕋᓚᐅᕐᓯᒪᔪᑦ ᕿᒻᒦᔭᕐᓇᒧᑦ; ᖁᑭᖅᑕᐅᕙᑦᑐᑎᓪᓗ ᐊᖑᓇᓱᑦᑎᓄᑦ ᐊᐅᓪᓛᐸᓪᓕᐊᔪᓄᑦ ᓄᓇᓕᓐᓄᑦ ᕿᒻᒥᖃᕆᐊᖃᖅᑐᒋᒍᓐᓃᖅᑐᑎᒃ ᐅᕝᕙᓘᓐᓃᑦ ᐊᑑᑎᖃᕈᓐᓃᖅᑐᒋᑦᑎᓪᓗᑎᒃ; ᕿᒪᐃᓐᓇᖅᑕᐅᖃᑦᑕᕐᓂᑯᐃᑦ ᐃᓄᖏᓐᓄᑦ ᐃᖅᑲᓇᐃᔭᖅᑐᓄᑦ ᓄᓇᓕᓐᓂᑦ ᐊᖑᓇᓱᒋᐊᖃᑦᑕᕈᓐᓇᐃᓪᓕᔪᓄᑦ ᐅᕝᕙᓘᓐᓃᑦ ᑲᒪᒍᓐᓇᐃᓪᓕᔪᓄᑦ ᕿᒻᒥᓂᑦ; ᕿᒪᐃᓐᓇᖅᑕᐅᓂᑯᐃᑦ ᐃᓄᐃᑦ ᖃᓪᓗᓇᑦ ᓄᓇᖓᓐᓄᑦ ᐊᐅᓪᓚᖅᑎᑕᐅᓯᑳᓪᓚᒻᒪᑕ ᐋᓐᓂᐊᕕᓕᐊᖅᑐᑎᒃ; ᐅᕝᕙᓘᓐᓃᑦ ᑭᖑᕝᕕᖅᑕᐅᓪᓗᑎᒃ ᖃᒧᑕᐅᔭᕐᓄᑦ.
  • Hᐊᓐᓇᓚᖏᓐᓃᑦᑐᑦ ᕿᒻᒦᑦ ᖁᑭᐊᔭᐅᓚᐅᕐᓯᒪᔪᑦ ᐸᓖᓯᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐊᐅᓚᑦᑎᔨᐅᑎᑕᐅᔪᓄᑦ ᓄᓇᓕᓐᓂᑦ 1950−ᕿᑎᖏᓐᓂ ᐱᒋᐊᖅᑐᑎᒃ ᓯᕗᒧᑦ ᐱᕙᓪᓕᐊᖏᓐᓇᖅᑐᑎᒃ ᐱᔾᔪᑎᒋᓪᓗᒍ ᖃᓪᓗᓈᑦ ᐃᕐᓯᕙᓐᓂᕐᖓᑕ ᒫᓂᖅᑭᔪᓂᑦ ᕿᒻᒥᓂᑦ ᐅᕝᕙᓘᓐᓃᑦ ᓯᕘᕋᕙᓐᓂᕐᖓᑕ ᖃᓂᒪᓐᓇᒥᒃ ᓯᐊᒻᒪᑎᑦᑎᓂᐊᕆᐊᖏᑕ.
  • ᐊᑕᐅᑦᑎᑯᓪᓗ, ᕿᒻᒦᑦ ᐸᓖᓯᒃᑯᓐᓄᑦ ᐱᒋᔭᐅᔪᑦ, ᐃᓄᓐᓄᑦ ᐸᓖᓯᒥᐅᓄᑦ ᐅᕝᕙᓘᓐᓃᑦ Hᐊᑦᓴᓐ ᐸᐃ ᑲᒻᐸᓂᒃᑯᓐᓄᑦ ᐃᖅᑲᓇᐃᔭᖅᑎᓄᑦ ᐃᓱᒪᒋᔭᐅᒐᔪᑉᐸᑦᑐᒥᓃᑦ ᐃᓱᒪᓇᙱᒋᐊᔅᓴᖏᓐᓂᒃ ᑕᐃᒫᓪᓗ ᖁᑭᖅᑕᐅᕙᓐᓂᖏᑦᑐᑦ.
  • ᑕᐃᒫᒃ ᐃᓚᐃᓐᓈᕐᕕᐅᖃᑦᑕᑎᓪᓗᒋᑦ ᓈᒻᒪᔅᓴᕈᓐᓃᕈᑕᐅᖃᑦᑕᕐᓂᑯᐃᑦ ᐃᓄᓐᓂᑦ ᕿᒻᒥᖏᑦ ᖁᑭᖅᑕᐅᖃᑦᑕᑎᓪᓗᒋᑦ ᐊᒻᒪᓗ ᑕᐃᒃᑯᐊ ᕿᒻᒥᖏᑦ ᖁᑭᖅᑕᐅᖏᑦᑐᑑᕙᑦᑐᑎᒃ. 
  • ᑕᒪᒃᑮᒃ ᐊᖑᓇᓱᑦᑏᑦ ᐃᓚᒌᒡᒍᑏᓪᓗ ᐊᔅᓱᕈᓪᓚᕆᔅᓯᒪᔪᑦ ᕿᒻᒥᖃᕈᓐᓃᕋᒥᒃ.
  • ᐃᖅᑲᓇᐃᔮᔅᓴᖅᑕᖃᑦᑎᐊᕋᓂᓗ ᓄᓇᓕᓐᓂᑦ, ᐊᒻᒪᓗ ᐃᓚᒌᒡᒍᑏᑦ ᑐᙵᕕᖃᖃᑦᑕᓯᔪᒥᓂᐅᓪᓗᑎᒃ ᐃᓄᓕᕆᔨᓂᑦ ᓱᒃᑯᐊᕿᑖᕈᑎᔅᓴᓄᑦ ᐊᒻᒪᓗ ᐊᑭᑐᔪᐊᓗᓐᓂᑦ, ᐆᒻᒪᑦᑎᐊᕆᓐᓇᖏᑦᑐᓂᑦ ᓂᐅᕕᕐᕕᔭᓂᑦ−ᓂᕿᑖᖃᑦᑕᕆᐊᖃᓕᖅᑐᑎᒃ.
  • ᕿᒻᒦᑦ ᑐᖁᕋᖅᑕᐅᓂᖏᑦ ᐃᖅᑲᐅᒪᑦᑎᒍᑕᐅᓗᐊᖃᑦᑕᓕᕐᓯᒪᔪᖅ ᐃᓄᓐᓄᑦ: ᐊᓯᔾᔨᐸᓪᓕᐊᑎᑕᐅᓕᓚᐅᕐᓯᒪᓂᖏᓐᓂᒃ ᐃᓅᓯᖏᓐᓂ ᓄᓇᖅᑲᑎᒋᙱᑕᖏᓐᓄᑦ ᑕᒫᓂᒥᐅᑕᔅᓴᔭᐅᙱᑦᑐᓄᑦ; ᐊᒻᒪᓗ ᐱᔭᕆᐊᑐᔪᒃᑰᕈᑕᐅᓯᒪᓪᓗᓂ ᓇᒻᒥᓂᕐᓱᒃᑳᓘᓯᒪᑎᓪᓗᒋᑦ, ᓇᒻᒥᓂᖅ−ᒪᑭᑕᒍᓐᓇᑎᐊᕐᓯᒪᑎᓪᓗᒋᑦ, ᐊᒻᒪᓗ ᓇᓗᓇᐃᒃᑯᑕᕆᓯᒪᓪᓗᒍ ᐊᖑᓇᓱᑦᑎᐅᓪᓗᑎᒃ ᐱᒪᔨᐅᓪᓗᑎᓪᓗ. ᐊᔅᓱᕈᕈᑕᐅᓯᒪᓗᐊᖅᑐᖅ ᑳᖃᑦᑕᕈᑕᐅᓯᒪᓗᐊᖅᑐᓂᓗ ᓄᓇᓕᓐᓃᓕᖅᑐᑎᒃ.
  • ᐋᓐᓂᐊᑯᑖᔅᓯᒪᓂᖏᑦ ᑕᒪᒃᑯᓂᖓ ᐃᖅᑲᐅᒪᑦᑎᕙᑦᑐᑎᒃ ᖃᐅᔨᓇᖅᑐᖅ ᑐᙵᕕᒋᖃᑦᑕᐅᑎᖃᑦᑕᕐᓂᒥᓂᖏᓐᓂᒃ ᐃᓄᐃᑦ ᕿᒻᒥᖏᓐᓄᑦ: ᐊᒥᓱᑦ ᐃᓄᐃᑦ ᐅᑉᐱᕈᓱᑦᑐᑦ ᒐᕙᒪᒃᑯᑦ ᖃᐅᔨᒪᔪᒥᓂᐅᒋᐊᔅᓴᖏᓐᓂᒃ ᕿᒻᒥᖃᕈᓐᓃᖅᑲᑕ ᐊᑦᑐᐃᓂᖃᙳᓱᒻᒪᑦ ᐃᓄᐃᑦ ᐃᓕᖅᑯᓯᖓᓐᓄᑦ, ᐃᓗᓯᖓᓐᓄᑦ ᐃᓅᓯᖓᓐᓄᓪᓗ, ᑭᓯᐊᓂ ᓱᒋᐊᓚᐅᙱᑦᑐᑦ.
  • ᐸᓯᑦᑎᓯᒪᔪᑦ ᐊᒥᓱᓂᑦ ᑐᖁᕋᐃᓯᒪᓂᖏᓐᓂᒃ ᐃᑉᐱᒍᓱᑦᑎᐊᕐᓯᒪᒐᑎᒃ ᐃᖅᑲᓇᐃᔭᖅᑎᐅᖃᑦᑕᕐᓯᒪᔪᑦ  ᖃᐅᔨᒪᙱᑎᐊᖅᑐᑎᒃ ᖃᓄᖅ ᕿᒻᒥᓂᑦ ᑲᒪᒋᔭᖃᖃᑦᑕᕆᐊᔅᓴᖅ ᐃᑉᐱᒍᓱᖃᑦᑕᕆᐊᔅᓴᕐᓗ.   
  • ᐅᖃᐅᓯᖃᕐᓯᒪᒻᒥᔪᑦ ᕿᓄᙵᖃᑦᑕᕐᓯᒪᓂᖏᓐᓂᒃ ᐅᒡᒍᐊᖃᑦᑕᕐᓯᒪᓂᖏᓐᓂᒃ−ᕿᓄᙵᖃᑦᑕᕐᓯᒪᓂᖏᓐᓂᒃ ᑐᑭᓯᒍᓐᓇᕋᑎᒃ ᓱᒻᒪᑦ ᐊᒥᓱᐊᓗᐃᑦ ᕿᒻᒦᑦ ᖁᑭᐊᔭᐅᓚᐅᕐᓯᒪᒻᒪᖔᑕ ᑕᒪᕐᒥᓕᒫᐸᓗᒃ ᐃᕐᓯᓇᖅᑐᐃᓐᓇᐅᓯᒪᙱᒻᒪᑕ; ᐊᒻᒪᓗ ᐅᒡᒍᐊᖃᑦᑕᕐᓯᒪᓪᓗᑎᒃ ᓄᖅᑲᑎᑦᑎᕙᓐᓂᖏᓐᓇᒥᒃ ᑐᖁᕋᐃᔪᓂᑦ.  

ᑭᓪᓕᓯᓂᐊᖅᑏᑦ ᕿᒥᕐᕈᓂᖏᑦ ᐸᓖᓯᒃᑯᑦ ᐊᒻᒪᓗ ᐃᓄᐃᑦ ᕿᒧᔅᓯᖏᑕ ᒥᔅᓵᓄᑦ (2006) ᐅᓂᒃᑳᖏᓐᓂᒃ

  • ᐱᒋᐊᖅᑐᑎᒃ 1990 ᓄᙳᖏᓐᓂ, ᐊᒥᓱᑦ ᐃᓄᐃᑦ ᓴᖅᑭᔮᖅᑐᒥᒃ ᐸᓯᑦᑎᓚᐅᕐᓯᒪᔪᑦ ᐸᓖᓯᒃᑯᓐᓂ ᑐᖁᕋᖅᑕᐅᓚᐅᕐᓯᒪᓂᖏᓐᓂᒃ ᕿᒧᔅᓰᑦ ᒪᓕᑦᑐᑎᒃ ᒐᕙᒪᒃᑯᑦ ᐊᑐᖅᑕᐅᖁᔭᖓᓐᓂᒃ ᑭᓪᓕᖃᖅᑎᑦᑎᖁᔨᑎᓪᓗᒋᑦ ᐃᓄᐃᑦ ᓅᖃᑦᑕᕈᓐᓇᕐᓂᖏᓐᓂᒃ ᐊᒻᒪᓗ ᐅᑎᖃᑦᑕᖁᓇᒋᑦ ᐱᖅᑯᓯᖏᑎᒍᑦ ᐃᓅᓯᕆᓚᐅᕐᓯᒪᔭᖏᓐᓄᑦ.
  • 2005ᒥ, ᒐᕙᒪᑐᖃᒃᑯᑦ ᕿᐱᓗᓚᐅᕐᓯᒪᔪᑦ ᒪᓕᒐᓕᐅᕐᕕᔾᔪᐊᕐᒥ ᑲᑎᒪᔨᕋᓛᑦ ᐅᖃᐅᔾᔨᒋᐊᕈᑎᖃᖅᑎᓪᓗᒋᑦ ᐃᓛᒃᑰᖅᑐᒥᒃ ᖃᐅᔨᒋᐊᕈᑎᖃᖁᔨᑎᓪᓗᒋᑦ ᕿᒻᒦᑦ ᑐᖁᕋᖅᑕᐅᓂᒥᖏᓐᓂᒃ, ᐊᐱᕆᖔᓚᐅᕐᓯᒪᔪᓪᓕ ᐸᓖᓯᒃᑯᓐᓂᒃ ᓇᒻᒥᓂᖅ ᐃᒻᒥᓐᓂᒃ ᖃᐅᔨᓴᖁᓪᓗᒋᑦ. 
  • ᕿᑭᖅᑕᓂ ᐃᓄᐃᑦ ᐱᖃᑕᐅᒍᒪᓚᐅᕐᓯᒪᙱᑦᑐᑦ ᑕᒪᑐᒥᖓ ᖃᐅᔨᓴᕐᓂᕐᒥᑦ.  
  • ᐸᓖᓯᒃᑯᑦ ᕿᒧᔅᓯᓐᓂᑦ ᖃᐅᔨᓴᕈᑎᒥᓂᖏᑦ ᐅᓂᒃᑳᑦ ᓇᓗᓇᐃᕈᑕᐅᓚᐅᕐᓯᒪᔪᑦ Hᐊᓐᓇᓚᖏᓐᓃᑦᑐᑦ ᐃᒻᒪᖃᓗ ᑕᐅᓴᙱᓐᓃᑦᑐᑦ ᕿᒻᒦᑦ ᑐᖁᕋᖅᑕᐅᓚᐅᕐᓯᒪᓂᖏᓐᓂᒃ ᐸᓖᓯᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐊᐅᓚᑦᑎᔨᐅᔪᓄᑦ 1950ᖏᓐᓂ 1960ᖏᓐᓂᓗ.
  • ᑕᒪᐃᓐᓂᓪᓕ, ᑭᓪᓕᓯᓂᐊᖅᑏᑦ ᓇᓗᓇᐃᔭᐃᓚᐅᕐᓯᒪᔪᑦ ᕿᒥᕐᕈᒍᑎᖏᓐᓂᒃ ᑖᒃᑯᓂᖓ ᐅᓂᒃᑳᓕᐊᖑᓯᒪᔪᓂᑦ ᖃᐅᔨᓪᓗᑎᒃ ᐸᓖᓯᒃᑯᑦ ᒪᓕᒐᖅᑎᒎᖓᓂᕐᓴᓂᑦ ᐱᓇᓱᐊᕈᑎᖃᕐᓂᒥᓂᖏᓐᓂᒃ ᖃᐅᔨᓴᕐᓂᕐᒥ.  
  • ᐸᓖᓯᒃᑯᓐᓂ ᖃᐅᔨᓴᖅᑏᑦ ᕿᓂᕐᓯᒪᒻᒪᑕ ᒪᑯᓂᖓᐃᓐᓇᑯᓗᒃ ᖃᐅᔨᒍᑎᔅᓴᓂᑦ ᒐᕙᒪᒃᑯᓐᓂ ᐃᔨᕋᖅᑐᖅᑐᑎᒃ ᐸᕐᓇᐅᑎᒥᓂᖏᓐᓂᒃ ᐅᕝᕙᓘᓐᓃᑦ ᓈᒻᒪᖏᑦᑐᒥᒃ ᐸᓖᓯᒃᑯᑦ ᐱᐅᓯᖃᕐᓂᒥᓂᖏᓐᓂᒃ ᕿᒻᒥᓂᑦ ᑐᖁᕋᐃᓂᕐᒧᑦ.   
  • ᐃᓱᒪᒋᔭᖃᕐᓂᖏᒻᒪᑕ ᐊᓯᖏᓐᓂᒃ ᐱᔾᔪᑕᐅᓚᐅᕐᓯᒪᔪᓂᑦ ᓲᕐᓗ ᓈᒻᒪᖏᓐᓂᖓᓂᒃ ᒪᓕᒐᐅᑉ ᕿᒻᒦᑦ ᑐᖁᕋᖅᑕᒥᓂᐅᓪᓗᑎᒃ, ᐅᕝᕙᓘᓐᓃᑦ ᖃᓄᑐᐃᓐᓇᑦᑎᐊᖅ ᑐᖁᕋᐃᓂᒥᓂᖏᓐᓂᒃ ᐱᔾᔪᑎᒋᓪᓗᒍ ᐊᐅᓪᓛᖅᑎᑕᐅᓂᒥᓂᖏᑦ ᐃᓄᐃᑦ ᓄᓇᒌᓐᓇᕐᓂᐊᓕᖅᑕᖏᓐᓄᑦ.   
  • ᐱᐅᙱᔾᔪᑎᒃᑲᓐᓂᖓ, ᑎᑎᕋᕐᓯᒪᔪᑦ ᐃᑉᐱᒍᓱᔅᓯᒪᒐᑎᒃ ᐃᓄᐃᑦ ᓱᖅᑯᐃᒋᔭᖏᓐᓂᒃ ᑐᖁᕋᖅᑕᐅᓂᒥᓂᖏᑦ ᓱᓕᙱᓐᓂᕋᖅᑐᒋᑦ ᐅᕝᕙᓘᓐᓃᑦ ᓱᖅᑯᐃᓱᑦᑎᐊᖏᓐᓂᒧᒡᒎᖅ ᑕᐃᒪᐃᑦᑐᒋᑦᑎᓯᒪᓪᓗᑎᒃ, ᐊᒻᒪᓗ ᐊᑭᕋᖅᑐᕐᓯᒪᓪᓗᑎᒃ ᐃᓄᓐᓂᑦ ᓯᕗᓕᖅᑎᐅᔪᓂᑦ ᑕᒪᒃᑯᓂᖓ ᖃᓄᐃᓕᐅᕈᑕᐅᓯᒪᓂᕋᐃᓪᓗᑎᒃ ᐃᓄᓕᒫᓄᑦ ᖃᐅᔨᒃᑲᐃᔾᔪᑎᒋᓪᓗᒍ ᑕᐃᒪᐃᓕᐅᖅᑎᑦᑎᓂᕋᖅᑐᒋᑦ ᑮᓇᐅᔭᓂᑦ ᐊᑭᓕᖅᑕᐅᖁᔨᓂᕐᒧᑦ.  
  • ᑭᓪᓕᓯᓂᐊᖅᑏᑦ ᕿᒥᕐᕈᒍᑎᒥᓂᖏᑦ ᐸᓖᓯᒃᑯᑦ ᐅᓂᒃᑳᓕᐊᒥᓂᖏᓐᓂᒃ ᖃᐅᔨᒍᑕᐅᓯᒪᒻᒥᔪᑦ ᐃᓄᐃᑦ ᑐᑭᑖᖅᑎᐅᕙᑦᑐᓐᓄᑦ ᐅᖃᕐᕕᖃᕈᓐᓇᓚᐅᕐᓯᒪᙱᓐᓂᖏᓐᓂᒃ. 
  • ᓇᓗᓇᐃᔭᐅᑕᐅᕙᑦᑐᒥᓃᑦ ᓱᒻᒪᑦ ᕿᒻᒦᑦ ᐱᑐᔅᓯᒪᖃᑦᑕᕆᐊᖃᓕᕐᒪᖔᑕ ᐱᔭᕇᕐᓯᒪᖃᑦᑕᓚᐅᙱᑦᑐᑦ ᐅᕝᕙᓘᓐᓃᑦ ᑐᑭᓕᐅᖅᑕᐅᓯᒪᑦᑎᐊᖃᑦᑕᕋᑎᒃ. 
  • ᑕᒪᓐᓇ ᐱᔾᔪᑎᒋᓪᓗᒍ, ᐊᒥᓱᑦ ᐃᓄᐃᑦ ᐅᖃᐅᔾᔭᐅᓚᐅᕐᓯᒪᙱᑦᑐᑦ ᓱᒻᒪᑦ ᕿᒻᒦᑦ ᖁᑭᐊᔭᐅᓐᓂᕐᒪᖔᑕ.  
  • ᑕᐃᒪᐃᒻᒪᑦ ᑐᑭᓯᓕᕐᓂᖅᑯᑦ ᐃᓄᐃᑦ ᕿᒧᔅᓯᖏᑦ ᑐᖁᕋᖅᑕᐅᓂᕐᖓᑕ ᐊᑕᐅᑦᑎᒧᑦ ᓅᑎᑕᐅᓂᐊᕐᖓᑕ, ᐱᓗᐊᖅᑐᒥᑦ ᐊᓐᓇᐃᓪᓗᑎᒃ ᓄᓇᒥᓐᓄᑦ ᐅᑎᕈᑎᔅᓴᖏᓐᓂᒃ; ᑐᙵᕕᖃᖔᓯᓪᓗᑎᒃ ᑮᓇᐅᔭᓂᑦ ᒪᑭᑕᒍᑎᖃᕆᐊᖃᕐᓂᕐᒥᒃ; ᐊᒻᒪᓗ ᑲᒪᒋᔭᖃᕐᓂᕐᓴᐅᖔᓕᕐᓗᑎᒃ ᐱᔨᑦᑎᕋᐅᑕᐅᔪᓂᑦ ᓄᓇᓕᓐᓂᑦ.
  • ᑭᓪᓕᓯᓂᐊᖅᑏᑦ ᖃᐅᔨᓴᕈᑎᒥᓂᖏᑦ ᑕᑯᔾᔪᑕᐅᓯᒪᔪᑦ ᑐᖁᕋᐃᓂᒥᓃᑦ ᐊᑯᓂᐅᓗᐊᖅᑐᒥᓂᐊᓘᒻᒪᑦ ᐃᔨᕋᖅᑐᖅᑐᑎᒃ ᐸᕐᓇᐅᑎᖃᕐᓯᒪᓂᖏᓐᓄᑦ ᐅᕝᕙᓘᓐᓃᑦ ᐱᓂᐊᕐᓂᖃᕈᑎᖃᕐᓂᐊᕐᓂᖏᓐᓄᑦ, ᐊᒻᒪᓗ ᕿᒻᒥᓂᑦ ᑐᖁᕋᐃᒋᐊᓯᓚᐅᕐᓯᒪᓪᓗᑎᒃ−1950−ᕿᑎᖏᓐᓂ ᐃᖃᓗᓐᓂ−ᐊᒥᓱᑲᓪᓚᐃᑦ ᐊᕐᕌᒍᑦ ᑐᖔᓂ ᒐᕙᒪᑐᖃᒃᑯᑦ ᐊᑐᓯᓚᐅᖅᑎᓐᓇᒋᑦ ᓱᓕ ᐊᑕᐅᑦᑎᒧᑦ ᐊᐅᓪᓛᑎᑦᑎᓂᕐᒧᑦ ᐊᑐᐊᒐᕐᒥᑦ. 
  • ᕿᒻᒦᑦ ᒥᔅᓴᓄᑦ ᒪᓕᒐᓕᐅᕐᓂᖅ ᐊᑕᐅᑦᑎᒃᑰᖃᑎᖃᕐᓯᒪᔪᖅ ᒐᕙᒪᒃᑯᑦ ᐊᑐᐊᒐᕆᒐᔪᓚᐅᖅᑕᖓᓐᓄᑦ ᐃᓄᐃᑦ ᐃᒪᐃᒋᐊᖃᕐᖓᑕᒎᖅ, ᓇᒻᒥᓂᖅ ᐊᑭᓖᖃᑦᑕᕐᓗᑎᒃ, ᐊᑲᕐᕆᔮᖅᑎᑦᑎᓗᑎᒃ ᓂᐅᕐᕈᐊᑦ ᐱᔪᒪᔭᖏᓐᓂᒃ ᐊᑐᕋᒪᔭᖏᓐᓂᓪᓗ. 
  • ᒪᓕᒐᖅ ᑐᑭᓯᓇᕋᓗᐊᖅᑎᓪᓗᒍ ᑕᐃᒃᑯᓄᖓ ᒪᓕᒐᓕᕆᔨᐅᔪᓄᑦ, ᐊᖑᓇᓱᑦᑎᓄᓪᓕ ᑐᑭᖃᕋᓂ, ᐊᑐᕆᐊᑐᒐᓂ ᐊᑦᑕᓇᖅᑐᓂᓗ, ᐊᒻᒪᓗᑦᑕᐅᖅ ᓈᒻᒪᖏᑦᑐᒥᒃ ᓂᕆᐅᓇᙱᑦᑐᒥᓪᓗ ᐊᑐᖅᑎᑕᐅᓯᒪᓪᓗᓂ. 
  • ᑲᓇᑕᐅᑉ ᒐᕙᒪᒃᑯᖏᑦ ᑲᒪᒋᔭᕆᐊᓕᖏᓐᓂᒃ ᑲᔪᓯᑎᑦᑎᑎᐊᕐᓂᖏᑦᑐᑦ ᐃᓄᓐᓄᑦ ᑭᓪᓕᖃᖅᑎᑦᑎᑎᓪᓗᒋᑦ ᕿᒻᒥᖏᓐᓂᒃ ᐊᑐᕐᓂᕐᒥᒃ ᓱᓇᒃᑯᑖᖃᖅᑎᑦᑎᒐᑎᒃ ᐊᑐᖔᕈᓐᓇᓂᐊᖅᑕᖏᓐᓂᒃ ᑭᓪᓕᖃᖅᑎᑦᑎᓂᐊᖅᑎᓪᓗᒋᑦ ᐱᔭᕆᐊᑐᔪᒃᑰᖏᓐᓂᕐᓴᐅᒍᑎᔅᓴᖏᓐᓂᒃ ᐅᕝᕙᓘᓐᓃᑦ ᐱᖃᑕᐅᑎᑦᑎᖃᑦᑕᖅᑐᒥᓂᐅᒐᑎᒃ ᐃᓄᓐᓂᑦ ᐋᖅᑭᐅᒪᒍᑎᔅᓴᓂᑦ ᖃᓄᖅᑑᕈᑎᖃᕋᓱᓐᓂᕐᒥᒃ.  
  • ᐋᓐᓂᐊᖅᑐᓕᕆᓂᖅ ᐊᒻᒪᓗ ᐊᕕᑎᑦᑎᓂᖅ ᐅᕝᕙᓘᓐᓃᑦ ᐊᓯᐅᔨᓂᖏᑦ ᐃᓚᖏᓐᓂᒃ
  • ᐋᓐᓂᐊᖅᑐᓕᕆᓂᕐᒧᑦ ᑐᑭᒧᐊᒍᑎᔅᓴᐃᑦ ᐋᖅᑭᒋᐊᕐᓯᒍᑕᐅᒍᒫᕐᓂᐊᕐᓯᒪᔪᒥᓃᑦ ᐃᓄᐃᑦ ᐃᓅᓯᖏᓐᓂᒃ ᐊᐅᓪᓚᖅᑎᑕᐅᓪᓗᑎᒃ ᐋᓐᓂᐊᕕᓕᐊᕆᐊᓖᑦ ᖃᓪᓗᓈᑦ ᓄᓇᖓᓐᓄᑦ ᐋᓐᓂᐊᕕᓐᓄᑦ ᑲᔪᓯᑎᑦᑎᒍᑕᐅᔪᒥᓃᑦ ᑐᕌᒐᓪᓗᐊᑕᒥᓂᖓᓐᓂᒃ ᑭᓯᐊᓂ ᐊᓯᖏᓐᓂᒃ ᓱᕈᐃᒍᑕᐅᓯᒪᓪᓚᕆᒻᒥᔪᖅ.
  • 1950 ᑭᖑᓂᐊᒍᑦ, ᐋᓐᓂᐊᖅᑐᓕᕆᔩᑦ ᓄᑖᕐᒥ ᐋᓐᓂᐊᓯᐅᖅᑎᒃᑯᑦ ᐅᒥᐊᕐᔪᐊᖓᓐᓃᑦᑐᑦ CGS C.D. Hᐊᐅ ᖃᐅᔨᓴᖃᑦᑕᖅᑐᒥᓂᖅ ᐃᓄᓐᓂᑦ ᐳᕙᓪᓗᒻᒪᖔᑕ ᐊᒻᒪᓗ ᐊᓯᖏᓐᓂᒃ ᐊᐃᑦᑐᐃᒍᑕᐅᔪᓐᓇᖅᑐᓂᑦ ᐋᓐᓂᐊᖃᕐᒪᖔᑕ, ᐊᐅᓪᓚᖅᑎᑕᐅᖃᑦᑕᖅᑐᒥᓂᐅᓪᓗᑎᒃ ᐋᓐᓂᐊᔪᑦ ᐊᐃᑦᑐᖅᑕᐅᓯᒪᔪᓪᓗ ᖃᐅᔨᒃᑲᐃᒐᑎᒃ ᐊᑯᓂᐊᓗᓪᓗ ᖃᓪᓗᓈᑦ ᓄᓇᖓᓐᓂ ᐋᓐᓂᐊᕕᓕᐊᕐᓯᒪᖃᑦᑕᖅᑐᒥᓂᐅᓪᓗᑎᒃ.
  • ᐅᒥᐊᕐᔪᐊᑉ ᖁᓛᒎᓕᖓᑦ ᐃᓛᓐᓂᒃᑯᑦ ᓇᓂᓯᕙᑦᑐᒥᓂᖅ ᐃᓄᓐᓂᑦ ᖃᐅᔨᓴᖅᑕᐅᒍᒪᓯᒪᙱᑦᑐᓂᑦ.
  • ᑕᐃᒃᑯᐊ ᐊᐅᓪᓚᖅᑎᑕᒥᓃᑦ ᖃᓪᓗᓈᑦ ᓄᓇᖓᓐᓄᑦ ᐋᓐᓂᐊᓯᐅᖅᑎᓄᑦ ᑲᒪᒋᔭᐅᔭᖅᑐᖅᑐᑎᒃ ᐱᓇᓱᐊᕈᓯᒐᓴᓐᓂᑦ ᐅᒥᐊᕐᔪᐊᕐᒦᑉᐸᑦᑐᒥᓃᑦ ᐊᕐᕌᒍᒐᓴᓐᓂᓘᓐᓃᑦ ᐋᓐᓂᐊᓯᐅᖅᑕᐅᕙᑦᑐᑎᒃ, ᐅᖓᓯᑦᑐᒦᑦᑐᑎᒃ ᐃᓚᖏᓐᓂ ᕿᒪᐃᓯᒪᓪᓗᑎᒃ.
  • ᐊᑐᖃᑦᑕᕐᓯᒪᔪᑦ ᐊᖏᔪᐊᓗᒻᒥᒃ ᐃᑉᐱᒍᓱᓐᓂᕐᒥᒃ ᐃᓕᖅᑯᓯᕆᙱᑕᒥᓅᖅᑐᑎᒃ ᐊᒻᒪᓗ ᖃᐅᔾᔨᑎᒋᑎᑕᒥᓅᖅᑐᑎᒃ ᐊᓯᐅᓯᒪᓂᕐᒥᒃ, ᑕᒪᒃᑮᓐᓂᒃ ᖃᓪᓗᓈᑦ ᓄᓇᖓᓐᓂ ᐊᒻᒪᓗ ᐅᑎᕋᐃᒐᒥᒃ ᓄᓇᒥᓐᓄᑦ.
  • ᓱᕈᓰᑦ ᐃᓕᐊᕐᔫᕙᑦᑐᒥᓃᑦ ᖃᓪᓗᓈᑦ ᓄᓇᖓᓐᓂ ᐳᕙᓪᓗᕕᓐᓂᑦ ᐊᒻᒪᓗ ᐃᓂᖅᑎᖅᑕᐅᕙᑦᑐᑎᒃ ᐃᓂᖅᑎᖅᑕᐅᔾᔪᓯᕆᒐᔭᙱᑎᐊᖅᑕᖏᓐᓂᒃ ᐊᖏᕐᕋᕐᓯᒪᒍᑎᒃ: ᐸᑦᑖᕆᔭᐅᕙᑦᑐᑎᒃ, ᐸᑎᑦᑕᐅᕙᑦᑐᑎᒃ, ᓂᕆᑎᑕᐅᕙᑦᑐᑎᒃ−ᓂᕆᒍᒪᑎᓐᓇᒋᑦ ᐅᕝᕙᓘᓐᓃᑦ ᐊᑦᑐᖏᖅᑕᐅᕙᑦᑐᑎᒃ ᐃᓪᓕᕐᒧᑦ ᐃᑲᕐᕋᒐᓴᓐᓂᑦ ᑕᐃᒪᐃᓕᖓᓂᐊᖅᑐᑎᒃ.
  • ᐃᖅᑲᓇᐃᔭᖅᑏᑦ ᔭᒐᐃᕙᓐᓂᕐᒥᔪᑦ ᐅᕝᕙᓘᓐᓃᑦ ᒥᔅᓯᖃᕈᓐᓃᑎᑦᑎᕙᓐᓂᕐᒥᔪᑦ ᑎᑎᖅᑲᓂᑦ, ᑕᐃᒫᓪᓗ ᑕᒪᒃᑮᒃ ᓱᕈᓯᑦ ᐃᓐᓇᐃᓪᓗ ᐅᑎᕈᓐᓃᐸᑦᑐᒥᓂᐅᓪᓗᑎᒃ ᓇᒻᒥᓂᖅ ᐃᓄᐃᑦ ᓄᓇᒋᕙᒃᑕᖏᓐᓄᑦ ᐅᕝᕙᓘᓐᓃᑦ ᓄᓇᖃᕐᕕᖏᓐᓄᑦ.
  • ᐊᓯᖏᑦ ᓱᕈᓰᑦ ᐅᑎᙲᓇᖅᑐᒥᓃᑦ, ᐅᕝᕙᓘᓐᓃᑦ ᐅᑎᖅᑐᒥᓃᑦ ᐊᕐᕌᒍᒐᓴᐃᑦ ᑭᓯᐊᓂ ᓈᒻᒪᑕ ᖃᐅᔨᓕᕋᐃᒐᒥᒃ ᐱᓯᒪᔭᒥᓂᐅᒋᐊᔅᓴᖅ ᐃᑉᐱᒍᓱᑦᑎᐊᖅᑐᓄᑦ ᐃᖅᑲᓇᐃᔭᖅᑎᓄᑦ.
  • ᐃᓐᓇᐃᑦ ᐅᑎᖅᑐᒥᓃᑦ ᐋᓐᓂᐊᕕᓕᐊᕐᓯᒪᓚᐅᖅᑐᑎᒃ ᐃᓅᓯᕆᕙᓚᐅᖅᑕᖏᓐᓄᑦ ᐅᑎᓪᓚᑦᑖᕈᓐᓇᐸᓐᓂᖏᑦᑐᑦ ᐊᒻᒪᓗ ᑐᙵᕕᖃᓯᑐᐃᓐᓇᐸᑦᑐᒥᓃᑦ ᒐᕙᒪᒃᑯᓐᓂ ᐃᑲᔫᓯᐊᖅᑖᕈᑎᒋᕙᑦᑕᖏᓐᓂᒃ.
  • ᐃᓚᖏᑦ ᐃᓚᒋᔭᐅᔪᑦ ᖃᐅᔨᒃᑲᖅᑕᐅᕙᓐᓂᖏᑦᑐᑦ ᐃᓚᖏᑦ ᑐᖁᔪᒥᓂᐅᒐᓗᐊᕋᐃᒻᒪᑕ ᖃᓪᓗᓈᑦ ᓄᓇᖓᓐᓃᓐᓂᖏᓐᓂ ᑭᓯᐊᓂ ᐅᐊᑦᑎᐊᕈᑐᖄᓘᓕᕋᐃᒻᒪᑦ ᖃᐅᔨᒃᑲᖅᑕᐅᕙᑦᑐᒥᓃᑦ−ᖃᐅᔨᒃᑲᖅᑕᐅᓐᓂᕋᐃᒻᒪᑕᐃᓛᒃ ᑭᓯᐊᓂ.
  • ᐊᒥᓱᑦ ᐃᓄᐃᑦ ᐃᓚᓖᑦ ᑐᖁᔪᒥᓂᕐᓂᑦ ᖃᓪᓗᓈᑦ ᓄᓇᖓᓐᓂ ᖃᐅᔨᒪᙱᑦᑐᑦ ᓇᒥ ᐃᓚᒥᓂᖏᑦ ᐃᓗᕕᖅᑕᐅᓯᒪᒻᒪᖔᑕ, ᐅᕝᕙᓘᓐᓃᑦ ᐱᕕᖃᕐᓯᒪᙱᑦᑐᑦ ᑕᑯᔭᖅᑐᓂᕐᒥᒃ ᐃᓗᕕᖏᓐᓂᒃ. 

ᐱᕙᓪᓕᐊᑎᑦᑎᓂᖅ ᐊᒻᒪᓗ ᐃᖅᑲᓇᐃᔭᕐᓂᖅ

  • ᑲᓇᑕᒥᐅᑦ ᒐᕙᒪᒃᑯᖏᑦ ᑎᓕᐅᕆᓯᒪᔪᑦ ᑮᓇᐅᔭᓕᐅᕋᓱᐊᕈᑎᔅᓴᓂᑦ ᐱᕙᓪᓕᐊᔪᓕᕆᓂᕐᒥᒃ−ᐱᓗᐊᖅᑐᒥ ᐅᔭᕋᓐᓂᐊᕐᓂᕐᒥ, ᐅᖅᓱᐊᓗᔅᓴᓂᐊᕐᓂᕐᒥ ᒑᓯᔅᓴᓂᐊᕐᓂᒥᓪᓗ−ᖃᓪᓗᓈᑦ ᓄᓇᖓᓐᓂ ᐃᓅᔾᔪᓯᐅᕙᑦᑐᖅ ᐊᑐᖅᑕᐅᓕᖁᓪᓗᒍ ᕿᑭᖅᑕᓂ ᐃᓄᓐᓄᑦ, ᑭᓯᐊᓂ ᑕᒪᑐᒪ ᐱᕙᓪᓕᐊᓂᖓ ᓱᒃᑲᐃᑦᑑᓯᒪᔪᖅ..
  • ᐃᓚᖏᑦ ᐃᓄᐃᑦ ᐱᕚᓪᓕᕈᑎᖃᕐᓯᒪᒐᓗᐊᖅᑎᓪᓗᒋᑦ ᑮᓇᐅᔾᔭᔅᓴᓂᕐᒥᒃ ᒪᑭᒪᓇᓱᐊᕈᑎᖃᕐᓂᕐᒥᒃ, ᐊᓯᖏᑦ ᑲᒪᒋᔭᐅᑲᒻᒪᖃᑦᑕᕐᓯᒪᔪᑦ ᐃᖅᑲᓇᐃᔭᖅᑎᓪᓗᒋᑦ ᐱᕙᓪᓕᐊᔪᓕᕆᔨᓂᑦ ᑎᒥᐅᔪᓂᑦ, ᐅᕝᕙᓘᓐᓃᑦ ᐊᑭᓕᖅᑕᐅᓚᐅᕐᓯᒪᓐᓂᖏᑦᑐᑦ ᐃᑲᔪᖃᑦᑕᕋᓗᐊᖅᑎᓪᓗᒋᑦ ᐱᔨᑦᑎᕋᖃᑦᑕᕋᓗᐊᖅᑎᓪᓗᒋᓪᓗ ᒐᕙᒪᒃᑯᓐᓄᑦ. 
  • ᐊᒥᓱᑲᓪᓚᐃᑦ ᐊᐅᓪᓚᖅᑎᑕᐅᓂᑯᐃᑦ ᖃᓪᓗᓈᑦ ᓄᓇᖓᓐᓄᑦ ᐃᓕᓐᓂᐊᕆᐊᖅᑐᑎᒃ, ᑭᓯᐊᓂ ᐊᒥᓲᙱᑦᑐᑦ ᐊᑐᖅᑎᑦᑎᒍᓐᓇᖅᑐᑦ ᐃᓕᓐᓂᐊᕈᑎᒋᓯᒪᔭᖏᓐᓂᒃ ᐊᑭᓕᕐᓱᖅᑕᐅᓗᑎᒃ ᐃᖅᑲᓇᐃᔭᕐᓂᕐᒧᑦ ᓄᓇᖏᓐᓂ.
  • ᐊᒥᓲᙱᓗᐊᕐᓯᒪᒻᒪᑕ ᐱᓇᓱᐊᕋᔅᓴᐃᑦ ᐃᖅᑲᓇᐃᔭᖅᑎᑦᑎᒍᑎᔅᓴᐃᑦ ᐃᓄᓕᒫᓂᑦ ᓅᑦᑐᒥᓂᕐᓂᑦ ᓄᓇᓕᓐᓄᑦ: ᐃᓚᖏᑦ ᓄᑖᑦ ᐃᖅᑲᓇᐃᔮᔅᓴᐃᑦ ᓴᖅᑭᖅᑕᐅᓯᒪᒐᓗᐊᖅᑎᓪᓗᒋᑦ, ᐊᒥᓱᑦ ᒐᕙᒪᒃᑯᓐᓂ ᐱᔨᑦᑎᕋᐅᑎᐅᓯᒪᒻᒪᑕ. 
  • ᓄᓇᖓᑦ ᐊᒥᓱᐊᓗᓐᓄᑦ ᐃᖅᑲᓇᐃᔮᖃᙱᑦᑐᓄᑦ ᓄᓇᒋᔭᐅᓕᕐᓯᒪᒻᒪᑦ, ᐅᐊᑦᑎᐊᕈ ᓇᒻᒥᓂᕐᓱᑎᐊᖅᑐᑎᒃ ᐃᓚᒌᑦ ᐱᕕᖃᓗᐊᖃᑦᑕᕐᓯᒪᒐᑎᒃ ᐅᖓᑖᓄᑦ ᐃᓅᓕᕆᔨᒃᑯᑎᒍᑦ ᐊᔪᕐᓴᑐᕐᓯᐅᑎᓂᑦ. 
  • ᐃᓕᖅᑯᓯᖃᖃᑎᒌᙱᑦᑐᑦ ᑐᑭᓯᐅᒪᖃᑦᑕᐅᑎᖃᑦᑕᕐᓂᖏᑦ
  • ᐃᓄᐃᑦ ᖃᓪᓗᓈᓪᓗ ᑐᑭᓯᐅᒪᖃᑦᑕᐅᑎᒍᓐᓇᕐᓂᖓᑦ ᐊᕝᕕᐊᕈᑎᖃᕐᓯᒪᕗᖅ ᐅᖃᐅᓯᖃᖃᑎᒌᙱᓐᓂᒃᑯᒧᑦ ᐊᒻᒪᓗ ᐃᓕᖅᑯᓯᖃᖃᑎᒌᙱᓪᓚᕆᓐᓂᖏᓐᓄᑦ.   
  • ᖃᓪᓗᓈᓕᒫᐸᓗᐃᑦ ᐅᑭᐅᖅᑕᖅᑐᓕᐊᖃᑦᑕᕐᓯᒪᔪᑦ ᐊᑯᓂᐅᙱᑦᑐᖅ−ᐋᖅᑭᓯᒪᓪᓗᑎᒃ ᑳᓐᑐᓛᖏᑦ: ᐊᒥᓲᙱᑦᑐᑦ ᑕᒫᓂᑲᐃᓐᓇᖃᑦᑕᕐᓯᒪᔪᑦ ᒪᕐᕉᓐᓂᒃ ᐱᖓᓱᓂᓪᓗᑭᐊᖅ ᐊᕐᕌᒍᓂᑦ.
  • ᐊᓯᔾᔨᖅᑕᓗᐊᖃᑦᑕᕐᓂᖏᑦ ᐃᒫᒃ ᑐᑭᖃᕐᓯᒪᔪᖅ ᐊᐅᓚᑦᑎᓂᕐᒨᖓᔪᓂᑦ ᐃᖅᑲᐅᒪᔭᕆᐊᓕᖏᓐᓂᒃ ᐳᐃᒍᖅᐸᑦᑐᑎᒃ, ᐃᓚᒋᔭᐅᓪᓗᓂ ᖃᐅᔨᒪᔭᕆᐊᖃᕐᓂᖅ ᓇᓪᓕᐊᑦ ᐱᓇᓱᐊᕈᑕᐅᕙᑦᑐᑦ ᑲᔪᓯᑦᑎᐊᕈᑕᐅᕙᒻᒪᖔᑕ ᐊᒻᒪᓗ ᑲᔪᓯᑦᑎᐊᕈᑕᐅᓯᒪᙱᒻᒪᖔᑕ.
  • ᐊᒥᓱᑦ ᐃᖅᑲᓇᐃᔭᖅᑏᑦ ᕿᓚᒥᐅᓗᐊᖃᑦᑕᕐᓯᒪᒻᒪᑕ ᖃᐅᔨᖃᑦᑕᕐᓯᒪᙱᑦᑐᑦ ᐊᑑᑎᓯᒪᓂᖏᓐᓂᒃ ᐃᖅᑲᓇᐃᔮᒥᓂᖏᑕ.
  • ᖃᓪᓗᓈᑦ ᐃᓕᓐᓂᐊᕆᐊᖃᖃᑦᑕᕐᓯᒪᙱᒻᒪᑕ ᐃᓄᒃᑎᑐᑦ ᐊᒻᒪᓗ ᐃᑲᔫᑎᖃᔾᔮᖏᓐᓂᖓᓂᒃ ᖃᐅᔨᓯᒪᓪᓗᑎᒃ ᐃᓕᒃᑲᓗᐊᕈᑎᒃ: ᖃᓪᓗᓈᑎᑐᑦ ᐅᖃᐅᓯᖅ ᐊᑐᖅᑕᐅᖃᑦᑕᕐᓯᒪᒻᒪᑦ ᒐᕙᒪᒃᑯᓐᓂ, ᐃᓕᓐᓂᐊᕐᓂᓕᕆᓂᕐᒥ ᐊᒻᒪᓗ ᐃᖅᑲᓇᐃᔭᕐᕕᓐᓂᑦ.
  • ᐃᓄᐃᑦ, ᑭᓯᐊᓂᓕ, ᐃᓕᓐᓂᐊᕐᓯᒪᔪᖅ ᖃᓪᓗᓈᑎᑐᑦ ᐃᓕᓐᓂᐊᕆᐊᖃᕐᓯᒪᔭᒐᒥᒃ: ᐃᓕᓴᕕᒻᒥ, ᐃᖅᑲᓇᐃᔭᕐᕕᒻᒥ ᐅᕝᕙᓘᓐᓃᑦ ᖃᓪᓗᓇᑦ ᓄᓇᖓᓐᓂ ᐋᓐᓂᐊᕕᓐᓂᑦ.
  • ᐃᓄᐃᑦ ᐅᑉᐱᕈᓱᔅᓯᒪᔪᑦ ᐊᒥᓲᙱᑦᑐᑦ ᖃᓪᓗᓈᑦ ᐃᑉᐱᒍᓱᓚᐅᕐᓂᖏᓐᓂᒃ ᐃᓕᓐᓂᐊᕆᐊᔅᓴᖅ ᐃᓄᒃᑎᑐᑦ ᐅᕝᕙᓘᓐᓃᑦ ᑐᑭᓯᔭᕆᐊᔅᓴᖅ ᐃᓄᐃᑦ ᐃᓕᖅᑯᓯᖓᓐᓂᒃ. 
  • ᖃᓪᓗᓈᑦ ᑕᑯᑎᑦᑎᓯᒪᔪᑦ ᐃᓕᖅᑯᓯᖓᓐᓂᒃ ᖁᕝᕙᓯᑦᑎᑦᑎᓂᕐᓴᐅᓯᒪᑎᓪᓗᒋᑦ ᐊᒻᒪᓗ ᐅᑉᐱᕆᔭᖃᕐᓯᒪᓂᖏᓐᓂᒃ ᐃᖅᑲᓇᐃᔮᖃᕆᐊᖃᖅᑐᒋᓪᓗᑎᒃ ᓯᕗᓕᕐᓯᓂᕐᒥᒃ ᐃᓄᓐᓂᑦ ᒫᓐᓇᐅᓕᖅᑐᖅ ᐃᓅᓯᕆᔭᐅᓕᖅᑐᑎᑐᑦ.
  • ᐊᕙᑎᖓᑦ ᐃᓕᖅᓯᑯᖓᓪᓗ ᐋᓪᓚᒋᔭᐅᒐᓗᐊᖅᑎᓪᓗᒍ ᑖᒃᑯᓄᖓ, ᐊᒥᓱᑦ ᖃᓪᓗᓈᑦ ᐃᓱᒪᔪᒥᓃᑦ ᖃᐅᔨᒪᓂᕐᓴᐅᓱᒋᓪᓗᑎᒃ ᐃᓄᓐᓂᑦ, ᐃᑲᔫᓯᐊᕐᓯᒪᙱᑦᑐᓂᑦ ᖃᓪᓗᓈᑦ ᓄᓇᖓᓐᓂ ᐃᓕᓐᓂᐊᕈᑕᐅᓯᒪᔪᓂᑦ.
  • ᐱᓗᐊᖅᑐᒥᓕ, ᓲᖑᓵᖃᑦᑕᖅᑐᑎᒃ ᐱᐅᓯᕆᖃᑦᑕᕐᓯᒪᔭᖏᑦ ᐊᒻᒪᓗ ᐃᓕᕋᓇᖅᑐᐊᓘᕙᑦᑐᑎᒃ, ᐃᑉᐱᒋᔭᖃᙱᑦᑐᐊᓘᓪᓗᑎᒃ ᐅᕝᕙᓘᓐᓃᑦ ᖁᕝᕙᖅᑎᑕᐅᓯᒪᕙᑦᑐᑎᒃ ᐱᓂᐊᕐᓂᖃᓕᖅᐸᑦᑐᑎᒃ ᐃᓄᓐᓄᑦ ᐊᒻᒪᓗ ᐃᓕᖅᑯᓯᖓᑦ ᐊᑑᑎᓕᒻᒥᒃ ᐅᖃᖃᑎᒌᒍᑕᐅᒍᓐᓇᐸᓐᓂᖏᑦᑐᑦ ᒐᕙᒪᒃᑯᑦ ᐊᑐᐊᒐᖏᑕ ᒥᔅᓴᓄᑦ ᐊᑦᑐᐃᔪᓂᑦ ᐃᓄᐃᑦ ᐃᓅᓯᖏᓐᓂᒃ ᓈᒻᒪᖏᓪᓚᕆᑦᑐᐊᓘᒻᒥᒃ.  
  • ᐃᓄᐃᑦ ᐱᔪᓐᓇᕐᓂᖃᓗᐊᖃᑦᑕᕐᓯᒪᙱᑦᑐᑦ ᖃᓪᓗᓈᕐᓂᑦ ᓈᓚᑦᑎᑦᑎᒋᐊᔅᓴᖅ.
  • ᐃᓄᐃᑦ ᑎᓕᐅᖅᑕᐅᕙᓚᐅᙱᑦᑐᑦ, ᐱᔾᔪᑎᒋᓪᓗᒋᑦ ᐃᓕᖅᑯᓯᖏᓐᓂ ᐊᑐᖅᑕᐅᒐᔪᑦᑐᑦ, ᐊᑭᓴᖅᑐᓂᕐᒥᒃ ᖃᓪᓗᓈᑦ ᐅᑉᐱᕆᔭᖏᓐᓂᒃ ᐃᓱᒪᒋᔭᖏᓐᓂᓪᓗ.   
  • ᖃᓪᓗᓈᑦ ᐃᓄᐃᑦ ᐃᑉᐱᒍᓱᑦᑎᐊᕐᓂᖏᓐᓂᒃ ᐊᑐᕐᓂᓪᓗᖃᑦᑕᓚᐅᕐᒥᔪᑦ ᐱᔪᓐᓇᐅᑎᖏᓐᓄᑦ. 
  • ᐊᓪᓚᑦ ᐃᓄᐃᑦ ᐊᖏᖃᑎᖃᙱᓪᓚᕆᒃᑲᓗᐊᖅᑎᓪᓗᒋᑦ ᐅᕝᕙᓘᓐᓃᑦ ᕿᐱᓗᒃᑲᓗᐊᖅᑎᓪᓗᒋᑦ ᕿᓄᕕᐅᑎᓪᓗᒋᑦ, ᖃᓪᓗᓈᑦ ᑎᓕᐅᕆᒋᐊᓪᓚᖃᑦᑕᖅᑐᒥᓃᑦ ᖃᓄᖅᑑᖅᑐᑎᒃ, ᓲᕐᓗ ᖃᐅᔨᒪᓂᐊᖅᑯᑏᓚᓪᓗᒋᑦ ᓯᕘᕋᓵᖅᑐᒋᓪᓗ, ᐊᑐᖅᑕᐅᖁᔭᖏᓐᓂᒃ ᐊᑐᖁᔨᔪᑯᓗᐊᐲᑦ.

ᐃᓱᒪᒋᓪᓗᒋᑦ ᐅᖃᖃᑎᒋᔭᐅᑦᑎᐊᖃᑦᑕᖏᓐᓂᒥᓂᖏᑦ, ᐊᒥᓱᑦ ᐃᓄᐃᑦ ᓇᒻᒥᓂᖅ ᐃᓱᒪᑖᕈᑎᖃᕆᐊᖃᖃᑦᑕᓚᐅᖅᑐᑦ ᒐᕙᒪᒃᑯᑦ ᖃᓄᐃᓕᐅᕈᑎᒋᔪᒫᕐᓂᐊᖅᑕᖏᓐᓂᒃ, ᐊᑐᐊᒐᖏᓐᓂᒃ ᐱᓂᐊᕈᑎᖏᓐᓂᓪᓗ, ᓲᕐᓗ ᓇᒥᓕᒫᖅ ᐅᑉᐱᕆᔭᐅᒻᒪᑦ ᑐᖁᕋᖅᑕᐅᓂᒥᓂᖏᑦ ᖁᒻᒦᑦ ᐃᓚᒋᔭᐅᓯᒪᒻᒪᑦ ᐱᔮᖅᑯᒻᒥᑦ ᐊᑐᐊᒐᓕᐊᒥᓂᕐᒧᑦ ᓅᓚᕿᑎᑕᐅᓂᐊᕐᖓᑕ ᓄᓇᒌᓐᓇᕐᓂᐊᓕᖅᑕᖏᓐᓄᑦ. 

ᑭᓪᓕᓯᓂᐊᖅᑏᑦ ᓄᓇᓕᓐᓄᑦ ᕿᑭᖅᑕᓂ ᐳᓚᕋᒻᒪᑕ, ᑐᓵᖃᑦᑕᔪᔪᒍᑦ ᐃᑉᐱᓇᓪᓚᕆᑦᑐᓂᑦ ᓇᓗᓇᐃᕐᓯᒍᑕᐅᔪᓂᑦ−ᖁᐊᕐᓵᓇᖅᑐᒃᑰᕈᑎᒥᓂᑐᐃᓐᓇᕆᙱᑕᖏᓐᓂᒃ ᐅᐊᑦᑎᐊᕈ, ᑭᓯᐊᓂᑦᑕᐅᖅ ᒪᒥᓴᕆᐊᖃᕐᓂᖏᓐᓂᒃ ᓴᐃᒻᒪᖃᑎᒌᒋᐊᖃᕐᓂᖏᓐᓂᒃ. ᐊᒥᓱᑦ ᐱᖃᑕᐅᔪᔪᑦ ᐊᑐᓕᖁᔨᔾᔪᑎᖃᔪᔪᑦ ᓱᓕᔪᕐᓇᖅᑐᓂᑦ ᖃᓄᖅᑑᕈᑎᖃᕆᐊᖃᕐᓂᖏᓐᓂᒃ ᐊᒻᒪᓗ ᐊᑐᖅᑕᐅᔭᕆᐊᖃᕐᓂᐊᖅᑐᓂᒃ ᐃᓄᐃᑦ ᓯᕗᒧᑦ ᐱᕙᓪᓕᐊᑦᑎᐊᕐᓂᐊᖓᑕ ᓯᕗᓂᔅᓴᖃᑦᑎᐊᓂᕐᓴᐅᓂᐊᕐᖓᑕ ᓇᒻᒥᓂᖅ ᐋᖅᑭᔅᓱᐃᓗᑎᒃ. ᑖᒃᑯᐊ, ᐱᖃᓯᐅᑎᓪᓗᒋᑦ ᐊᑐᓕᖁᔨᔾᔪᑕᐅᓯᒪᔪᑦ ᑭᓪᓕᓯᓂᐊᖅᑎᓂᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᑎᑎᕋᖅᑕᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᓐᓂ ᐅᓂᒃᑳᖏᓐᓂ: ᑲᔪᓯᑎᑦᑎᓂᖅ ᓴᐃᒻᒪᖃᑎᒌᓐᓂᕐᒥᒃ. ᐊᑐᓕᖁᔨᔾᔪᑕᐅᓪᓗᐊᑕᔪᔪᑦ, ᑭᓯᐊᓂᓕ, ᓇᐃᓈᕋᔅᓴᐅᕗᑦ ᐃᒪᐃᓕᖓᓗᑎᒃ:  

  • ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᕐᓯᔭᕆᐊᓖᑦ ᓵᙵᔭᔅᓴᐅᓂᖏᓐᓂᒃ ᐊᒥᓱᓂᑦ ᒐᕙᒪᒃᑯᓐᓂ ᑐᑭᑖᕈᑕᐅᕙᑦᑐᒥᓂᕐᓂᑦ ᐊᑐᕆᐊᑐᙱᑦᑐᓂᑦ ᐊᔅᓱᕈᕈᑕᐅᔪᒥᓂᕐᓄᑦ ᐊᒻᒪᓗ ᐃᓅᓯᕐᒧᑦ, ᐃᓗᓯᕐᒧᑦ ᐃᓕᓐᓂᐊᕐᓂᒧᓪᓗ ᓈᒻᒪᙱᓗᐊᖅᑐᓂᑦ ᐊᑐᕈᑎᒥᓂᐅᔪᓄᑦ ᐃᓄᓐᓄᑦ. ᑕᒪᒃᑮᒃ ᖃᓪᓗᓈᑦ ᓄᓇᖓᓐᓂᒥᐅᑦ ᑲᓇᑕᒥᐅᑦ ᐊᒻᒪᓗ ᐃᓅᓱᓐᓂᕐᓴᐃᑦ ᐃᓄᐃᑦ ᑐᑭᓯᑦᑎᐊᕆᐊᖃᕐᖓᑕ ᐋᓐᓂᓇᖅᑐᓂᑦ ᐊᓯᔾᔨᖅᑕᐅᒍᑎᒥᓂᖏᓐᓂᒃ ᐃᓄᐃᑦ ᐊᑯᓐᓂᖏᓐᓂ 1950 ᐊᒻᒪᓗ 1975. ᐊᒥᓱᑦ ᐊᑐᖅᑕᐅᓪᓚᕆᒋᐊᓖᑦ ᐊᑐᖅᑎᑦᑎᒋᐊᕐᓗᑎᒃ ᒪᒥᓴᕐᓂᕐᒥᒃ ᑕᐃᒃᑯᓄᖓ ᐊᑦᑐᖅᑕᐅᓯᒪᔪᓄᑦ ᑎᑎᕋᖅᑕᐅᓯᒪᑦᑎᐊᖅᑐᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᓐᓂ ᐅᓂᒃᑳᖏᓐᓂ ᑎᑎᕋᖅᑕᐅᓯᒪᓪᓗᑎᒃ ᐃᓕᓴᕐᓯᓂᖅ ᐊᒻᒪᓗ ᒪᒥᑎᑦᑎᓂᖅ ᑕᐃᔅᓱᒪᓂ ᑕᒻᒪᕈᑕᐅᔪᒥᓂᕐᓄᑦ.
  • ᑕᐃᔅᓱᒪᓂ ᑕᒻᒪᕈᑕᐅᓚᐅᕐᓯᒪᔪᑦ ᐊᑐᖅᑕᐅᑲᓐᓂᖁᓇᒋᑦ, ᐃᓄᐃᑦ ᐊᐅᓚᑦᑎᒍᓐᓇᕐᓂᖏᑦ ᓲᖑᓯᑎᑕᐅᒋᐊᕆᐊᓖᑦ ᑕᐃᒪᒃ ᐊᐅᓚᑦᑎᕕᒻᒥ, ᐃᓅᓯᓕᕆᓂᕐᒥ ᐊᒻᒪᓗ ᒪᑭᒪᓇᓱᐊᕈᑎᓕᕆᓂᕐᒥ ᑐᑭᑖᕈᑕᐅᕙᑦᑐᑦ ᐊᑐᖅᑎᑎᓪᓚᑦᑖᖃᑦᑕᓂᐊᕐᖓᑕ ᐃᓄᐃᑦ ᐃᓕᖅᑯᓯᖓᓐᓂᒃ ᐊᒻᒪᓗ ᐱᔭᕆᐊᓕᖏᓐᓂᒃ. ᐃᓚᖏᑦ ᐊᑐᖅᑕᐅᔪᓐᓇᖅᑐᑦ ᑲᔪᓯᑎᑦᑎᓂᕐᒥ ᓇᓗᓇᐃᔭᖅᑕᐅᓯᒪᔪᑦ ᓴᙵᑦᑎᒋᐊᖅᑎᑦᑎᓂᕐᒥ ᐃᓄᐃᑦ ᐊᐅᓚᑦᑎᒍᓐᓇᕐᓂᖓᓂ.   
  • ᐊᒥᓱᑦ ᐊᓯᔾᔨᕐᓯᒪᐅᕋᓗᐊᖅᑎᓪᓗᒋᑦ ᐃᓅᓯᖏᓐᓂ ᑕᐃᒪᙵᑦ ᑐᖏᓕᐊᓂ ᓄᓇᕐᔪᐊᕐᒥ ᐅᓇᑕᕕᔾᔪᐊᖅᑐᖃᓚᐅᕐᓯᒪᒻᒪᓂᑦ, ᐃᓄᐃᑦ ᓱᓕ ᐊᑐᖅᑎᑏᓐᓇᕐᓯᒪᔪᖅ ᐊᔾᔨᒋᔭᐅᙱᑦᑐᒥᒃ ᐃᓕᖅᑯᓯᖓᓐᓂᒃ. ᐃᓄᐃᑦ ᐃᓕᖅᑯᓯᖓᑦ ᖁᕕᐊᓲᑕᐅᔭᕆᐊᓕᒃ, ᓲᖑᓯᑎᑕᐅᔭᕆᐊᓕᒃ ᐊᒻᒪᓗ ᖃᐅᔨᑎᑦᑎᒍᑕᐅᔭᕆᐊᓕᒃ ᐊᓯᖏᓐᓄᑦ ᑲᓇᑕᒥᐅᓄᑦ, ᑕᐃᒪᒃ ᓇᓗᓇᐃᕐᓯᒪᒻᒪᑦ ᓴᙵᑦᑎᒋᐊᖅᑎᑦᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᓐᓂᒃ.

ᑕᐃᔅᓱᒪᓂ ᐊᑐᖅᑕᐅᖃᑦᑕᕐᓯᒪᔪᑦ ᑲᔪᓯᑎᑕᐅᓯᒪᔪᑦ ᓱᓕ ᕿᑭᖅᑕᓂ ᒪᑯᐊᖑᒻᒪᑕ ᐊᒥᓱᑦ ᐱᓪᓚᕇᑦ ᐃᓅᓯᕐᒥ ᐋᓐᓂᐊᒍᑕᐅᓯᒪᔪᑦ, ᓲᕐᓗ ᐃᒥᐊᓗᓗᐊᖃᑦᑕᕐᓂᖅ ᐋᖓᔮᕐᓇᑐᖅᑐᓗᐊᖃᑦᑕᕐᓂᖅ, ᐆᒻᒪᑦᑎᐊᕆᓐᓇᖏᑦᑐᑦ ᓂᖀᑦ, ᐃᖅᑲᓇᐃᔭᙱᑦᑐᑦ ᐊᒥᓱᐊᓗᐃᑦ, ᐱᔭᕇᕐᐸᑦᑐᑦ ᐃᓅᓴᑉᐸᑦᑐᑎᒃ, ᐊᒥᓱᐊᓘᕙᑦᑐᑎᒃ ᐱᕋᔭᑉᐸᑦᑐᑦ, ᐊᒻᒪᓗ ᓈᒻᒪᒐᑎᒃ ᐱᐅᒐᑎᓪᓗ ᐃᓪᓗᐃᑦ. ᓄᓇᖅᑲᑎᒌᑦᑎᐊᕈᓐᓇᕐᓯᓂᐊᖁᒍᑦᑎᒍ ᐊᔾᔨᒌᙱᑐᒡᒍᑎᓂᑦ ᐃᓕᖅᑯᓯᖅᑎᒍᑦ ᖃᓄᖅᑑᕈᑎᖃᕆᐊᖃᕐᓂᐊᕐᖓᑕ ᐋᖅᑭᒋᐊᕐᓂᐊᕐᖓᑦ ᐃᓄᐃᑦ ᐃᓅᓯᖓᑦ.

ᑖᒃᑯᐊ ᓴᖅᑭᖅᑐᒋᑦ ᐊᑐᓕᖁᔨᔾᔪᐅᓯᒪᔪᑦ, ᑭᓪᓕᓯᓂᐊᖅᑏᑦ ᓂᕆᐅᑉᐳᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖃᑎᖃᕐᓂᐊᕆᐊᖏᑕ ᕿᑭᖅᑕᓂ ᓄᓇᓕᓐᓂᑦ ᐊᒻᒪᓗ ᒐᕙᒪᒃᑯᓐᓂᑦ ᐋᖅᑭᔅᓱᐃᓗᑎᒃ ᐊᑑᑎᓕᒻᒥᒃ ᖃᓄᖅᑑᕈᑎᔅᓴᒥᒃ ᐸᕐᓇᐅᒻᒥᑦ ᐊᒻᒪᓗ ᑲᔪᓯᑎᑦᑎᕙᓪᓕᐊᓂᕐᒧᑦ ᐸᕐᓇᐅᒻᒥᑦ, ᐊᒻᒪᓗ ᑕᒪᕐᒥᒃ ᒐᕙᒪᒃᑯᓐᓂ ᐃᖅᑲᓇᐃᔭᕐᕕᐅᔪᑦ ᑲᑦᑐᖓᐃᕈᑎᖃᖁᓇᖅᑯᑦ ᐱᓇᓱᐊᕈᑎᔅᓴᓂᑦ ᐊᑐᖅᑕᐅᔭᕆᐊᖃᕋᔭᖅᑐᓂᑦ ᑲᔪᓯᑎᑦᑎᓂᐊᕐᓂᕐᒧᑦ ᑲᑐᔾᔨᓪᓗᑎᒃ ᑐᕌᒐᖏᓐᓂᒃ.   

ᐅᑯᐊ ᓄᓇᓖᑦ ᐱᖃᑕᐅᔪᔪᑦ ᑭᓪᓕᓯᓂᐊᖅᑎᓄᑦ:

  • ᐃᒃᐱᐊᕐᔪᒃ
  • ᑭᙵᐃᑦ
  • ᑲᖏᖅᑐᒑᐱᒃ
  • ᐊᐅᓱᐃᑦᑐᖅ
  • ᓴᓂᕋᔭᒃ
  • ᐃᒡᓗᓕᒃ
  • ᐃᖃᓗᐃᑦ
  • ᑭᒻᒥᕈᑦ
  • ᐸᓐᓂᖅᑑᖅ
  • ᒥᑦᑎᒪᑕᓕᒃ
  • ᕿᑭᖅᑕᕐᔪᐊᖅ
  • ᖃᐅᓱᐃᑦᑐᖅ
  • ᓴᓂᑭᓗᐊᖅ

ᑭᓪᓕᓯᓂᐊᖅᑎ ᔭᐃᒥᓯ ᐃᒡᓗᓕᐅᖅᑎ ᓯᕗᓕᕐᓯᔪᔪᖅ ᖃᐅᔨᓇᓱᐊᕈᑎᖃᕐᓂᕐᒥ. ᒫᑕᓕᓐ ᕋᑦᕗᓐ, ᑐᑭᒧᐊᑦᑎᑦᑎᔨᐅᔪᔪᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ, ᑲᒪᒋᔭᖃᖅᑐᓂ ᑭᓪᓕᓯᓂᐊᖅᑏᑦ ᐃᖅᑲᓇᐃᔮᖏᓐᓂ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᑦᑐᐊᔪᕙᑦ ᑲᓇᑕᐅᑉ ᒐᕙᒪᒃᑯᖏᑕ ᓱᓕᔪᕐᓂᐊᕐᓂᕐᒧᑦ ᓴᐃᒻᒪᖃᑎᒌᓐᓂᒧᓪᓗ ᑭᓪᓕᓯᓂᐊᖅᑎᖏᓐᓄᑦ ᐃᓕᓐᓂᐊᕆᐊᕐᕕᐅᖃᑦᑕᓚᐅᕐᓯᒪᔪᑦ ᐱᔾᔪᑎᒋᓪᓗᒋᑦ?

ᐋᒡᒐ, ᑭᓪᓕᓯᓂᐊᖅᑏᑦ ᐊᑦᑐᐊᔪᙱᑦᑐᑦ ᓱᓕᔪᕐᓂᐊᕐᓂᕐᒧᑦ ᓴᐃᒻᒪᖃᑎᒌᓐᓂᒧᓪᓗ ᑭᓪᓕᓯᓂᐊᖅᑎᓄᑦ ᑲᓇᑕᒥ  (TRC). ᓱᓕᔪᕐᓂᐊᖅᑏᑦ ᑲᓇᑕᒥ ᒐᕙᒪᒃᑯᓐᓄᑦ ᑎᒥᐅᒻᒪᑕ ᐃᑲᔪᕐᐸᑦᑐᑦ ᐊᑦᑐᖅᑕᐅᓯᒪᔪᓂᑦ ᑕᐃᔅᓱᒪᓂ ᐊᓪᓚᐃᑦ ᓇᔪᒐᕆᕙᑦᑕᒥᓂᖏᓐᓄᑦ ᐊᒻᒪᓗ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖁᑎᖏᓐᓄᑦ ᐃᓕᓐᓂᐊᕆᐊᖅᑎᑕᐅᕙᑦᑐᒥᓂᕐᓂᑦ ᐱᕕᖃᖅᑎᑦᑎᓯᒪᓪᓗᑎᒃ ᖃᐅᔨᒃᑲᐃᒍᑎᖃᕐᓂᕐᒥᒃ ᐊᑐᓂᑦ ᐊᑐᕐᓯᒪᔭᖏᓐᓂᒃ ᐊᑦᑕᓇᙱᑦᑐᒥ ᐊᒻᒪᓗ ᐃᓕᖅᑯᓯᖅᑎᒍᑦ ᓈᒻᒪᒋᔭᐅᔪᓂᑦ ᑲᑎᒪᖃᑦᑕᓂᒃᑯᑦ.

ᑭᓪᓕᓯᓂᐊᖅᑏᑦ ᐃᖅᑲᓇᐃᔭᖃᑎᖃᕐᓯᒪᙱᒃᑲᓗᐊᖅᑎᓪᓗᒋᑦ ᑖᒃᑯᓂᖓ ᓱᓕᔪᕐᓂᐊᖅᑎᓂᑦ ᑲᓇᑕᒥ, ᑭᓪᓕᓯᓂᐊᖅᑏᑦ ᖃᐅᔨᓴᕐᓯᒪᔪᑦ ᐃᓕᓐᓂᐊᑎᑦᑎᒍᑕᐅᕙᑦᑐᒥᓂᕐᓂᑦ ᐊᒻᒪᓗ ᐃᓄᐃᑦ ᐊᑐᖃᑦᑕᕐᓯᒪᔭᖏᓐᓂᒃ ᐃᓕᓴᕕᓐᓂᑦ 1950 ᐊᒻᒪᓗ 1975 ᐊᑯᓐᓂᖏᓐᓂ. ᑕᑯᔪᓐᓇᖅᑕᓯ ᑕᒪᑐᒪ ᒥᔅᓵᓄᑦ ᑭᓪᓕᓯᓂᐊᖅᑏᑦ ᐱᔾᔪᑎᖏᓐᓂ ᑕᐃᔅᓱᒪᓂᓴᓕᕆᒍᑕᐅᓯᒪᔪᓂᑦ, ᐃᓕᓐᓂᐊᕐᓂᖅ − ᐃᓕᓐᓂᐊᕐᓂᖅ ᕿᑭᖅᑕᓂ, 1950ᒥ 1975ᒧᑦ, ᑐᑭᓯᒃᑲᓂᕐᓂᐊᕋᔅᓯ ᖃᐅᔨᒍᑎᒥᓂᖏᑕ ᒥᔅᓵᓄᑦ. 

ᐸᓖᓯᒃᑯᑦ ᐃᓕᓴᕆᔭᐅᓯᒪᓪᓗᑎᒃ ᐃᑲᔪᔪᔪᑦ, ᐃᓚᖃᔪᒻᒥᔪᖅ ᑕᑯᔪᓐᓇᑎᑦᑎᓪᓗᑎᒃ ᑎᑎᖅᑲᖁᑎᓂᑦ ᐊᒻᒪᓗ ᐊᔾᔨᖏᓐᓂᒃ ᐊᒥᓱᓕᐅᖅᑎᑦᑎᒍᓐᓇᔪᔪᑦ ᐱᔾᔪᑎᓕᓐᓂᑦ ᐱᓇᓱᐊᒐᖓᓐᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ. ᑎᓕᐅᕆᖃᑦᑕᔪᒻᒥᔪᑦ ᓄᖅᑲᖓᓕᖅᑐᓂᑦ ᐸᓖᓯᒥᓂᕐᓂᑦ ᐱᖃᑕᐅᖁᓪᓗᒋᑦ ᑭᓪᓕᓯᓂᐊᖅᑏᑦ ᓈᓚᓐᓂᖏᓐᓂ. 

2005-06ᒥ, ᐸᓖᓯᒃᑯᑦ ᑕᒪᑐᒪ ᒥᔅᓵᓄᑦ ᖃᐅᔨᓴᔪᔪᑦ ᐸᓯᑦᑎᒍᑕᐅᓯᒪᔪᓂᑦ ᐊᒥᓱᐊᓗᓐᓂᑦ ᑐᖁᕋᐃᔪᒥᓂᐅᒋᐊᔅᓇᖏᓐᓂᒃ ᐃᓄᐃᑦ ᕿᒧᔅᓯᖏᓐᓂᒃ 1950 1970ᓗ ᐊᑯᓐᓂᖏᓐᓂ. ᓇᐃᓈᕐᓯᒪᔪᓂᑦ ᐅᓂᒃᑳᖏᓐᓂ, ᑕᐃᔭᐅᓪᓗᓂ ᐱᔭᕇᕈᑎᖏᑦ ᐅᓂᒃᑳᑦ: ᐸᓖᓯᒃᑯᑦ ᕿᒥᕐᕈᔪᑦ ᐸᓯᑦᑎᒍᑕᐅᓯᒪᔪᓂᑦ ᐱᔾᔪᑎᒋᓪᓗᒋᑦ ᐃᓄᐃᑦ ᕿᒧᔅᓯᖏᑦ, ᑖᒃᑯᐊ ᑕᑯᔭᔅᓴᐃᑦ ᐸᓖᓯᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ. ᓈᒪᔪᑦ ᐅᓂᒃᑳᖏᑦ ᑐᑭᓕᐅᖅᑕᐅᓯᒪᔪᑦ ᐊᒻᒪᓗ ᐱᔭᔅᓴᐅᓪᓗᑎᒃ ᑭᓯᐊᓂ ᑐᔅᓯᕌᖑᑎᓪᓗᒋᑦ ᐸᓖᓯᒃᑯᓐᓄᑦ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᑎᑎᕋᔪᔪᑦ ᑭᐅᔾᔪᑎᖓᓐᓂᒃ ᐸᓖᓯᒃᑯᑦ ᐅᓂᒃᑳᖏᓐᓄᑦ, ᕿᒥᕐᕈᒍᑎᒥᓃᑦ ᐸᓖᓯᒃᑯᑦ ᐊᒻᒪᓗ ᐃᓄᐃᑦ ᕿᒧᔅᓯᖏᑕ ᒥᔅᓵᓄᑦ (2006) ᐅᓂᒃᑳᖏᓐᓂᒃ, ᐃᓚᒋᔭᐅᓪᓗᓂ ᐱᓇᓱᐊᒐᖓᓐᓄᑦ.